سیدنا ابوموسیٰ فرماتے ہیں: دو آدمیوں کے درمیان ایک اونٹ کے بارے میں جھگڑا ہو گیا، دونوں نے گواہ پیش کر دیئے، نبی اکرم صلی اللہ علیہ وسلم نے وہ اونٹ دونوں میں برابر برابر تقسیم کر دیا۔ ٭٭ یہ حدیث بھی امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن دونوں نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7208]

ام المومنین سیدہ ام سلمہ رضی اللہ عنہا بیان کرتی ہیں کہ دو آدمی نبی اکرم صلی اللہ علیہ وسلم کی بارگاہ میں آئے، ان کے درمیان وراثت کا کوئی جھگڑا تھا لیکن کسی کے پاس بھی گواہ نہیں تھے، نبی اکرم صلی اللہ علیہ وسلم نے ان کو حکم دیا کہ وہ آپس میں بھائی بندی کے طور پر تقسیم کر لیں، اپنے اپنے حصے نکال لیں اور دونوں میں سے ہر ایک، اپنے بھائی کے لئے اس کا حصہ حلال کر دے۔ ٭٭ ام سلمہ رضی اللہ عنہا کے غلام ” عبیداللہ بن ابی رافع “ ہیں، ان کی مرویات بخاری اور مسلم میں موجود ہیں۔ [المستدرك على الصحيحين/كتاب الأحكام/حدیث: 7209]

ام المومنین ام سلمہ رضی اللہ عنہا فرماتی ہیں: میں نبی اکرم صلی اللہ علیہ وسلم کے پاس موجود تھی، آپ صلی اللہ علیہ وسلم کے پاس دو آدمی آئے، وراثت کے سلسلے میں ان کے درمیان جھگڑا تھا، لیکن کسی کے پاس بھی گواہ نہیں تھے، ہر ایک کا موقف یہ تھا کہ یہ میرا حق ہے اور یہ میں نے فلاں سے لیا تھا۔ حضور صلی اللہ علیہ وسلم نے فرمایا: تم دونوں چلے جاؤ، برادرانہ طور پر حصے بناؤ، تقسیم کر لو اور تم میں سے ہر ایک اپنے بھائی کو اس کا حصہ حلال کر دے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7210]

سیدنا عبداللہ بن عباس رضی اللہ عنہما فرماتے ہیں: ایک آدمی نے کسی شخص پر اپنے حق کا دعویٰ کر دیا، وہ اپنا جھگڑا رسول اللہ صلی اللہ علیہ وسلم کی بارگاہ میں لے گئے، نبی اکرم صلی اللہ علیہ وسلم نے اس سے گواہ طلب کئے، اس نے کہا: میرے پاس تو کوئی گواہ نہیں ہے۔ آپ صلی اللہ علیہ وسلم نے دوسرے سے فرمایا: تم قسم کھاؤ، اس نے قسم کھا لی اور کہا: اللہ کی قسم! اس کا میرے ذمے کسی قسم کا کوئی حق نہیں ہے۔ رسول اللہ صلی اللہ علیہ وسلم نے فرمایا: اس کا حق تیرے پاس ہی ہے، تو اس کا حق اس کو ادا کر دے۔ پھر رسول اللہ صلی اللہ علیہ وسلم نے اس سے فرمایا: تیرا یہ گواہی دینا کہ اللہ تعالیٰ کے سوا کوئی عبادت کے لائق نہیں ہے، یہ تیری قسم کا کفارہ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7211]

سیدنا عبداللہ بن عمرو رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جب تم دیکھو کہ میری امت ظالم کو ” ظالم “ کہنے سے ڈر رہی ہے تو (سمجھ لو کہ دعاؤں کی قبولیت) ان سے رخصت ہو گئی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7212]

سیدنا زید بن ارقم رضی اللہ عنہ فرماتے ہیں: نبی اکرم صلی اللہ علیہ وسلم نے سیدنا علی رضی اللہ عنہ کو یمن کی جانب (قاضی بنا کر) بھیجا، آپ کی خدمت میں تین آدمیوں کا جھگڑا پیش کیا گیا۔ ایک بچے کے بارے میں تینوں کا دعویٰ تھا کہ وہ اس کا بیٹا ہے۔ آپ نے ان میں سے دو آدمیوں کو الگ کر کے پوچھا: کیا تم اس تیسرے آدمی کو سچا سمجھتے ہو؟ انہوں نے کہا: جی نہیں۔ آپ نے پھر (ان میں سے ایک آدمی لیا اور اس کے ساتھ تیسرے آدمی کو الگ کیا) ان سے بھی اسی طرح پوچھا، انہوں نے بھی انکار کر دیا۔ سیدنا علی رضی اللہ عنہ نے فرمایا: تم تینوں بدکردار شریک ہو، میں تمہارے درمیان قرعہ اندازی کروں گا، پھر سیدنا علی رضی اللہ عنہ نے ان کے درمیان قرعہ اندازی کی، جس کے نام قرعہ نکلا، بچہ اس کو دے دیا اور باقی دو دعویداروں کو اس سے دو تہائی دیت دلوائی۔ سیدنا زید بن ارقم فرماتے ہیں: اس بات کا ذکر رسول اللہ صلی اللہ علیہ وسلم کی بارگاہ میں کیا گیا، آپ (سیدنا علی رضی اللہ عنہ کے اس فیصلے پر خوش ہو کر) مسکرائے، اتنا مسکرائے کہ آپ کے دندان مبارک ظاہر ہو گئے۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے اجلح بن عبداللہ کندی کی روایات نقل نہیں کی ہیں۔ حالانکہ ان کی روایات میں کوئی متروک راوی نہیں ہے۔ [المستدرك على الصحيحين/كتاب الأحكام/حدیث: 7213]

