سیدنا ابوقتادہ رضی اللہ عنہ بیان کرتے ہیں کہ ہم رسول اللہ صلی اللہ علیہ وسلم کی معیت میں حنین کی طرف روانہ ہوئے۔ جب کفار کے مقابلے میں آئے، تو مسلمانوں میں بہت گڑبڑ مچی۔ میں نے ایک کافر کو دیکھا کہ وہ ایک مسلمان پر چڑھائی کر رہا تھا۔ میں گھوم کر اس کے پیچھے سے آیا اور اس کی گردن کے پاس تلوار ماری، تو وہ میری طرف آیا اور مجھے (پکڑ کر) اس قدر بھینچا کہ میں نے اس سے موت کی بو پائی۔ پھر اسے موت آ گئی اور اس نے مجھے چھوڑ دیا۔ میں سیدنا عمر بن خطاب رضی اللہ عنہ سے ملا اور ان سے کہا: ”لوگوں کو کیا ہو گیا ہے؟ (کہ بھاگ کھڑے ہوئے ہیں)“ انہوں نے کہا: ”بس یہ اللہ کا کرنا ہے۔“ پھر لوگ لوٹ آئے۔ رسول اللہ صلی اللہ علیہ وسلم بیٹھے اور فرمایا: ”جس نے کسی کو قتل کیا ہو اور اس کا گواہ بھی ہو تو اس مقتول کا اسباب اسی کا ہے۔“ (ابوقتادہ رضی اللہ عنہ) کہتے ہیں: ”میں کھڑا ہوا اور کہا: کوئی ہے جو میری گواہی دے؟“ پھر میں بیٹھ گیا۔ رسول اللہ صلی اللہ علیہ وسلم نے دوسری بار یہی بات فرمائی کہ ”جس نے کسی کو قتل کیا ہو اور اس کا گواہ بھی ہو تو اس کا اسباب اسی کا ہے۔“ کہتے ہیں کہ میں پھر اٹھا اور کہا: ”میرے متعلق گواہی کون دیتا ہے؟“ پھر میں بیٹھ گیا۔ آپ صلی اللہ علیہ وسلم نے تیسری بار فرمایا، تو میں کھڑا ہوا، پس رسول اللہ صلی اللہ علیہ وسلم نے دریافت فرمایا: ”ابوقتادہ! کیا بات ہے؟“ میں نے اپنا قصہ بیان کیا۔ تو جماعت میں سے ایک آدمی نے کہا: ”اے اللہ کے رسول! یہ سچ کہتا ہے اور اس مقتول کا اسباب میرے پاس ہے۔ آپ اسے اس کے بارے میں راضی فرما دیجیے۔“ سیدنا ابوبکر صدیق رضی اللہ عنہ نے کہا: ”نہیں، قسم اللہ کی! (یہ نہیں ہو سکتا) کہ وہ اللہ کے شیروں میں سے ایک شیر کا قصد کرے جو اللہ اور اس کے رسول کی طرف سے لڑ رہا ہو، اور آپ اس کا سلب (اسباب) تجھے دے دیں؟“ رسول اللہ صلی اللہ علیہ وسلم نے فرمایا: ”(ابوبکر نے) سچ کہا: وہ اسباب اسے دے دو۔“ ابوقتادہ رضی اللہ عنہ بیان کرتے ہیں: ”چنانچہ وہ اس نے مجھے دے دیا۔ پھر میں نے زرہ بیچی تو اس سے بنی سلمہ میں ایک باغ خریدا، اور وہ میری پہلی جائیداد تھی جو میں نے اسلام لانے کے بعد حاصل کی۔“ [سنن ابي داود/كتاب الجهاد /حدیث: 2717]

