سیدنا عبداللہ بن مسعود رضی اللہ عنہ سے روایت ہے، انہوں نے کہا: جب رسول اللہ صلی اللہ علیہ وسلم تبوک کی طرف روانہ ہوئے تو لوگ پیچھے رہنے لگے، صحابہ عرض کرتے: یا رسول اللہ! فلاں شخص پیچھے رہ گیا ہے، تو آپ صلی اللہ علیہ وسلم فرماتے: ”اسے چھوڑ دو، اگر اس میں کوئی خیر ہوئی تو اللہ اسے تم سے لا ملائے گا، اور اگر اس کے سوا کچھ ہوا تو اللہ نے تمہیں اس سے راحت دے دی ہے“، یہاں تک کہ عرض کیا گیا: یا رسول اللہ! ابو ذر پیچھے رہ گئے ہیں اور ان کے اونٹ نے انہیں سست کر دیا ہے، تو رسول اللہ صلی اللہ علیہ وسلم نے فرمایا: ”اسے چھوڑ دو، اگر اس میں کوئی خیر ہوئی تو اللہ اسے تم سے لا ملائے گا، اور اگر اس کے سوا کچھ ہوا تو اللہ نے تمہیں اس سے راحت دے دی ہے“، ادھر سیدنا ابو ذر رضی اللہ عنہ نے اپنے اونٹ کا تھوڑی دیر انتظار کیا مگر وہ سست رہا، جب تاخیر ہونے لگی تو انہوں نے اپنا سامان اٹھا کر اپنی پیٹھ پر لاد لیا اور پیدل ہی رسول اللہ صلی اللہ علیہ وسلم کے پیچھے چل پڑے، رسول اللہ صلی اللہ علیہ وسلم نے ایک جگہ پڑاؤ فرمایا ہوا تھا کہ ایک دیکھنے والے نے دیکھ کر کہا: یا رسول اللہ! یہ ایک شخص راستے پر پیدل چل رہا ہے، رسول اللہ صلی اللہ علیہ وسلم نے فرمایا: ”کاش یہ ابو ذر ہو“، جب لوگوں نے غور سے دیکھا تو پکار اٹھے: یا رسول اللہ! اللہ کی قسم یہ تو ابو ذر ہی ہیں! تب رسول اللہ صلی اللہ علیہ وسلم نے فرمایا: ”اللہ ابو ذر پر رحم فرمائے، وہ تنہا چلتا ہے، تنہا مرے گا اور تنہا ہی اٹھایا جائے گا“۔ پھر زمانہ گزرتا گیا اور سیدنا ابو ذر رضی اللہ عنہ کو مقامِ ربذہ کی طرف منتقل کر دیا گیا، جب ان کی وفات کا وقت قریب آیا تو انہوں نے اپنی اہلیہ اور غلام کو وصیت کی: جب میں مر جاؤں تو مجھے غسل دینا، کفن پہنانا اور پھر اٹھا کر شاہراہ کے کنارے رکھ دینا، اور جو پہلا قافلہ تمہارے پاس سے گزرے تو ان سے کہنا کہ یہ ابو ذر ہیں، جب ان کا انتقال ہوا تو انہوں نے ایسا ہی کیا، اچانک ایک قافلہ سامنے آیا تو انہیں خبر نہ ہوئی یہاں تک کہ ان کی سواریاں جنازے کے قریب پہنچ گئیں، اس قافلے میں اہل کوفہ کی ایک جماعت کے ساتھ سیدنا ابن مسعود رضی اللہ عنہ بھی تھے، انہوں نے پوچھا: یہ کیا ہے؟ بتایا گیا کہ یہ ابو ذر کا جنازہ ہے، اس پر سیدنا ابن مسعود رضی اللہ عنہ زار و قطار رونے لگے اور فرمایا: رسول اللہ صلی اللہ علیہ وسلم نے سچ فرمایا تھا کہ ”اللہ ابو ذر پر رحم فرمائے، وہ تنہا چلتا ہے، تنہا مرے گا اور تنہا ہی اٹھایا جائے گا“۔ پھر وہ سواری سے اترے اور خود ان کی تدفین کی ذمہ داری سنبھالی یہاں تک کہ انہیں دفن کر دیا، جب وہ مدینہ پہنچے تو امیر المؤمنین عثمان رضی اللہ عنہ کے سامنے سیدنا عبداللہ بن مسعود کا قول اور ان کی تدفین کا تذکرہ کیا گیا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب المغازي والسرايا/حدیث: 4421]

