سیدنا ابوبردہ اپنے والد (سیدنا ابوموسیٰ اشعری رضی اللہ عنہ) سے، وہ نبی کریم صلی اللہ علیہ وسلم سے ”اسی کی مثل روایت کرتے ہیں۔“ [سنن ابي داود/كتاب الجهاد /حدیث: 2657]

سیدنا براء رضی اللہ عنہ بیان کرتے ہیں کہ ”حنین کے دن جب نبی کریم صلی اللہ علیہ وسلم کا مشرکین کے ساتھ مقابلہ ہوا اور مسلمان آپ صلی اللہ علیہ وسلم کے پاس سے بھاگ گئے، تو آپ صلی اللہ علیہ وسلم اپنے خچر سے نیچے اتر کر پیدل ہو گئے۔“ [سنن ابي داود/كتاب الجهاد /حدیث: 2658]

سیدنا جابر بن عتیک رضی اللہ عنہ سے مروی ہے کہ اللہ کے نبی صلی اللہ علیہ وسلم فرمایا کرتے تھے: ”غیرت کے کچھ انداز اللہ تعالیٰ کو محبوب اور کچھ ناپسند ہیں، اللہ عزوجل کی پسندیدہ غیرت وہ ہے جو شبہ کی بنا پر ہو، مگر ایسی غیرت جو بغیر کسی شبہ کے ہو، اللہ تعالیٰ کو ناپسند ہے۔ اسی طرح بڑائی کا اظہار بھی کچھ ایسا ہے جو اللہ کو ناپسند ہے اور کچھ پسندیدہ ہے۔ پسندیدہ بڑائی کا اظہار وہ ہے جو قتال کے وقت مجاہد اپنے متعلق کرتا ہے یا صدقہ کرتے وقت ہو، اور بڑائی کا اظہار جو اللہ تعالیٰ کو ناپسند ہے وہ ہے جو ظلم اور تعدی میں ہو۔“ موسیٰ بن اسماعیل (شیخ ابوداؤد رضی اللہ عنہ) نے (ناپسندیدہ بڑائی کے اظہار میں) ”نسب میں فخر“ کا بھی ذکر کیا۔ [سنن ابي داود/كتاب الجهاد /حدیث: 2659]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے دس افراد کو بطور جاسوس روانہ کیا اور ان پر سیدنا عاصم بن ثابت رضی اللہ عنہ کو امیر مقرر کیا، تو قبیلہ ہذیل کے تقریباً ایک سو تیر انداز ان کے مقابلے میں آ گئے۔ جب عاصم رضی اللہ عنہ نے ان کو دیکھا تو یہ سب ایک ٹیلے کی اوٹ میں ہو گئے (مگر ان کافروں نے ان کو گھیر لیا) اور بولے: ”ہتھیار پھینک دو اور اپنے آپ کو ہمارے حوالے کر دو، ہم تم سے یہ عہد کرتے ہیں اور پختہ وعدہ ہے کہ تم میں سے کسی کو قتل نہ کریں گے۔“ عاصم رضی اللہ عنہ نے کہا: ”میں کسی کافر کے عہد میں نہیں آتا۔“ تو انہوں نے ان مجاہدین کو تیر مارے اور عاصم رضی اللہ عنہ سمیت سات افراد کو قتل کر دیا، اور تین افراد نے ان کافروں کا عہد و میثاق قبول کر لیا۔ یہ تھے خبیب رضی اللہ عنہ اور زید بن دثنہ رضی اللہ عنہ اور ایک اور آدمی (اس کا نام عبداللہ بن طارق بلوی آیا ہے)۔ جب ان کافروں نے ان کو پکڑ لیا تو انہوں نے ان کی کمانوں کی تانتیں کھولیں اور ان سے ان کو باندھ دیا۔ تیسرا آدمی کہنے لگا: ”یہ پہلا دھوکہ ہے، اللہ کی قسم! میں تمہارے ساتھ نہیں چلوں گا۔ میرے لیے میرے (قتل ہو جانے والے) ساتھی ہی نمونہ ہیں۔“ انہوں نے اس کو گھسیٹا مگر اس نے ان کے ساتھ چلنے سے انکار کر دیا تو انہوں نے اس کو قتل کر دیا۔ (اور خبیب رضی اللہ عنہ اور زید رضی اللہ عنہ کو انہوں نے مکہ لے جا کر بیچ دیا۔ سیدنا خبیب رضی اللہ عنہ کو حارث بن عامر کے بیٹوں نے خرید لیا) چنانچہ خبیب رضی اللہ عنہ (ان کے) قیدی ہو گئے حتیٰ کہ انہوں نے ان کو قتل کرنے کا فیصلہ کر لیا۔ (متعینہ تاریخ سے پہلے) خبیب رضی اللہ عنہ نے ان سے استرا طلب کیا تاکہ زیر ناف بال صاف کر سکیں، جب وہ ان کو قتل کرنے کے لیے چلے، تو خبیب رضی اللہ عنہ نے کہا: ”مجھے مہلت دو میں دو رکعت ادا کر لوں۔“ پھر کہا: ”قسم اللہ کی! اگر مجھے یہ شبہ نہ ہوتا کہ تم لوگ سمجھو گے کہ ڈر کے مارے نماز پڑھ رہا ہوں تو میں اور زیادہ پڑھتا۔“ [سنن ابي داود/كتاب الجهاد /حدیث: 2660]

