سیدنا ابوہریرہ رضی اللہ عنہ فرماتے ہیں: سیدنا ابراہیم علیہ السلام نے 120 سال کی عمر میں اپنا ختنہ کیا جبکہ آپ کی وفات 200 سال کی عمر میں ہوئی۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4066]

سیدنا ابوہریرہ رضی اللہ عنہ فرماتے ہیں: سیدنا ابراہیم علیہ السلام نے 120 سال کے بعد ختنہ کیا پھر اس کے بعد آپ 80 سال تک زندہ رہے۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4067]

سیدنا علی رضی اللہ عنہ فرماتے ہیں: جب سیدنا ابراہیم علیہ السلام کو بیت اللہ کی تعمیر کا حکم دیا گیا تو ان کے ہمراہ سیدنا اسماعیل علیہ السلام اور سیدنا ہاجرہ رضی اللہ عنہا بھی نکلے۔ جب آپ مکۃ المکرمہ پہنچے تو آپ نے بیت اللہ کے مقام پر اپنے سر کے اوپر کی جانب ایک بادل سا دیکھا، اس میں سر کی سی کوئی چیز تھی۔ اس سے آواز آئی: اے ابراہیم! میرے سائے پر یا میرے سائے کی مقدار میں عمارت بنائیں اور اس سے کم یا زیادہ مت کرنا۔ جب آپ نے تعمیر مکمل کر لی تو وہاں سے باہر نکل آئے اور سیدنا اسماعیل علیہ السلام اور سیدنا ہاجرہ رضی اللہ عنہا کو وہیں چھوڑ دیا۔ اسی کے متعلق اللہ تعالیٰ نے فرمایا ہے: وَإِذْ بَوَّأْنَا لِإِبْرَاهِيمَ مَكَانَ الْبَيْتِ أَنْ لَا تُشْرِكْ بِي شَيْئًا وَطَهِّرْ بَيْتِيَ لِلطَّائِفِينَ وَالْقَائِمِينَ وَالرُّكَّعِ السُّجُودِ (الحج: 26) ” اور جب کہ ہم نے ابراہیم کو اس گھر کا ٹھکانا ٹھیک بتا دیا اور حکم دیا کہ میرا کوئی شریک نہ کر اور میرا گھر ستھرا رکھ طواف والوں اور اعتکاف والوں اور رکوع سجدے والوں کے لیے “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4068]

سیدنا عبداللہ بن عباس رضی اللہ عنہما فرماتے ہیں: سیدنا ابراہیم علیہ السلام تشریف لائے، اس وقت سیدنا اسماعیل علیہ السلام زم زم کے پیچھے مکان بنا رہے تھے۔ سیدنا ابراہیم علیہ السلام نے ان سے فرمایا: اے اسماعیل! تیرے رب نے مجھے (بیت اللہ) بنانے کا حکم دیا ہے۔ سیدنا اسماعیل نے جواباً کہا: اللہ تعالیٰ نے آپ کو جو حکم دیا ہے، آپ اس کی تعمیل فرمائیں۔ آپ نے فرمایا: اس سلسلہ میں تم میرے ساتھ تعاون کرو۔ چنانچہ سیدنا اسماعیل علیہ السلام بھی آپ کے ہمراہ ہو لئے۔ تو سیدنا ابراہیم علیہ السلام نے تعمیر شروع کر دی اور سیدنا اسماعیل علیہ السلام ان کو پتھر اٹھا اٹھا کر دے رہے تھے اور دونوں یہ دعا مانگ رہے تھے: رَبَّنَا تَقَبَّلْ مِنَّا اِنَّکَ اَنْتَ السَّمِیْعُ الْعَلِیْمُ (البقرۃ: 127) ” اے ہمارے رب ہماری طرف سے یہ (کوشش) قبول فرما، بے شک تو سننے والا ہے جاننے والا ہے “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4069]

سیدنا عبداللہ بن عباس رضی اللہ عنہما فرماتے ہیں: جب سیدنا ابراہیم علیہ السلام نے بیت اللہ کی تعمیر مکمل کر لی تو اللہ تعالیٰ نے ان کی جانب وحی فرمائی کہ لوگوں میں حج کا اعلان فرما دیجئے۔ تو سیدنا ابراہیم علیہ السلام نے یوں اعلان فرمایا: خبردار! تمہارے رب نے گھر بنایا ہے اور تمہیں حکم دیا ہے کہ تم اس کا حج کرو۔ تو جس جس درخت، پتھر، یا ٹیلے یا مٹی نے آپ کی آواز سنی سب نے جواباً کہا:” لَبَّیْکَ اَللّٰھُمَّ لَبَّیْکَ “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4070]