سیدنا عبداللہ بن عمر رضی اللہ عنہما سے مروی ہے، انہوں نے کہا: میں نے ان سے علی رضی اللہ عنہ کے متعلق پوچھا تو انہوں نے مجھے جھڑکا، پھر فرمایا: کیا میں تمہیں علی کے بارے میں نہ بتاؤں؟ یہ مسجد میں رسول اللہ صلی اللہ علیہ وسلم کا گھر ہے اور یہ علی رضی اللہ عنہ کا گھر ہے، رسول اللہ صلی اللہ علیہ وسلم نے ابوبکر اور عمر رضی اللہ عنہما کو سورہ براءت دے کر اہل مکہ کی طرف روانہ کیا، وہ چل پڑے تو انہوں نے ایک سوار کو دیکھا، انہوں نے پوچھا: یہ کون ہے؟ اس نے کہا: میں علی ہوں، علی نے کہا: اے ابوبکر! وہ تحریر (خط) لائیے جو آپ کے پاس ہے، ابوبکر نے پوچھا: اے علی! کیا میرے متعلق کچھ ہوا ہے؟ علی نے کہا: اللہ کی قسم! میں تو خیر ہی جانتا ہوں، پس علی رضی اللہ عنہ نے وہ تحریر لی اور اسے لے کر چلے گئے، جبکہ ابوبکر اور عمر رضی اللہ عنہما مدینہ واپس آ گئے اور عرض کی: یا رسول اللہ! ہمارے متعلق کیا حکم ہے؟ آپ صلی اللہ علیہ وسلم نے فرمایا: ”تمہارے لیے خیر ہی ہے، لیکن مجھے یہ کہا گیا ہے کہ تمہاری طرف سے (یہ پیغام) صرف تم خود یا تمہارا ہی کوئی آدمی پہنچائے گا۔“
یہ حدیث شاذ ہے اور اس کی کمزوری کا باعث جمیع بن عمیر اور اس کے بعد اسحاق بن بشر ہیں۔ [المستدرك على الصحيحين/كتاب المغازي والسرايا/حدیث: 4422]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے سیدنا ابوبکر رضی اللہ عنہ کو بھیجا اور انہیں ان کلمات کے ساتھ منادی کا حکم دیا، پھر ان کے پیچھے سیدنا علی رضی اللہ عنہ کو روانہ کیا، ابوبکر ابھی راستے ہی میں تھے کہ انہوں نے رسول اللہ صلی اللہ علیہ وسلم کی اونٹنی کے بلبلانے کی آواز سنی، وہ گھبرا کر نکلے کہ شاید رسول اللہ صلی اللہ علیہ وسلم تشریف لائے ہیں، مگر وہ علی تھے، علی رضی اللہ عنہ نے انہیں رسول اللہ صلی اللہ علیہ وسلم کی تحریر دی جس میں ابوبکر رضی اللہ عنہ کو امیرِ حج مقرر کیا گیا تھا اور علی رضی اللہ عنہ کو ان کلمات کی منادی کا حکم دیا گیا تھا، چنانچہ علی رضی اللہ عنہ نے ایامِ تشریق میں کھڑے ہو کر پکارا: ﴿أَنَّ اللَّهَ بَرِيءٌ مِنَ الْمُشْرِكِينَ وَرَسُولُهُ﴾ [سورة التوبة: 3] ”بے شک اللہ اور اس کا رسول مشرکوں سے بری الذمہ ہیں“، اور ﴿فَسِيحُوا فِي الْأَرْضِ أَرْبَعَةَ أَشْهُرٍ﴾ [سورة التوبة: 2] ”پس تم زمین میں چار مہینے تک چل پھر لو“، نیز یہ کہ اس سال کے بعد کوئی مشرک حج نہ کرے، کوئی برہنہ ہو کر بیت اللہ کا طواف نہ کرے اور جنت میں سوائے مؤمن کے کوئی داخل نہ ہوگا، علی رضی اللہ عنہ یہ منادی کرتے رہے اور جب ان کی آواز بیٹھ جاتی تو سیدنا ابوہریرہ رضی اللہ عنہ کھڑے ہو کر پکارتے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب المغازي والسرايا/حدیث: 4423]

زید بن یثیع سے روایت ہے، انہوں نے کہا: ہم نے سیدنا علی رضی اللہ عنہ سے پوچھا کہ آپ کو اس حج میں کس بات کے ساتھ بھیجا گیا تھا؟ انہوں نے فرمایا: مجھے چار باتوں کے ساتھ بھیجا گیا تھا: یہ کہ جنت میں صرف مؤمن ہی داخل ہوگا، کوئی برہنہ ہو کر بیت اللہ کا طواف نہیں کرے گا، اس سال کے بعد مؤمن اور کافر مسجد حرام میں جمع نہیں ہوں گے، اور جس کا نبی کریم صلی اللہ علیہ وسلم کے ساتھ کوئی عہد ہے تو وہ اس کی مدت تک برقرار رہے گا اور جس کا کوئی عہد نہیں اس کے لیے چار ماہ کی مہلت ہے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب المغازي والسرايا/حدیث: 4424]