سیدنا عبداللہ بن زبیر رضی اللہ عنہ فرماتے ہیں: زمعہ کی ایک لونڈی تھی، جس سے آپ وطی کیا کرتے تھے، اس لونڈی کے بارے میں گمان کیا جاتا تھا کہ کسی اور آدمی نے بھی اس سے وطی کی ہے۔ زمعہ کا وصال ہوا تو اس وقت وہ حاملہ تھی، اس کے ہاں بیٹا پیدا ہوا، اس کی شباہت اس آدمی جیسی تھی جس کے بارے میں گمان کیا جاتا تھا کہ اس نے اس لونڈی کے ساتھ وطی کی ہے، سیدہ سودہ رضی اللہ عنہا نے نبی اکرم صلی اللہ علیہ وسلم کی بارگاہ میں اس کا ذکر کیا تو آپ صلی اللہ علیہ وسلم نے فرمایا: وہ بچہ (زمعہ کا) وارث ہے۔ تم اس شخص سے پردہ کرو کیونکہ وہ تمہارا بھائی نہیں ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7214]

ابومیمونہ سلیمان اہل مدینہ میں سے ایک سچا آدمی ہے، وہ بیان کرتے ہیں کہ ایک دفعہ کا ذکر ہے کہ میں سیدنا ابوہریرہ رضی اللہ عنہ کے پاس بیٹھا ہوا تھا، ان کے پاس ایک ایرانی عورت آئی، اس کے پاس اس کا ایک بچہ بھی تھا، اس کا شوہر اس کو طلاق دے چکا تھا، عورت نے کہا: یا ابا ہریرہ، اس کے بعد اس نے عجمی زبان میں بات کرنا شروع کی (کہنے لگی) میرا شوہر میرا بیٹا لے جانا چاہتا ہے، ابومیمونہ کہتے ہیں: پھر اس کا شوہر آ گیا اور کہنے لگا: مجھے (میرے بچے سے) کون جدا کرے گا؟ سیدنا ابوہریرہ رضی اللہ عنہ نے کہا: میں رسول اللہ صلی اللہ علیہ وسلم کی بارگاہ میں موجود تھا، آپ کے پاس ایک عورت آئی اور کہنے لگی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، میرا شوہر میرے بیٹے کو لے جانا چاہتا ہے جبکہ ابوعتبہ کے کنویں سے میرا یہی بیٹا مجھے پانی بھر کر لا کر دیتا ہے اور دیگر بہت سارے کام بھی کرتا ہے۔ نبی اکرم صلی اللہ علیہ وسلم نے فرمایا: قرعہ اندازی کر لو، اس کے شوہر نے کہا: یا رسول اللہ صلی اللہ علیہ وسلم میرے بیٹے کو مجھ سے کون جدا کر سکتا ہے، نبی اکرم صلی اللہ علیہ وسلم نے فرمایا: اے لڑکے! یہ تیرا باپ ہے اور یہ تیری ماں ہے، تو جس کے ساتھ جانا چاہتا ہے، اس کا ہاتھ تھام لے۔ اس لڑکے نے ماں کا ہاتھ تھام لیا، چنانچہ وہ عورت لڑکا لے گئی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7215]

سیدنا عبادہ بن صامت رضی اللہ عنہ فرماتے ہیں کہ رسول اللہ صلی اللہ علیہ وسلم نے ایک باغ، دو باغ اور تین باغوں کا فیصلہ کیا۔ تین آدمی اپنے اپنے حقوق کے بارے میں جھگڑ رہے تھے، حضور صلی اللہ علیہ وسلم نے فیصلہ کیا کہ جس درخت باغ کے درخت کی شاخیں جہاں تک پہنچیں وہاں تک اسی باغ کی حدود ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأحكام/حدیث: 7216]

سیدنا سعید بن مسیب رضی اللہ عنہ سے مروی ہے کہ نبی اکرم صلی اللہ علیہ وسلم نے ارشاد فرمایا: چلتے ہوئے کنویں کی حدود پچاس ذراع ہے، اور نئے کنویں کی حدود بچیس ذراع ہے۔ [المستدرك على الصحيحين/كتاب الأحكام/حدیث: 7217]