سیدنا عبداللہ بن عباس رضی اللہ عنہما فرماتے ہیں: اسلام کے 30 حصے ہیں اور اس دین میں جس جس کو بھی آزمایا گیا، ان میں سے صرف سیدنا ابراہیم علیہ السلام مکمل طور پر پورا اترے ہیں، اللہ تعالیٰ نے فرمایا: وَ اِبْرَاھِیْمَ الَّذِیْ وَفّٰی ” اور ابراہیم کے جو پورے احکام بجا لایا۔“ تو اللہ تعالیٰ نے ان کے لئے آگ سے برأت لکھ دی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4071]

سیدنا علی رضی اللہ عنہ فرماتے ہیں: ایک آدمی اپنے مشرک والدین کے لئے دعائے مغفرت کر رہا تھا۔ میں نے اس سے کہا: تو ان کے لئے دعائے مغفرت کر رہا ہے حالانکہ وہ مشرک تھے۔ اس نے کہا: سیدنا ابراہیم علیہ السلام نے بھی تو اپنے والدین کے لئے دعائے مغفرت کی تھی۔ میں نے یہ بات رسول اللہ صلی اللہ علیہ وسلم کی بارگاہ میں عرض کی تو اللہ تعالیٰ نے یہ آیت نازل فرمائی: وَ مَا کَانَ اسْتِغْفَارُ اِبْرَاھِیْمَ لِاَبِیْہِ اِلَّا عَنْ مَّوْعِدَۃٍ وَّعَدَھَآ اِیَّاہُ (التوبۃ: 114) ” اور ابراہیم کا اپنے باپ کی بخشش چاہنا وہ تو نہ تھا مگر ایک وعدے کے سبب جو اس سے کر چکا تھا “ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4072]

سیدنا عبداللہ بن عباس رضی اللہ عنہما فرماتے ہیں: سب سے پہلا شخص جس نے عربی زبان بولی اور اپنے الفاظ اور گفتگو کو لکھا اور اس کو متصل کر کے لکھا جیسے ” بِسْمِ اللّٰہِ الرَّحْمٰنِ الرَّحِیْمِ “ یہ سیدنا اسماعیل بن ابراہیم علیہ السلام ہیں۔ پھر ان کی اولاد نے ان میں فرق کر دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4073]

سیدنا عبداللہ رضی اللہ عنہ سے مروی ہے کہ نبی اکرم صلی اللہ علیہ وسلم نے ارشاد فرمایا: ہر نبی صلی اللہ علیہ وسلم کے انبیاء علیہم السلام میں سے کچھ دوست ہوتے ہیں اور ان میں سے میرے دوست اور مددگار میرے باپ سیدنا ابراہیم علیہ السلام ہیں۔ پھر آپ نے یہ آیت پڑھی: اِنَّ اَوْلَی النَّاسِ بِاِبْرَاھِیْمَ لَلَّذِیْنَ اتَّبَعُوْہُ (آل عمران: 68) ” بیشک سب لوگوں سے ابراہیم کے زیادہ حق دار وہ تھے جو ان کے پیرو ہوئے “ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4074]

سیدنا عبداللہ رضی اللہ عنہ سے مروی ہے کہ نبی اکرم صلی اللہ علیہ وسلم نے ارشاد فرمایا: ہر نبی علیہ السلام کے انبیاء علیہم السلام میں سے کچھ دوست ہوتے ہیں اور ان میں سے میرے دوست اور مددگار میرے باپ سیدنا ابراہیم علیہ السلام ہیں پھر آپ نے یہ آیت پڑھی: اِنَّ اَوْلَی النَّاسِ بِاِبْرَاھِیْمَ ٭٭ ابونعیم کی روایت کو جب واقدی کی روایت کے ہمراہ ملایا جائے تو یہ حدیث درجہ صحت کو پہنچ جاتی ہے کیونکہ اس میں مسروق کا ہونا ضروری ہے۔ [المستدرك على الصحيحين/كتاب: تواريخ المتقدمين من الأنبياء والمرسلين/حدیث: 4075]