سیدنا سلمہ بن نعیم بن مسعود اپنے والد سے روایت کرتے ہیں کہ میں نے رسول اللہ صلی اللہ علیہ وسلم کو اس وقت فرماتے سنا جب مسلیمہ کذاب کا قاصد اس کا خط لے کر حاضر ہوا، رسول اللہ صلی اللہ علیہ وسلم نے ان دونوں قاصدوں سے پوچھا: ”کیا تم دونوں بھی وہی کہتے ہو جو یہ (مسلیمہ) کہتا ہے؟“ انہوں نے کہا: جی ہاں، تو رسول اللہ صلی اللہ علیہ وسلم نے فرمایا: ”اللہ کی قسم! اگر یہ بات نہ ہوتی کہ قاصدوں کو قتل نہیں کیا جاتا تو میں تم دونوں کی گردنیں اڑا دیتا۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب المغازي والسرايا/حدیث: 4425]

قاسم بن عبدالرحمن اپنے والد سے روایت کرتے ہیں کہ ایک شخص سیدنا عبداللہ بن مسعود رضی اللہ عنہ کے پاس آیا اور عرض کی: اے ابوعبدالرحمن! یہاں کچھ لوگ مسلیمہ (کذاب) کی قرأت کے مطابق تلاوت کر رہے ہیں، عبداللہ نے فرمایا: کیا اسلام کے پھیل جانے کے بعد بھی اللہ کی کتاب کے سوا کوئی اور کتاب یا رسول اللہ کے سوا کوئی اور رسول ہو سکتا ہے؟ انہوں نے اسے واپس بھیج دیا، وہ شخص پھر آیا اور کہا: اے عبداللہ! اس ذات کی قسم جس کے سوا کوئی معبود نہیں، وہ اس گھر میں مسلیمہ کی قرأت پڑھ رہے ہیں اور ان کے پاس ایک مصحف بھی ہے جس میں مسلیمہ کا کلام لکھا ہوا ہے، یہ سیدنا عثمان رضی اللہ عنہ کا دورِ خلافت تھا، عبداللہ نے قرظہ سے کہا جو گھڑ سواروں کے سربراہ تھے: جاؤ اور اس گھر کا محاصرہ کر کے وہاں موجود لوگوں کو پکڑ لاؤ، انہوں نے ایسا ہی کیا اور اسی (80) آدمیوں کو لے کر آئے، عبداللہ نے ان سے کہا: تم پر افسوس ہے! کیا اللہ کی کتاب کے سوا کوئی اور کتاب یا رسول اللہ کے سوا کوئی اور رسول ہے؟ انہوں نے عرض کی: ہم اللہ سے توبہ کرتے ہیں، ہم نے اپنے اوپر ظلم کیا تھا، چنانچہ عبداللہ نے انہیں چھوڑ دیا اور ان سے قتال نہیں کیا بلکہ انہیں شام کی طرف جلاوطن کر دیا، سوائے ان کے سرغنہ ابن نواحہ کے جس نے توبہ کرنے سے انکار کر دیا، تب عبداللہ نے قرظہ سے کہا: جاؤ اس کی گردن اڑا دو اور اس کا سر اس کی ماں کی گود میں ڈال دو کیونکہ میرا خیال ہے کہ اس کی ماں اس کے اس کرتوت سے واقف تھی، پس انہوں نے ایسا ہی کیا، پھر عبداللہ نے حدیث بیان کرتے ہوئے فرمایا: یہ شخص (ابن نواحہ) اور ابن اثال، مسلیمہ کی طرف سے رسول اللہ صلی اللہ علیہ وسلم کے پاس قاصد بن کر آئے تھے، رسول اللہ صلی اللہ علیہ وسلم نے اس سے پوچھا تھا: ”کیا تم گواہی دیتے ہو کہ میں اللہ کا رسول ہوں؟“ اس نے پلٹ کر رسول اللہ صلی اللہ علیہ وسلم سے کہا: کیا آپ گواہی دیتے ہیں کہ مسلیمہ اللہ کا رسول ہے؟ تو رسول اللہ صلی اللہ علیہ وسلم نے فرمایا تھا: ”اگر تم قاصد نہ ہوتے تو میں تمہیں قتل کر دیتا“، پس اسی دن سے یہ سنت جاری ہو گئی کہ قاصد کو قتل نہیں کیا جاتا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب المغازي والسرايا/حدیث: 4426]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم کی ملاقات مسلیمہ (کذاب) سے ہوئی تو مسلیمہ نے آپ سے کہا: کیا آپ گواہی دیتے ہیں کہ میں اللہ کا رسول ہوں؟ رسول اللہ صلی اللہ علیہ وسلم نے فرمایا: ”میں اللہ اور اس کے رسولوں پر ایمان لایا“، پھر رسول اللہ صلی اللہ علیہ وسلم نے فرمایا: ”یہ وہ شخص ہے جو اپنی قوم کی ہلاکت کے لیے پیچھے چھوڑا گیا ہے“۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب المغازي والسرايا/حدیث: 4427]

سیدنا عبداللہ بن عباس رضی اللہ عنہما سے روایت ہے کہ بنو سعد بن بکر نے ضمام بن ثعلبہ کو رسول اللہ صلی اللہ علیہ وسلم کی خدمت میں بھیجا، وہ ہمارے پاس آئے اور اپنی اونٹنی مسجد کے دروازے پر بٹھا کر اسے باندھ دیا، پھر مسجد میں داخل ہوئے جہاں رسول اللہ صلی اللہ علیہ وسلم اپنے صحابہ کے ساتھ تشریف فرما تھے، انہوں نے پوچھا: تم میں سے ابن عبدالمطلب کون ہیں؟ رسول اللہ صلی اللہ علیہ وسلم نے فرمایا: ”میں ابن عبدالمطلب ہوں“، انہوں نے پوچھا: محمد؟ آپ نے فرمایا: ”ہاں“، انہوں نے کہا: اے محمد! میں آپ سے سوال کرنے والا ہوں اور سوال میں ذرا سختی کروں گا تو آپ اپنے دل میں مجھ سے ناراض نہ ہوئیے گا کیونکہ میں ذاتی طور پر اپنے دل میں کوئی برائی نہیں رکھتا، آپ نے فرمایا: ”جو تمہارے دل میں ہے پوچھو“، انہوں نے کہا: میں آپ کو اللہ کا واسطہ دے کر پوچھتا ہوں جو آپ کا الٰہ ہے، آپ سے پہلے والوں کا الٰہ ہے اور آپ کے بعد آنے والوں کا الٰہ ہے، کیا اللہ ہی نے آپ کو ہماری طرف رسول بنا کر بھیجا ہے؟ آپ صلی اللہ علیہ وسلم نے فرمایا: ”اے اللہ! ہاں“، انہوں نے کہا: میں آپ کو اللہ کا واسطہ دے کر پوچھتا ہوں جو آپ کا الٰہ ہے، آپ سے پہلے والوں کا الٰہ ہے اور آپ کے بعد آنے والوں کا الٰہ ہے، کیا اللہ نے آپ کو یہ حکم دیا ہے کہ ہم صرف اسی کی عبادت کریں، اس کے ساتھ کسی کو شریک نہ ٹھہرائیں اور ان بتوں اور شریکوں کو چھوڑ دیں جن کی ہمارے آباؤ اجداد عبادت کرتے تھے؟ آپ صلی اللہ علیہ وسلم نے فرمایا: ”اے اللہ! ہاں“، پھر انہوں نے اسلام کے فرائض کا ایک ایک کر کے ذکر کیا جن میں نماز، زکوٰۃ، روزہ اور حج شامل تھے، وہ ہر فریضے کے متعلق اسی طرح اللہ کا واسطہ دے کر پوچھتے جیسے پہلے پوچھا تھا، یہاں تک کہ جب وہ فارغ ہوئے تو کہا: میں گواہی دیتا ہوں کہ اللہ کے سوا کوئی معبود نہیں اور آپ اس کے بندے اور رسول ہیں، میں ان فرائض کو ادا کروں گا اور جن باتوں سے آپ نے مجھے روکا ہے ان سے بچوں گا، نہ ان میں اضافہ کروں گا اور نہ کمی، پھر وہ اپنی اونٹنی کی طرف واپس پلٹے تو رسول اللہ صلی اللہ علیہ وسلم نے ان کے پیٹھ پھیرتے ہی فرمایا: ”اگر اس دو چوٹیوں والے شخص نے سچ کہا ہے تو وہ ضرور جنت میں داخل ہوگا“، ضمام