سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”امام ڈھال ہے کہ اس کے ساتھ قتال کیا جاتا ہے۔“ [سنن ابي داود/كتاب الجهاد /حدیث: 2757]

سیدنا ابورافع رضی اللہ عنہ بیان کرتے ہیں کہ (صلح حدیبیہ کے موقع پر) قریشیوں نے مجھے رسول اللہ صلی اللہ علیہ وسلم کی طرف روانہ کیا۔ جب میں نے آپ صلی اللہ علیہ وسلم کو دیکھا تو میرے دل میں اسلام کی رغبت ڈال دی گئی، پس میں نے کہا: ”اے اللہ کے رسول! میں تو اللہ کی قسم کبھی بھی اب ان کی طرف نہیں جاؤں گا۔“ آپ صلی اللہ علیہ وسلم نے فرمایا: ”میں عہد کو نہیں توڑتا اور نہ قاصدوں کو قید کرتا ہوں، تمہیں چاہیے کہ واپس جاؤ، اگر تمہارے دل میں وہی بات رہے جو اب ہے تو واپس آ جانا۔“ کہتے ہیں: ”میں واپس گیا، پھر نبی صلی اللہ علیہ وسلم کی خدمت میں لوٹ آیا اور اسلام قبول کر لیا۔“ بکیر کہتے ہیں: ”مجھے (حسن بن علی نے) بتایا کہ (اس کا دادا) ابورافع رضی اللہ عنہ قبطی غلام تھا۔“ امام ابوداؤد رحمہ اللہ فرماتے ہیں: ”یہ اس زمانے میں تھا (کہ قاصد مسلمان ہونا چاہ رہا تھا تو اسے واپس کر دیا) آج درست نہیں ہے۔“ [سنن ابي داود/كتاب الجهاد /حدیث: 2758]

سیدنا سلیم بن عامر رضی اللہ عنہ سے روایت ہے اور یہ قبیلہ حمیر سے تھے، وہ بیان کرتے ہیں کہ سیدنا معاویہ رضی اللہ عنہ اور رومیوں کے درمیان معاہدہ (صلح و امن) ہو چکا تھا اور (معاویہ رضی اللہ عنہ ان ایام معاہدہ میں) ان کے علاقوں کی طرف کوچ کر رہے تھے تاکہ جونہی معاہدے کی مدت ختم ہو (اچانک) ان پر چڑھائی کر دیں، تو عربی گھوڑے یا ترکی گھوڑے پر سوار ایک شخص ان کی طرف آیا۔ وہ «اللهُ أَكْبَرُ، اللهُ أَكْبَرُ، وَفَاءٌ لَا غَدْرٌ» ”اللہ بہت بڑا ہے، اللہ بہت بڑا ہے، وفاداری ہو، غدر نہیں“ پکارتا آ رہا تھا۔ لوگوں نے دیکھا تو وہ صحابی رسول سیدنا عمرو بن عبسہ رضی اللہ عنہ تھے۔ سیدنا معاویہ رضی اللہ عنہ نے انہیں بلوایا اور پوچھا، تو انہوں نے کہا: ”میں نے رسول اللہ صلی اللہ علیہ وسلم کو فرماتے ہوئے سنا ہے: ”جس کا دوسری قوم سے کوئی معاہدہ ہو تو وہ اس وقت تک کوئی نیا معاہدہ نہ کرے اور نہ اسے ختم کرے جب تک کہ پہلے معاہدے کی مدت باقی ہو یا برابری کی سطح پر اسے توڑنے کا اعلان کر دے۔“”چنانچہ سیدنا معاویہ رضی اللہ عنہ لوٹ آئے۔ [سنن ابي داود/كتاب الجهاد /حدیث: 2759]

سیدنا ابوبکرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے کسی عہد والے کو بغیر کسی وجہ جواز کے قتل کیا تو اللہ نے اس پر جنت حرام کر دی۔“ [سنن ابي داود/كتاب الجهاد /حدیث: 2760]

