سیدنا ابوامامہ باہلی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اسلام کی رسی ایک ایک کر کے ٹوٹتی جائے گی، جب کبھی ایک رسی ٹوٹے گی، اس کا سارا بوجھ اس کے ساتھ والی پر آ جائے گا۔ سب سے پہلی رسی عدلیہ کی ٹوٹے گی اور سب سے آخری نماز۔ (یعنی اسلام اس وقت کمزور ہونا شروع ہو جائے گا جب جج کرپٹ ہو جائیں گے اور اسلام کی رسی کا آخری دھاگہ نماز ہے جب لوگ اس سے بھی لا پرواہ ہو جائیں گے تو ان کا اسلام سے کوئی تعلق نہیں رہے گا) ٭٭ امام حاکم کہتے ہیں: یہ عبدالعزیز، عبیداللہ بن حمزہ بن صہیب کا بیٹا ہے۔ اور اسماعیل جو ہے، وہ عبداللہ بن مہاجر کا بیٹا ہے۔ پوری اسناد صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7198]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے کسی ایسے شخص کو کسی جماعت کا امیر بنایا کہ اس جماعت میں اس سے بھی زیادہ اہلیت کا حامل شخص موجود ہو، اس نے اللہ اور اس کے رسول اور مومنین کے ساتھ خیانت کی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7199]

سیدنا یزید بن ابی سفیان فرماتے ہیں: سیدنا ابوبکر صدیق رضی اللہ عنہ نے جب مجھے شام کی جانب بھیجا تو فرمایا: اے یزید! بے شک تیری رشتہ داریاں ہیں، ہو سکتا ہے کہ تم ان کو امارت میں ترجیح دو، اس چیز کا مجھے تم پر بہت خوف ہے، کیونکہ رسول اللہ صلی اللہ علیہ وسلم نے ارشاد فرمایا ہے: جس کو مسلمانوں کے کسی کام کا ذمہ دار بنایا جائے، وہ محض اپنے تعلقات کی بناء پر کسی (نااہل) کو ان کا امیر بنا دے، اس پر اللہ تعالیٰ کی لعنت ہے، اللہ تعالیٰ اس کے فرائض و نوافل قبول نہیں کرتا اور اس کو دوزخ میں داخل کرے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7200]

سیدنا علی رضی اللہ عنہ فرماتے ہیں کہ رسول اللہ صلی اللہ علیہ وسلم نے مجھے یمن کا عامل بنا کر بھیجا، میں نے عرض کی: یا رسول اللہ صلی اللہ علیہ وسلم آپ مجھے ادھیڑ عمر کے لوگوں کا عامل بنا کر بھیج رہے ہیں جبکہ میں تو ابھی زیادہ عمر والا نہیں ہوں۔ آپ صلی اللہ علیہ وسلم نے فرمایا: جب تیرے پاس دو آدمی اپنا جھگڑا لے کر آئیں تو صرف ایک پارٹی کی بات سن کر فیصلہ نہیں کر دینا بلکہ جس طرح پہلے کی بات سنی ہے اسی طرح دوسرے کی بھی پوری بات سن کر پھر فیصلہ کرنا۔ سیدنا علی رضی اللہ عنہ فرماتے ہیں: میں آج تک قاضی ہوں۔ [المستدرك على الصحيحين/كتاب الأحكام/حدیث: 7201]

ابن ابی اوفیٰ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: بے شک اللہ تعالیٰ قاضی کے ساتھ ہوتا ہے جب تک کہ وہ ناانصافی نہ کرے، جب وہ ناانصافی کرتا ہے تب اللہ تعالیٰ اس سے اپنا ذمہ ختم کر دیتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس حدیث کے ایک راوی جو ابوالعوام ہیں، ان کا نام ” عمران بن داؤد “ ہے۔ [المستدرك على الصحيحين/كتاب الأحكام/حدیث: 7202]