سیدنا انس بن مالک رضی اللہ عنہ بیان کرتے ہیں کہ رسول اللہ صلی اللہ علیہ وسلم نے حنین والے دن فرمایا تھا: ”جس نے کسی کافر کو قتل کیا ہو تو اس کا سلب (اسباب) اسی قاتل کا ہے۔“ چنانچہ ابوطلحہ رضی اللہ عنہ نے اسی دن بیس آدمیوں کو قتل کیا اور ان کا سلب بھی حاصل کیا۔ ابوطلحہ رضی اللہ عنہ (اپنی بیوی) ام سلیم رضی اللہ عنہا سے ملے جبکہ ان کے (ام سلیم رضی اللہ عنہا) کے پاس خنجر تھا، تو پوچھا: ”اے ام سلیم! یہ تیرے پاس کیا ہے؟“ کہنے لگیں: ”اللہ کی قسم! میرا ارادہ یہ ہے کہ ان کافروں میں سے کوئی میرے قریب آیا تو میں اس سے اس کا پیٹ چیر دوں گی۔“ پھر ابوطلحہ رضی اللہ عنہ نے یہ بات رسول اللہ صلی اللہ علیہ وسلم کو بھی بتائی۔ امام ابوداؤد رحمہ اللہ کہتے ہیں: ”یہ حدیث حسن ہے۔“ امام ابوداؤد رحمہ اللہ نے کہا: ”اور اس حدیث کے بیان سے ہمارا مقصد خنجر کے متعلق بتانا ہے (کہ بطور اسلحہ اس کا استعمال جائز ہے) کہ ان دنوں عجمی لوگ ہی اسے استعمال کرتے تھے۔“ [سنن ابي داود/كتاب الجهاد /حدیث: 2718]

سیدنا عوف بن مالک اشجعی رضی اللہ عنہ بیان کرتے ہیں کہ میں سیدنا زید بن حارثہ رضی اللہ عنہ کے ساتھ غزوہ موتہ میں روانہ ہوا۔ اہل یمن سے جو کمک ہمیں ملی ان میں سے ایک شخص میرے ساتھ ہو لیا۔ اس کے پاس سوائے ایک تلوار کے اور کچھ نہ تھا۔ مسلمانوں کے ایک آدمی نے اونٹ ذبح کیا، تو اس آدمی نے ذبح کرنے والے سے کھال کا ایک حصہ مانگا جو اس نے اس کو دے دیا۔ پس اس نے اس کو ڈھال کی طرح بنا لیا اور پھر ہم چلتے رہے۔ ہمیں رومی جماعتوں کا مقابلہ کرنا پڑا۔ ان میں ایک آدمی اپنے سرخ گھوڑے پر سوار تھا جس کی زین اور ہتھیار سنہری تھے۔ وہ رومی مسلمانوں پر بڑے سخت حملے کر رہا تھا۔ تو یمن کی کمک والا یہ آدمی ایک چٹان کی اوٹ میں اس رومی کی تاک میں بیٹھ گیا۔ جب وہ اس کے پاس سے گزرا تو اس یمنی نے اس کے گھوڑے کی ٹانگیں کاٹ ڈالیں تو وہ (رومی) گر پڑا اور یہ (یمنی) خود اس آدمی پر چڑھ بیٹھا اور اسے قتل کر دیا اور اس کا گھوڑا اور اسلحہ لے لیا۔ اور جب اللہ عزوجل نے مسلمانوں کو فتح دی تو سیدنا خالد بن ولید رضی اللہ عنہ نے اس یمنی کو بلوایا اور اس کے اسباب میں سے کچھ لے لیا۔ سیدنا عوف رضی اللہ عنہ کہتے ہیں کہ میں ان کے پاس گیا اور کہا: ”اے خالد! کیا آپ کو معلوم نہیں کہ رسول اللہ صلی اللہ علیہ وسلم کا فیصلہ ہے کہ سلب قاتل کا ہوتا ہے؟“ انہوں نے کہا: ”ہاں، لیکن میں اسے بہت زیادہ سمجھتا ہوں۔“ میں نے کہا: ”یا تو آپ اسے واپس کر دیں ورنہ میں آپ کی یہ بات رسول اللہ صلی اللہ علیہ وسلم کو بتاؤں گا“، مگر انہوں نے اس کو واپس کرنے سے انکار کر دیا۔ سیدنا عوف رضی اللہ عنہ کہتے ہیں پھر ہم رسول اللہ صلی اللہ علیہ وسلم کے ہاں جمع ہوئے، تو میں نے آپ صلی اللہ علیہ وسلم سے اس یمنی کا قصہ بیان کیا اور وہ بھی جو خالد رضی اللہ عنہ نے کیا تھا۔ تو رسول اللہ صلی اللہ علیہ وسلم نے فرمایا: ”خالد! اس کی کیا وجہ تھی جو تم نے کیا؟“ انہوں نے کہا: ”اے اللہ کے رسول! میں نے اس سلب کو بہت زیادہ سمجھا تھا۔“ آپ صلی اللہ علیہ وسلم نے فرمایا: ”تم نے جو کچھ اس سے لیا وہ اس کو واپس کر دو۔“ عوف رضی اللہ عنہ کہتے ہیں میں نے خالد رضی اللہ عنہ سے کہا: ”خالد! لو اب میں نے جو بات کہی تھی پوری کر دی؟“ رسول اللہ صلی اللہ علیہ وسلم نے پوچھا: ”وہ کیا بات تھی؟“ میں نے انہیں بتا دی، تو رسول اللہ صلی اللہ علیہ وسلم غصے ہو گئے اور فرمایا: ”خالد! وہ مت واپس کرو، کیا تم لوگ میری خاطر میرے امراء سے کوئی رعایت نہیں کر سکتے؟ (یہ کیسے ہو سکتا ہے کہ) ان کے معاملات کی عمدگی اور بھلائی تو تمہارے لیے ہو اور اس کی خرابی کے وہ ہی ذمہ دار ہوں۔“ [سنن ابي داود/كتاب الجهاد /حدیث: 2719]

