سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ارشاد فرمایا: اللہ تعالیٰ قیامت کے دن سب سے پہلے سیدنا نوح علیہ السلام اور آپ کی امت کو بلائے گا اور (آپ کی امت سے) فرمائے گا: تم نے سیدنا نوح علیہ السلام کو کیا جواب دیا تھا؟ وہ کہیں گے: انہوں (سیدنا نوح علیہ السلام) نے نہ ہمیں کبھی دعوت دی نہ (تیرے احکام) ہم تک پہنچائے، نہ کبھی ہمیں نصیحت کی نہ ہمیں (کبھی بھلائی کا) حکم دیا اور نہ (کبھی برائی سے) منع کیا۔ سیدنا نوح علیہ السلام کہیں گے: اے میرے رب! میں نے ان کو دعوت دی، ایسی دعوت جو اولین و آخرین سب کو شامل تھی، پشت در پشت ان کو دعوت دی حتیٰ کہ یہ سلسلہ خاتم النبیین احمد تک پہنچا۔ انہوں نے اس کو منسوح کیا اور اس کو پڑھا اور اس کا یقین کیا اور اس کی تصدیق کی۔ اللہ تعالیٰ فرشتوں سے فرمائے گا: احمد صلی اللہ علیہ وسلم اور ان کی امت کو بلاؤ تو رسول اللہ صلی اللہ علیہ وسلم اور آپ کی امت اس شان سے وہاں آئیں گے کہ ان کا نور ان کے آگے آگے دوڑ رہا ہو گا۔ سیدنا نوح علیہ السلام، سیدنا محمد صلی اللہ علیہ وسلم اور آپ کی امت سے کہیں گے: کیا تم جانتے ہو کہ میں نے اپنی قوم کو اللہ تعالیٰ کا پیغام پہنچا دیا تھا اور ان کو سمجھانے کی ازحد کوشش کی تھی اور سراً و علانیۃً ان کو دوزخ سے بچانے کی کوشش کی تھی لیکن میری دعوت پر یہ اور بھی دور بھاگتے رہے؟ تو رسول اللہ صلی اللہ علیہ وسلم اور آپ کی امت کہیں گے: ہم گواہی دیتے ہیں کہ آپ نے جو کچھ کہا ہے وہ سب کچھ سچ ہے۔ اس پر سیدنا نوح علیہ السلام کی قوم کہے گی: اے احمد! آپ کو اور آپ کی امت کو اس سب کا کیا معلوم؟ ہم سب سے پہلی امت ہیں جبکہ آپ اور آپ کی امت سب سے آخر میں آئے ہیں۔ تو رسول اللہ صلی اللہ علیہ وسلم پوری سورہ نوح پڑھیں گے۔ جب آپ سورۃ ختم فرمائیں گے تو آپ کی امت کہے گی: ہم گواہی دیتے ہیں کہ یہ سچ واقعہ ہے اور اللہ تعالیٰ کے سوا کوئی معبود نہیں ہے اور بے شک اللہ تعالیٰ ہی غالب حکمت والا ہے۔ اس وقت اللہ تعالیٰ فرمائے گا: اے مجرمو! آج تم الگ ہو جاؤ تو یہ سب سے پہلا گروہ ہو گا جو الگ ہو کر دوزخ میں جائے گا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4056]