محمد بن اسحاق کی روایت ہے کہ مسیلمہ (کذاب) نے رسول اللہ صلی اللہ علیہ وسلم کی طرف خط بھیجا۔ (دوسری سند میں ہے) نعیم بن مسعود اشجعی رضی اللہ عنہ بیان کرتے ہیں کہ ”میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم نے مسیلمہ کے دو ایلچیوں سے پوچھا جبکہ آپ صلی اللہ علیہ وسلم نے (اس کذاب کا) خط پڑھا کہ ”تم دونوں (اس کے بارے میں) کیا کہتے ہو؟“ انہوں نے کہا: ”ہم وہی کہتے ہیں جو اس نے کہا ہے۔“ آپ صلی اللہ علیہ وسلم نے فرمایا: ”اللہ کی قسم! اگر یہ بات نہ ہوتی کہ سفیر اور قاصدوں کو قتل نہیں کیا جاتا تو میں تم دونوں کی گردنیں اڑا دیتا۔““ [سنن ابي داود/كتاب الجهاد /حدیث: 2761]

حارثہ بن مضرب رضی اللہ عنہ سے منقول ہے کہ وہ سیدنا عبداللہ بن مسعود رضی اللہ عنہ کے پاس آئے (جبکہ وہ کوفہ میں والی تھے) اور کہا: ”مجھے کسی عرب سے کوئی عداوت نہیں اور میں قبیلہ بنو حنیفہ کی مسجد سے گزرا ہوں تو میں نے انہیں پایا ہے کہ وہ لوگ مسیلمہ پر ایمان رکھتے ہیں“ (یہ مسجد کوفہ ہی میں تھی) پس سیدنا عبداللہ بن مسعود رضی اللہ عنہ نے انہیں بلوا لیا، انہیں لایا گیا تو انہوں نے (عبداللہ بن مسعود رضی اللہ عنہ نے) ان سے توبہ کروائی، سوائے ابن نواحہ کے، عبداللہ بن مسعود رضی اللہ عنہ نے اس سے کہا: ”میں نے رسول اللہ صلی اللہ علیہ وسلم سے سنا ہے کہ آپ صلی اللہ علیہ وسلم نے (تجھ سے) کہا تھا: ”اگر تو سفیر نہ ہوتا تو میں تیری گردن اڑا دیتا۔“ اور آج تو سفیر یا قاصد نہیں ہے۔“ چنانچہ انہوں نے قرظہ بن کعب رضی اللہ عنہ کو حکم دیا تو انہوں نے اس کو بازار میں (سر عام) قتل کر دیا۔ پھر فرمایا: ”جو ابن نواحہ کو مقتول دیکھنا چاہتا ہے وہ اسے بازار میں دیکھ لے۔“ [سنن ابي داود/كتاب الجهاد /حدیث: 2762]

سیدنا ابن عباس رضی اللہ عنہ کہتے ہیں کہ انہیں ام ہانی بنت ابی طالب رضی اللہ عنہا نے بیان کیا کہ انہوں نے فتح مکہ کے روز ایک مشرک کو پناہ دی تھی۔ پھر وہ نبی کریم صلی اللہ علیہ وسلم کی خدمت میں آئیں اور یہ واقعہ بیان کیا تو آپ صلی اللہ علیہ وسلم نے ان سے فرمایا: ”ہم نے پناہ دی اسے جس کو تو نے پناہ دی، ہم نے امان دی اسے جس کو تو نے امان دی۔“ [سنن ابي داود/كتاب الجهاد /حدیث: 2763]

ام المؤمنین سیدہ عائشہ رضی اللہ عنہا بیان کرتی ہیں کہ ”(دور رسالت میں) عورت کسی کو مومنوں سے پناہ دے دیتی تو وہ جائز اور قبول ہوا کرتی تھی (مسلمان اسے قتل نہ کر سکتے تھے)۔“ [سنن ابي داود/كتاب الجهاد /حدیث: 2764]