ایک مضبوط جسم والے اور گھنی داڑھی و دو چوٹیوں والے شخص تھے، پھر وہ اپنی اونٹنی کے پاس آئے، اس کی رسی کھولی اور اپنی قوم کے پاس پہنچ گئے، لوگ ان کے گرد جمع ہو گئے تو سب سے پہلے انہوں نے لات اور عزیٰ بتوں کو برا بھلا کہنا شروع کیا، لوگوں نے کہا: اے ضمام! رک جاؤ، ان کی بددعا سے، برص، جذام اور جنون سے ڈرو، انہوں نے کہا: تم پر افسوس ہے! اللہ کی قسم یہ بت نہ نقصان پہنچا سکتے ہیں اور نہ نفع، اللہ نے ایک رسول بھیجا ہے اور ان پر کتاب نازل کی ہے جس کے ذریعے اس نے تمہیں ان خرافات سے نجات دی ہے جن میں تم مبتلا تھے، اور میں گواہی دیتا ہوں کہ اللہ کے سوا کوئی معبود نہیں اور محمد صلی اللہ علیہ وسلم اس کے بندے اور رسول ہیں، میں تمہارے پاس ان کی طرف سے وہ احکامات لایا ہوں جن کا انہوں نے حکم دیا ہے اور وہ باتیں جن سے انہوں نے منع فرمایا ہے، پس اللہ کی قسم! اس دن شام ہونے سے پہلے ان کی بستی کا کوئی بھی مرد یا عورت ایسی نہ تھی جو مسلمان نہ ہو گئی ہو، سیدنا ابن عباس رضی اللہ عنہما فرماتے ہیں: ہم نے ضمام بن ثعلبہ سے بہتر اپنی قوم کی طرف جانے والا کوئی وفد نہیں سنا۔
شیخین نے مدینہ میں ضمام کی آمد کی روایت پر اتفاق کیا ہے لیکن ان میں سے کسی نے بھی اس حدیث کو اتنی تفصیل سے بیان نہیں کیا، اور یہ حدیث صحیح ہے۔ [المستدرك على الصحيحين/كتاب المغازي والسرايا/حدیث: 4428]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے مدینہ تشریف لانے کے دسویں سال حج کیا، اور آپ صلی اللہ علیہ وسلم نے حجِ افراد ادا فرمایا تھا۔ [المستدرك على الصحيحين/كتاب المغازي والسرايا/حدیث: 4429]

سفیان سے روایت ہے، انہوں نے کہا: نبی کریم صلی اللہ علیہ وسلم نے ہجرت سے پہلے کئی بار حج کیے اور ہجرت کے بعد صرف حجۃ الوداع ادا فرمایا، آپ صلی اللہ علیہ وسلم کی قربانی کے جانوروں کی کل تعداد سو اونٹ تھی جن میں ایک ایسا اونٹ بھی شامل تھا جس کی ناک میں چاندی کا چھلا پڑا ہوا تھا، نبی کریم صلی اللہ علیہ وسلم نے اپنے دستِ مبارک سے تریسٹھ اونٹ ذبح کیے اور باقی سیدنا علی رضی اللہ عنہ نے ذبح کیے۔ ثوری سے پوچھا گیا کہ یہ کس کی روایت ہے؟ انہوں نے کہا: جعفر بن محمد اپنے والد سے اور وہ سیدنا جابر رضی اللہ عنہ سے، اور ابن ابی لیلیٰ، حکم سے، وہ مقسم سے اور وہ سیدنا عبداللہ بن عباس رضی اللہ عنہما سے روایت کرتے ہیں۔
امام حاکم فرماتے ہیں: جہاں تک حجۃ الوداع کی تفسیر میں منقول احادیث کا تعلق ہے تو شیخین نے انہیں ان کی شرائط پر صحیح اسناد کے ساتھ روایت کرنے پر اتفاق کیا ہے، اور ان میں سب سے زیادہ صحیح اور مکمل جعفر بن محمد صادق کی اپنے والد کے واسطے سے سیدنا جابر رضی اللہ عنہ سے مروی حدیث ہے جسے امام مسلم نے انفرادی طور پر روایت کیا ہے۔ اللہ تعالیٰ کی مشیئت اور اس کی مدد سے اب ہم رسول اللہ صلی اللہ علیہ وسلم کے مرضِ وصال کی ابتدا کے ذکر تک پہنچ چکے ہیں۔ [المستدرك على الصحيحين/كتاب المغازي والسرايا/حدیث: 4430]