سیدنا عبداللہ بن عباس رضی اللہ عنہما نے یہ آیت پڑھی: وَ لَا تَبَرَّجْنَ تَبَرُّجَ الْجَاھِلِیَّۃِ الْاُوْلٰی ” اور بے پردہ نہ رہو جیسے اگلی جاہلیت کی بے پردگی۔“ اور فرمایا: سیدنا نوح علیہ السلام اور سیدنا ادریس علیہ السلام کے درمیان ایک ہزار سال کا فرق ہے اور آدم علیہ السلام کی اولاد کے دو قبیلے تھے، ان میں سے ایک ہموار زمین پر آباد تھا اور دوسرا پہاڑوں پر رہتا تھا۔ پہاڑ پر رہنے والے قبیلے کے مرد خوبصورت تھے جبکہ ان کی عورتیں خوبصورت نہ تھیں اور ہموار زمین کے باشندوں کی عورتیں خوبصورت اور مرد بدصورت تھے۔ شیطان ہموار زمین والوں میں سے ایک آدمی کے پاس ایک چرواہے کے لڑکے کی صورت میں آیا اور ان کو اتنی خوبصورت آواز سنائی کہ اس جیسی آواز انہوں نے کبھی نہ سنی تھی۔ ان لوگوں نے اس کو عید بنا لیا اور سال میں ایک مرتبہ وہاں پر جمع ہونے لگ گئے اور پہاڑ والوں میں سے ایک آدمی اچانک وہاں پر آیا، اس وقت وہ لوگ اپنے اسی میلے میں تھے۔ اس نے ان کی عورتوں اور ان کی خوبصورتی کو دیکھا وہ اپنے ساتھیوں کے پاس آیا اور ان کو اس بات کی خبر دی چنانچہ ان کے مرد ان عورتوں کی طرف آئے اور میلے میں ان کے ساتھ شریک ہو گئے۔ اس طرح ان میں برائیاں پھیل گئیں۔ یہی مطلب ہے کہ اللہ تعالیٰ کے قول:” وَ لَا تَبَرَّجْنَ تَبَرُّجَ الْجَاھِلِیَّۃِ الْاُوْلٰی “ کا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4057]

سیدنا وہب بن منبہ رضی اللہ عنہ سے پوچھا گیا کہ ادریس علیہ السلام کون تھے اور وہ کون سے زمانے میں تھے؟ انہوں نے کہا: یہ سیدنا نوح علیہ السلام کے دادا ہیں، جن کا نام ” خنوخ “ ہے اور وہ (سیدنا ادریس علیہ السلام) جنت میں زندہ ہیں اور محمد بن اسحاق بن یسار کہتے ہیں: سیدنا ادریس علیہ السلام، سیدنا آدم علیہ السلام کی اولاد میں سے وہ پہلے انسان ہیں جن کو نبوت عطا کی گئی اور وہ اخنوخ بن یزید بن اھلالیل بن قینان بن ناخر بن شیث بن آدم ہیں۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4058]

سیدنا سمرہ بن جندب رضی اللہ عنہ فرماتے ہیں: سیدنا ادریس علیہ السلام کا رنگ صاف، قد لمبا، پیٹ بڑا، سینہ کشادہ، جسم پر بال کم اور سر کے بال گھنے تھے۔ ان کی ایک آنکھ چھوٹی تھی۔ ان کے سینے پر تین سفید نشان تھے جو کہ برص کے نہ تھے۔ جب لوگوں نے دین الٰہی کی تبلیغ کی پاداش میں ان پر ظلم و ستم کی حد کر دی تو اللہ تعالیٰ نے ان کو چھٹے آسمان پر اٹھا لیا۔ اسی بارے میں اللہ تعالیٰ فرماتا ہے: ” وَ رَفَعْنٰہُ مَکَانًا عَلِیًّا “ (مریم: 57) ” اور ہم نے اسے بلند مکان پر اٹھا لیا “ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4059]

سیدنا عبداللہ بن بسر رضی اللہ عنہ فرماتے ہیں: رسول اللہ صلی اللہ علیہ وسلم نے اپنا ہاتھ میرے سر پر رکھا اور فرمایا: یہ بچہ ایک سو سال تک جئے گا۔ چنانچہ آپ کی عمر ایک سو سال ہوئی۔ واقدی کا کہنا ہے کہ اللہ تعالیٰ نے فرمایا: وَ قُرُوْنًا بَیْنَ ذٰلِکَ کَثِیْرًا (الفرقان: 38) ” اور ان کے بیچ میں بہت سی سنگتیں “ اور سیدنا نوح علیہ السلام اور آدم علیہ السلام کے درمیان دس صدیاں ہیں اور نوح علیہ السلام اور ابراہیم علیہ السلام کے درمیان دس صدیاں ہیں چنانچہ آدم علیہ السلام کی تخلیق کے دو ہزار سال بعد سیدنا ابراہیم علیہ السلام پیدا ہوئے۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4060]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: لوگ کہیں گے: اے ابراہیم! آپ اللہ کے خلیل ہیں، آپ کی خلت کا چرچا آسمانوں میں اور زمینوں میں ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4061]

سیدنا جندب سے مروی ہے کہ نبی اکرم صلی اللہ علیہ وسلم نے اپنی وفات سے پہلے ارشاد فرمایا: اللہ تعالیٰ نے مجھے اپنا خلیل بنایا ہے جیسا کہ سیدنا ابراہیم علیہ السلام کو خلیل بنایا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4062]