ابن عوف کی سند ہے کہ زہری نے کہا: ”مجھے عمرو بن ابی سفیان بن اسید بن جاریہ ثقفی نے بیان کیا اور یہ بنی زہرہ کے حلیف اور سیدنا ابوہریرہ رضی اللہ عنہ کے شاگردوں میں سے تھے“ اور حدیث بیان کی۔ [سنن ابي داود/كتاب الجهاد /حدیث: 2661]

سیدنا براء بن عازب رضی اللہ عنہ بیان کرتے ہیں کہ رسول اللہ صلی اللہ علیہ وسلم نے احد والے دن تیر اندازوں کے جتھے پر سیدنا عبداللہ بن جبیر رضی اللہ عنہ کو امیر مقرر کیا، ان لوگوں کی تعداد پچاس تھی اور ان سے فرمایا تھا: ”اگر تم دیکھو کہ پرندے ہمیں اچک رہے ہیں، تب بھی تم یہ جگہ نہ چھوڑنا حتیٰ کہ میں تمہیں کوئی پیغام بھیجوں۔ اور اگر تم دیکھو کہ ہم نے کافروں کو شکست دے دی ہے اور ہم ان کو روند رہے ہیں، تب بھی تم یہیں رہنا حتیٰ کہ میں تمہیں بلواؤں۔“ بیان کرتے ہیں کہ اللہ تعالیٰ نے کافروں کو شکست سے دوچار کر دیا۔ قسم اللہ کی! میں نے دیکھا ان کی عورتیں (پناہ کے لیے) پہاڑ پر چڑھ رہی تھیں۔ تو عبداللہ بن جبیر رضی اللہ عنہ کے (تیر انداز) ساتھیوں نے کہا: ”غنیمت! اے قوم غنیمت! تمہارے ساتھی غالب آ گئے ہیں، تم کیا دیکھ رہے ہو؟“ عبداللہ بن جبیر رضی اللہ عنہ نے کہا: ”کیا تم بھول گئے ہو کہ رسول اللہ صلی اللہ علیہ وسلم نے تم سے کیا فرمایا تھا؟“ انہوں نے کہا: ”قسم اللہ کی! ہم تو لوگوں کے ساتھ مل کر غنیمت جمع کریں گے۔“ چنانچہ وہ چلے آئے، تو ان کے منہ پھیر دیے گئے اور شکست سے دوچار ہوئے۔ [سنن ابي داود/كتاب الجهاد /حدیث: 2662]

سیدنا حمزہ بن ابی اسید رحمہ اللہ اپنے والد (ابواسید مالک بن ربیعہ انصاری رضی اللہ عنہ) سے روایت کرتے ہیں، انہوں نے کہا کہ جب ہم نے بدر میں صفیں بنا لیں تو رسول اللہ صلی اللہ علیہ وسلم نے فرمایا: ”جب وہ تمہارے قریب ہوں (تمہاری زد میں آ جائیں) تو تیر مارنا اور اپنے تیروں کو محفوظ رکھنا۔“ (بلا ضرورت تیر نہ چلانا، تاکہ تیر محفوظ رہیں)۔ [سنن ابي داود/كتاب الجهاد /حدیث: 2663]

سیدنا مالک بن حمزہ ابی اسید الساعدی اپنے والد سے، وہ اپنے دادا (ابو اسید مالک بن ربیعہ انصاری رضی اللہ عنہ) سے روایت کرتے ہیں کہ نبی کریم صلی اللہ علیہ وسلم نے بدر والے دن فرمایا: ”جب وہ تمہارے قریب آ جائیں (اور تمہاری زد میں ہوں) تب ان پر تیر مارنا اور تلوار بھی اسی وقت سونتنا جب وہ تم پر چھا جائیں۔“ (اور تلوار کی مار پر ہوں)۔ [سنن ابي داود/كتاب الجهاد /حدیث: 2664]

سیدنا علی رضی اللہ عنہ بیان کرتے ہیں کہ (جنگ بدر میں) عتبہ بن ربیعہ سامنے آیا اور اس کے پیچھے اس کا بیٹا اور بھائی بھی آ گئے تو اس نے للکارا: ”کون ہے جو مقابلے میں آئے؟“ اس پر انصاری جوان سامنے آئے۔ اس نے پوچھا: ”تم کون ہو؟“ تو انہوں نے اس کو بتا دیا (کہ ہم انصاری جوان ہیں) اس نے کہا: ”ہمیں تم سے کوئی مطلب نہیں۔ ہم اپنے چچا زاد چاہتے ہیں۔“ تو نبی کریم صلی اللہ علیہ وسلم نے فرمایا: ”اٹھو، اے حمزہ! اٹھو، اے علی! اٹھو، اے عبیدہ بن حارث!“ چنانچہ حمزہ رضی اللہ عنہ عتبہ کے مقابل ہوئے اور میں (علی رضی اللہ عنہ) شیبہ کے سامنے آیا۔ عبیدہ رضی اللہ عنہ اور ولید کے درمیان دو دو واروں کا مقابلہ ہوا اور ہر ایک کو ایک دوسرے سے چوٹیں لگیں (اور زخمی ہوئے) پھر ہم دونوں ولید پر چڑھ دوڑے اور اس کو قتل کر ڈالا اور عبیدہ رضی اللہ عنہ کو اٹھا لائے۔ [سنن ابي داود/كتاب الجهاد /حدیث: 2665]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”قتل کرنے کے معاملے میں سب سے اچھے لوگ اہل ایمان ہوتے ہیں۔“ (وہ مقتول کے ناک کان وغیرہ نہیں کاٹتے)۔ [سنن ابي داود/كتاب الجهاد /حدیث: 2666]