سیدنا ایاس بن سلمہ اپنے والد (سلمہ بن اکوع رضی اللہ عنہ) سے روایت کرتے ہیں، کہتے ہیں کہ ہم سیدنا ابوبکر رضی اللہ عنہ کے ساتھ (جہاد کے لیے) روانہ ہوئے، رسول اللہ صلی اللہ علیہ وسلم نے ان کو ہمارا امیر بنایا تھا، ہم نے بنو فزارہ کے ساتھ جہاد کیا اور ہر طرف سے ان پر چڑھائی کی۔ میں نے لوگوں کی ایک جماعت دیکھی، ان میں بچے تھے اور عورتیں بھی۔ میں نے ایک تیر مارا جو ان کے اور پہاڑ کے درمیان جا گرا تو وہ اٹھ کھڑے ہوئے، میں انہیں سیدنا ابوبکر رضی اللہ عنہ کے پاس لے آیا۔ ان میں فزارہ کی ایک عورت تھی جس نے ایک پرانی کھال اوڑھی ہوئی تھی، اس کے ساتھ اس کی بیٹی بھی تھی جو عرب کی حسین ترین لڑکیوں میں سے تھی۔ سیدنا ابوبکر رضی اللہ عنہ نے وہ لڑکی بطور نفلِ غنیمت مجھے دے دی۔ میں مدینہ آیا اور رسول اللہ صلی اللہ علیہ وسلم مجھے ملے اور فرمایا: ”اے سلمہ! وہ عورت مجھے ہبہ کر دے۔“ میں نے عرض کیا: ”قسم اللہ کی! وہ تو مجھے بہت پسند آئی ہے اور میں نے اس کا کپڑا بھی نہیں اٹھایا۔“ پس آپ صلی اللہ علیہ وسلم خاموش رہے۔ جب اگلا دن ہوا، رسول اللہ صلی اللہ علیہ وسلم مجھے بازار میں ملے اور فرمایا: ”اے سلمہ! عورت مجھے ہبہ کر دے، تیرے باپ کی بھلائی ہو۔“ میں نے عرض کیا: ”اے اللہ کے رسول! میں نے اس کا کپڑا تک نہیں اٹھایا، مگر وہ آپ کی ہوئی۔“ چنانچہ آپ صلی اللہ علیہ وسلم نے اسے اہل مکہ کی طرف بھیج دیا جبکہ کچھ مسلمان قیدی ان کے قبضے میں تھے، تو اس عورت کو بطور فدیہ ان کو دے دیا۔ [سنن ابي داود/كتاب الجهاد /حدیث: 2697]

سیدنا ابن عمر رضی اللہ عنہ سے روایت ہے کہ ”ان کا ایک غلام بھاگ کر دشمنوں کے پاس چلا گیا، پھر مسلمان ان لوگوں پر غالب آ گئے تو رسول اللہ صلی اللہ علیہ وسلم نے وہ غلام ابن عمر رضی اللہ عنہ کو واپس کر دیا اور (بطور غنیمت) تقسیم نہیں فرمایا۔“ امام ابوداؤد رحمہ اللہ فرماتے ہیں کہ ”(یحییٰ بن ابی زائدہ کے علاوہ) کسی دوسرے نے کہا کہ خالد بن ولید رضی اللہ عنہ نے اسے واپس کیا تھا۔“ [سنن ابي داود/كتاب الجهاد /حدیث: 2698]

(محمد بن سلیمان الانباری کی سند سے مروی ہے) سیدنا ابن عمر رضی اللہ عنہ بیان کرتے ہیں کہ ”ان کا ایک گھوڑا بھاگ گیا تو دشمن نے اسے پکڑ لیا، پھر مسلمان ان پر غالب آ گئے تو وہ گھوڑا رسول اللہ صلی اللہ علیہ وسلم کے زمانے میں ابن عمر رضی اللہ عنہ کو واپس دے دیا گیا۔“ (ایک اور موقع پر) ”سیدنا ابن عمر رضی اللہ عنہ کا ایک غلام بھاگ گیا اور رومیوں کے علاقے میں چلا گیا، مسلمان ان پر غالب آئے سیدنا خالد بن ولید رضی اللہ عنہ نے یہ ان کو واپس کر دیا اور نبی کریم صلی اللہ علیہ وسلم کے بعد کا واقعہ ہے۔“ [سنن ابي داود/كتاب الجهاد /حدیث: 2699]