سیدنا عبداللہ بن عباس رضی اللہ عنہما فرماتے ہیں: جب نبی اکرم صلی اللہ علیہ وسلم نے بیت اللہ میں تصویریں دیکھیں تو اندر داخل ہونے سے رک گئے۔ آپ نے ان کو مٹانے کا حکم دیا تو وہ مٹا دی گئیں۔ آپ نے دیکھا کہ سیدنا ابراہیم علیہ السلام اور سیدنا اسماعیل علیہ السلام کے ہاتھ میں پانسے پکڑے ہوئے تھے۔ آپ نے فرمایا: اللہ تعالیٰ ان کو ہلاک کرے، خدا کی قسم! انہوں نے کبھی بھی پانسے نہیں ڈالے۔ ٭٭ یہ حدیث امام بخاری رحمۃ اللہ علیہ کے نزدیک صحیح ہے۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4063]

محمد بن اسحاق نے اللہ تعالیٰ کے خلیل علیہ السلام، اس کے صفی اور اس کے نبی سیدنا ابراہیم علیہ السلام کا نسب یوں بیان کیا ہے: ” اِبْرَاھِیْمُ بْنُ اٰزَرَ بْنِ مَاجُوْرَ بْنِ سَارُوْحٍ بْنِ رَاعُوْ بْنِ مَالِحٍ بْنِ عَابِرٍ بْنِ سَالِخٍ بْنِ اَرْفَخْشَدَ بْنِ سَامٍ بْنِ نُوْحٍ صَلَوَاتُ اللّٰہِ عَلَیْہ۔“ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4064]

سیدنا ابوامامہ رضی اللہ عنہ فرماتے ہیں: آسمان سے ایک ہاتھ نمودار ہوا، اس کی انگلیوں کے درمیان سفید بال تھے، وہ سیدنا ابراہیم کے سر کے قریب آنے لگا پھر وہ بالکل قریب آ گیا۔ اس نے وہ بال آپ کے سر میں ڈال دیا اور کہا: یہ عزت کی سفیدی ہے۔ پھر اللہ تعالیٰ نے ان کی طرف طہارت اختیار کرنے کی وحی فرمائی۔ سیدنا ابراہیم علیہ السلام سب سے پہلے شخص ہیں جنہوں نے جوانی میں ختنہ کیا اور اللہ تعالیٰ نے سیدنا ابراہیم علیہ السلام پر ان آیات میں سے بھی کچھ نازل فرمائی ہیں، جو محمد صلی اللہ علیہ وسلم پر قرآن کریم میں نازل کی گئیں۔ ان میں سے ایک آیت یہ تھی: اَلتَّآئِبُوْنَ الْعٰبِدُوْنَ الْحٰمِدُوْنَ السَّآئِحُوْنَ الرّٰکِعُوْنَ السّٰجِدُوْنَ الْاٰمِرُوْنَ بِالْمَعْرُوْفِ وَ النَّاھُوْنَ عَنِ الْمُنْکَرِ وَ الْحٰفِظُوْنَ لِحُدُوْدِ اللّٰہِ وَ بَشِّرِ الْمُؤْمِنِیْنَ (التوبۃ: 112) ” توبہ والے، عبادت والے، سراہنے والے، روزے والے، رکوع والے، سجدے والے، بھلائی کے بتانے والے، اور برائی سے روکنے والے اور اللہ کی حدیں نگاہ رکھنے والے اور خوشی سناؤ مسلمانوں کو “۔ اور سورۃ مومنون کی آیت قَدْ اَفْلَحَ الْمُؤْمِنُوْنَ سے الَّذِیْنَ یَرِثُوْنَ الْفِرْدَوْسَ ھُمْ فِیْھَا خٰلِدُوْنَ تک۔ اور سورۃ احزاب کی آیت: إِنَّ الْمُسْلِمِينَ وَالْمُسْلِمَاتِ پوری آیت۔ اور سورۃ المعارج کی آیات الَّذِیْنَ ھُمْ عَلٰی صَلَاتِھِمْ دَآئِمُوْنَ سے وَ الَّذِیْنَ ھُمْ بِشَھٰدٰتِھِمْ قَآئِمُوْنَ یہ حصے، صرف سیدنا ابراہیم علیہ السلام کے حصے میں آیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4065]