رسول اللہ صلی اللہ علیہ وسلم کے صحابی سیدنا ابومریم فرماتے ہیں کہ رسول اللہ صلی اللہ علیہ وسلم نے ارشاد فرمایا: جس کو مسلمانوں کے کسی کام کا ذمہ دار بنایا جائے اور وہ ان کی رشتہ داریوں، ان کی ضروریات اور ان کے فقر و فاقہ کا خیال نہ رکھے، اللہ تعالیٰ قیامت کے دن اس کی دوستی، اس کی ضروریات اور اس کے فقر و فاقہ کا کوئی لحاظ نہیں کرے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس کی اسناد شامی ہے، صحیح ہے۔ بصریین کی اسناد کے ہمراہ اس کی ایک شاہد حدیث بھی موجود ہے جو کہ عمرو بن مرہ جہنی رضی اللہ عنہ نے رسول اللہ صلی اللہ علیہ وسلم سے روایت کی ہے۔ (وہ حدیث درج ذیل ہے) [المستدرك على الصحيحين/كتاب الأحكام/حدیث: 7203]

عمرو بن مرہ جہنی رضی اللہ عنہ فرماتے ہیں: میں نے سیدنا معاویہ بن ابی سفیان رضی اللہ عنہ سے کہا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ جس نے ضرورت مندوں، دوستوں اور مسکینوں پر اپنا دروازہ بند کر لیا، اللہ تعالیٰ اس کی دوستی، اس کی ضروریات اس کے فقر اور مسکنت سے آسمان کے دروازے بند کر لیتا ہے۔ [المستدرك على الصحيحين/كتاب الأحكام/حدیث: 7204]

مصعب بن ثابت بن عبداللہ بن زبیر اپنے والد کا یہ بیان نقل کرتے ہیں کہ ان کے والد عبداللہ بن زبیر رضی اللہ عنہ اور ان کے بھائی عمرو بن زبیر رضی اللہ عنہ کے درمیان کوئی ناراضگی تھی، سیدنا عبداللہ بن زبیر رضی اللہ عنہ سیدنا سعید بن العاص کے پاس گئے، اس وقت عمرو بن زبیر ان کے پاس چارپائی پر بیٹھے ہوئے تھے، سیدنا سعید نے عبداللہ سے کہا: یہاں (بیٹھ جایئے) عبداللہ نے انکار کر دیا اور کہا: رسول اللہ صلی اللہ علیہ وسلم کا فرمان بھی ہے اور آپ صلی اللہ علیہ وسلم کا طریقہ کار بھی ہے کہ فریقین حاکم کے سامنے بیٹھا کرتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7205]

سیدنا عبداللہ رضی اللہ عنہ فرماتے ہیں: جس سے فیصلہ کروایا جائے اس کو چاہیے کہ قرآن پاک کے مطابق فیصلہ کرے، اگر قرآن کریم میں اس کا فیصلہ نہ ملے تو رسول اللہ صلی اللہ علیہ وسلم کے کیے ہوئے فیصلوں کے مطابق فیصلہ کر دے، اور اگر رسول اللہ صلی اللہ علیہ وسلم کے فیصلوں میں بھی اس کا حل نہ ملے تو صالحین کے اقوال کی روشنی میں فیصلہ کرے، اور اگر صالحین کے اقوال میں بھی اس کا حل نہ ملے تو اپنی رائے سے اجتہاد کرے، اگر صحیح طرح اجتہاد بھی نہ کر سکے تو کسی قسم کی شرم و حیاء کئے بغیر اقرار کر لے (کہ میں یہ فیصلہ نہیں کر سکتا) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور قاسم، عبدالرحمن بن عبداللہ بن مسعود کے بیٹے ہیں۔ [المستدرك على الصحيحين/كتاب الأحكام/حدیث: 7206]

سیدنا ابوموسیٰ فرماتے ہیں: دو آدمیوں کے درمیان ایک اونٹ یا کسی اور جانور کے بارے میں جھگڑا ہو گیا، دونوں اس کے دعویدار تھے، اس کا فیصلہ نبی اکرم صلی اللہ علیہ وسلم کی بارگاہ میں پیش کیا گیا، ان میں سے کسی کے پاس بھی گواہ نہیں تھا، نبی اکرم صلی اللہ علیہ وسلم نے اس اونٹ میں دونوں کو برابر کے حصہ دار قرار دے دیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن دونوں نے اس کو نقل نہیں کیا۔ ہمام بن یحیی بن سعید بن ابی عروبہ نے اس حدیث کا متن کچھ مختلف بیان کیا ہے۔ (جیسا کہ درج ذیل ہے)۔ [المستدرك على الصحيحين/كتاب الأحكام/حدیث: 7207]