سیدنا علی بن ابی طالب رضی اللہ عنہ سے روایت ہے کہ حدیبیہ کے روز صلح سے پہلے کچھ غلام بھاگ کر رسول اللہ صلی اللہ علیہ وسلم کے پاس آ گئے تو ان کے مالکوں نے آپ صلی اللہ علیہ وسلم کو لکھا: ”اے محمد صلی اللہ علیہ وسلم ! قسم اللہ کی! یہ لوگ تمہارے دین کے شوق میں تمہارے پاس نہیں آئے ہیں، بلکہ غلامی سے بھاگ کر آئے ہیں۔“ صحابہ میں سے کچھ نے کہا: ”اے اللہ کے رسول صلی اللہ علیہ وسلم ! انہوں نے سچ کہا ہے، آپ انہیں ان کو واپس لوٹا دیں۔“ تو رسول اللہ صلی اللہ علیہ وسلم غصے ہوئے اور فرمایا: ”اے قریشیو! میں سمجھتا ہوں کہ تم لوگ اس وقت تک باز نہیں آؤ گے جب تک کہ اللہ تم پر کسی ایسے کو نہ بھیج دے جو تمہاری اس (ہٹ دھرمی) پر تمہاری گردنیں مار دے۔“ اور آپ نے ان کو واپس کرنے سے انکار کر دیا اور فرمایا: ”یہ اللہ عزوجل کے آزاد کردہ لوگ ہیں۔“ [سنن ابي داود/كتاب الجهاد /حدیث: 2700]

سیدنا ابن عمر رضی اللہ عنہ سے مروی ہے کہ ”رسول اللہ صلی اللہ علیہ وسلم کے زمانے میں ایک لشکر کو غلہ اور شہد بطور غنیمت ملا، تو اس میں سے خمس نہیں لیا گیا تھا۔“ [سنن ابي داود/كتاب الجهاد /حدیث: 2701]

سیدنا عبداللہ بن مغفل رضی اللہ عنہ کا بیان ہے کہ خیبر کے روز چربی سے بھرا ایک تھیلا اوپر سے لڑھکایا گیا۔ میں نے آگے بڑھ کر اسے جھپٹ لیا، پھر میں نے کہا: ”آج میں اس میں سے کسی کو کچھ نہیں دوں گا۔“ میں نے گردن موڑی تو دیکھا کہ رسول اللہ صلی اللہ علیہ وسلم میری جانب (دیکھ کر) مسکرا رہے تھے۔ [سنن ابي داود/كتاب الجهاد /حدیث: 2702]

ابو لبید بیان کرتے ہیں کہ ہم سیدنا عبدالرحمٰن بن سمرہ رضی اللہ عنہ کی معیت میں کابل میں تھے۔ لوگوں کو غنیمت ملی تو ہر ایک نے اسے لوٹ لیا۔ پس انہوں نے خطبہ دیا اور فرمایا: ”میں نے رسول اللہ صلی اللہ علیہ وسلم سے سنا ہے کہ آپ صلی اللہ علیہ وسلم نے لوٹ سے منع کیا ہے۔“ چنانچہ ان لوگوں نے جو کچھ لیا تھا سب واپس کر دیا۔ پھر عبدالرحمٰن رضی اللہ عنہ نے اسے ان میں تقسیم کر دیا۔ [سنن ابي داود/كتاب الجهاد /حدیث: 2703]

محمد بن ابی مجالد نے سیدنا عبداللہ بن ابی اوفی رضی اللہ عنہ سے پوچھا: ”کیا آپ لوگ رسول اللہ صلی اللہ علیہ وسلم کے دور میں کھانے پینے کی اشیا میں سے خمس نکالا کرتے تھے؟“ انہوں نے کہا: ”ہمیں خیبر کے روز غلہ ملا تو ضرورت مند آتا اور جس قدر اسے ضرورت ہوتی لے کر چلا جاتا۔“ [سنن ابي داود/كتاب الجهاد /حدیث: 2704]

ایک انصاری صحابی رضی اللہ عنہ نے کہا: ”ہم لوگ ایک سفر میں رسول اللہ صلی اللہ علیہ وسلم کے ساتھ روانہ ہوئے۔ لوگوں کو انتہائی احتیاج اور بڑی مشقت کا سامنا کرنا پڑا۔ انہیں بکریاں مل گئیں جو انہوں نے لوٹ لیں (اور تقسیم نہ کیں) ہمارے دیگچے ابل رہے تھے (گوشت پک رہا تھا) کہ رسول اللہ صلی اللہ علیہ وسلم اپنی قوس کے سہارے چلتے ہوئے تشریف لائے اور ہمارے دیگچوں کو اپنی قوس سے الٹ دیا اور گوشت کو مٹی میں لتھیڑنے لگے اور فرمایا: ”لوٹ کا مال مردار سے زیادہ حلال نہیں۔“ یا یوں فرمایا: ”مردار کا گوشت لوٹ کے مال سے زیادہ حلال نہیں۔“ یہ شک ہناد کو ہوا ہے۔“ [سنن ابي داود/كتاب الجهاد /حدیث: 2705]

اصحابِ نبی کریم صلی اللہ علیہ وسلم میں سے ایک صحابی کا بیان ہے، انہوں نے کہا: ”جہاد کے دوران میں ہم اونٹ ذبح کر کے کھاتے اور (باقاعدہ) تقسیم نہ کرتے حتیٰ کہ جب ہم واپس لوٹتے ہمارے تھیلے اس گوشت سے بھرے ہوئے ہوتے تھے۔“ [سنن ابي داود/كتاب الجهاد /حدیث: 2706]