عبدالرحمٰن بن جبیر بن نفیر اپنے والد سے، وہ سیدنا عوف بن مالک اشجعی رضی اللہ عنہ سے ”اس حدیث کی مانند“ روایت کرتے ہیں۔ [سنن ابي داود/كتاب الجهاد /حدیث: 2720]

سیدنا عوف بن مالک اشجعی اور خالد بن ولید رضی اللہ عنہما بیان کرتے ہیں کہ رسول اللہ صلی اللہ علیہ وسلم نے سلب کے متعلق فیصلہ فرمایا کہ ”یہ قاتل کا حق ہے اور اس میں سے خمس نہیں نکالا۔“ [سنن ابي داود/كتاب الجهاد /حدیث: 2721]

سیدنا عبداللہ بن مسعود رضی اللہ عنہ بیان کرتے ہیں کہ ”رسول اللہ صلی اللہ علیہ وسلم نے بدر کے روز مجھے ابوجہل کی تلوار عنایت فرمائی۔“ اس کا کام انہوں نے ہی تمام کیا تھا۔ [سنن ابي داود/كتاب الجهاد /حدیث: 2722]

سیدنا ابوہریرہ رضی اللہ عنہ، سیدنا سعید بن عاص رضی اللہ عنہ سے بیان کرتے ہیں کہ رسول اللہ صلی اللہ علیہ وسلم نے ابان بن سعید بن عاص رضی اللہ عنہ کو مدینہ منورہ سے نجد کی جانب ایک جہادی مہم پر روانہ کیا۔ پس ابان بن سعید رضی اللہ عنہ اور ان کے ساتھی رسول اللہ صلی اللہ علیہ وسلم کے پاس خیبر میں پہنچے جبکہ آپ صلی اللہ علیہ وسلم نے خیبر کو فتح کر لیا تھا۔ ابان بن سعید رضی اللہ عنہ اور ان کے ساتھیوں کے گھوڑوں کے تنگ (زین کسنے کے چوڑے تسمے، یا لگام) کھجور کی چھال کے تھے۔ تو ابان رضی اللہ عنہ نے کہا: ”اے اللہ کے رسول! ہمیں بھی عنایت فرمائیے۔“ سیدنا ابوہریرہ رضی اللہ عنہ کہتے ہیں کہ میں نے کہا: ”اے اللہ کے رسول! انہیں مت دیجیے۔“ ابان رضی اللہ عنہ بولے: «أَنْتَ بِهَا يَا وَبْرُ!» ”تم یہ کہہ رہے ہو اور (کہاں سے) ہمارے پاس ضال (پہاڑ) کی چوٹی سے اتر آئے ہو؟“ نبی کریم صلی اللہ علیہ وسلم نے فرمایا: ”ابان بیٹھ جاؤ۔“ اور رسول اللہ صلی اللہ علیہ وسلم نے ان کو غنیمت میں سے کچھ نہ دیا۔ [سنن ابي داود/كتاب الجهاد /حدیث: 2723]

سیدنا ابوہریرہ رضی اللہ عنہ بیان کرتے ہیں کہ میں مدینے پہنچا جب کہ رسول اللہ صلی اللہ علیہ وسلم خیبر میں تھے، جس وقت کہ آپ نے اسے فتح کیا تھا۔ میں نے درخواست کی کہ آپ مجھے بھی عنایت فرمائیں۔ تو سعید بن عاص رضی اللہ عنہ کے بچوں میں سے کسی نے کہا: ”اے اللہ کے رسول! اسے مت دیجیے۔“ میں نے کہا: ”یہ ابن قوقل رضی اللہ عنہ کا قاتل ہے۔“ تو سعید بن عاص رضی اللہ عنہ نے کہا: ” «يَا عَجَبًا لِوَبْرٍ ضَالٍّ» ”کتنی حیرت کی بات ہے ایک وبْر (پہاڑی جانور) پر جو بھٹک کر“ (پہاڑ) کی چوٹی سے ہمارے پاس اتر آیا ہے اور مجھے ایک مسلمان کے قتل پر عار دلاتا ہے جس کو اللہ عزوجل نے میرے ہاتھوں عزت بخشی (اسے شہادت نصیب ہوئی) اور مجھے اس کے ہاتھوں ذلیل نہیں کیا۔“ امام ابوداؤد رحمہ اللہ فرماتے ہیں: ”یہ لوگ تقریباً دس آدمی تھے۔ ان میں سے چھ شہید ہو گئے اور باقی واپس لوٹ آئے۔“ [سنن ابي داود/كتاب الجهاد /حدیث: 2724]

سیدنا ابوموسیٰ اشعری رضی اللہ عنہ بیان کرتے ہیں کہ ”ہم لوگ حبشہ سے واپس آئے (اور خیبر پہنچے) جبکہ رسول اللہ صلی اللہ علیہ وسلم نے خیبر کو فتح کر لیا تھا تو آپ صلی اللہ علیہ وسلم نے ہم لوگوں کو بھی حصہ دیا یا کہا کہ آپ صلی اللہ علیہ وسلم نے ہمیں بھی اس میں سے کچھ دیا۔ حالانکہ آپ صلی اللہ علیہ وسلم نے فتح خیبر سے غائب رہنے والوں میں سے کسی کو بھی کچھ نہ دیا تھا۔ صرف انہی لوگوں کو دیا جو آپ صلی اللہ علیہ وسلم کے ساتھ حاضر تھے مگر ہم لوگ جو کشتی میں سوار ہو کر آئے تھے۔ سیدنا جعفر رضی اللہ عنہ اور ان کے ساتھیوں کو دیگر مجاہدین کے ساتھ حصہ دیا۔“ [سنن ابي داود/كتاب الجهاد /حدیث: 2725]

سیدنا عبداللہ بن عمر رضی اللہ عنہ بیان کرتے ہیں کہ رسول اللہ صلی اللہ علیہ وسلم بدر والے دن کھڑے ہوئے اور فرمایا: ”عثمان رضی اللہ عنہ، اللہ کے کام سے اور رسول اللہ کے کام سے گئے ہیں اور میں ان کی بیعت لے رہا ہوں۔“ پھر آپ صلی اللہ علیہ وسلم نے غنیمت میں سے ان کا حصہ نکالا، اور ان کے سوا غائب رہنے والوں میں سے کسی کو کچھ نہیں دیا۔ [سنن ابي داود/كتاب الجهاد /حدیث: 2726]