سیدنا مسور بن مخرمہ رضی اللہ عنہ بیان کرتے ہیں کہ رسول اللہ صلی اللہ علیہ وسلم حدیبیہ کے موقع پر چودہ، پندرہ سو صحابہ کی معیت میں روانہ ہوئے۔ جب ذوالحلیفہ پہنچے تو آپ صلی اللہ علیہ وسلم نے اپنی قربانی کو قلادہ پہنایا اور اس کے کوہان پر چیر لگایا (اشعار کیا) اور عمرے کا احرام باندھا۔ اور حدیث بیان کی۔ نبی کریم صلی اللہ علیہ وسلم روانہ ہوئے حتیٰ کہ جب اس گھاٹی پر پہنچے جہاں سے اہل مکہ کی طرف اترتے ہیں تو آپ صلی اللہ علیہ وسلم کی سواری بیٹھ گئی۔ لوگوں نے کہا: «حَلْ حَلْ» (اونٹ کو اٹھانے کی آواز ہے) ”قصواء بگڑ گئی ہے (یا اڑ گئی ہے)“ دو بار کہا۔ نبی کریم صلی اللہ علیہ وسلم نے فرمایا: ”یہ نہ بگڑی ہے اور نہ اس کی یہ عادت ہے، اسے ہاتھی کو روکنے والے نے روکا ہے۔“ پھر فرمایا: ”قسم اس ذات کی جس کے ہاتھ میں میری جان ہے! یہ لوگ آج مجھے جو بھی کوئی ایسی تجویز پیش کریں گے جس سے وہ اللہ کی حرمتوں کی تعظیم بجا لائیں تو میں اسے قبول کر لوں گا۔“ پھر آپ صلی اللہ علیہ وسلم نے اونٹنی کو ڈانٹا تو وہ جلدی سے اٹھ کھڑی ہوئی۔ پھر آپ صلی اللہ علیہ وسلم نے ان کی طرف سے راستہ تبدیل کر لیا حتی کہ حدیبیہ کے پار ایک کنویں پر جا اترے، اس میں پانی بہت تھوڑا تھا، پھر آپ صلی اللہ علیہ وسلم کے پاس بدیل بن ورقاء خزاعی آیا۔ اس کے بعد عروہ بن مسعود آیا اور نبی کریم صلی اللہ علیہ وسلم سے گفتگو کرنے لگا۔ وہ جب بھی آپ صلی اللہ علیہ وسلم سے بات کرتا تو آپ صلی اللہ علیہ وسلم کی داڑھی مبارک پر ہاتھ پھیرتا۔ مغیرہ بن شعبہ رضی اللہ عنہ آپ صلی اللہ علیہ وسلم کے ساتھ ہی کھڑے تھے، ان کے ہاتھ میں تلوار اور سر پر خود تھی، (عروہ آپ صلی اللہ علیہ وسلم سے بات کرتے ہوئے آپ صلی اللہ علیہ وسلم کی داڑھی پر ہاتھ لگاتا تو) وہ اپنی تلوار کا دستہ اس کے ہاتھ پر دے مارتے اور کہتے: ”دور کر اپنا ہاتھ ان کی داڑھی سے۔“ عروہ نے اپنا سر اٹھایا اور پوچھا: ”یہ کون ہے؟“ حاضرین نے کہا: ”یہ مغیرہ بن شعبہ ہیں۔“ تو وہ بولا: ”اے دھوکے باز! کیا میں تیرے دھوکے اور فساد میں صلح صفائی نہیں کراتا رہا ہوں؟“ (دراصل) مغیرہ رضی اللہ عنہ قبل از اسلام کچھ لوگوں کے ساتھ تھے تو ان کو قتل کر دیا، ان کے مال لوٹ لیے، پھر جا کر اسلام قبول کر لیا۔ نبی کریم صلی اللہ علیہ وسلم نے فرمایا: ”اسلام تو ہم نے قبول کر لیا مگر مال چونکہ دھوکے کا ہے اس لیے ہمیں اس کی کوئی ضرورت نہیں۔“ اور حدیث بیان کی۔ چنانچہ نبی کریم صلی اللہ علیہ وسلم نے فرمایا: ”لکھو یہ وہ (عہد نامہ) ہے جس پر محمد رسول اللہ ( صلی اللہ علیہ وسلم ) نے اتفاق کیا ہے۔“ اور پورا قصہ بیان کیا۔ سہیل نے کہا: ”اور ہم میں سے جو کوئی بھی آپ کے پاس آئے خواہ وہ آپ کے دین ہی پر کیوں نہ ہو وہ آپ کو ہماری طرف واپس کرنا ہو گا۔“ پھر جب عہد نامے کی تحریر سے فارغ ہو گئے تو نبی کریم صلی اللہ علیہ وسلم نے اپنے صحابہ سے فرمایا: ”اٹھو! قربانیاں کرو اور اپنے سر مونڈ لو۔“ پھر مومن اور مہاجر عورتیں آئیں (تو اللہ تعالیٰ نے یہ آیت نازل فرمائی: ﴿يَا أَيُّهَا الَّذِينَ آمَنُوا إِذَا جَاءَكُمُ الْمُؤْمِنَاتُ مُهَاجِرَاتٍ﴾ [سورة الممتحنة: 10] ) تو اللہ تعالیٰ نے حکم دیا کہ انہیں واپس نہیں لوٹانا، البتہ یہ حکم دیا کہ ان کے حق مہر واپس کر دیے جائیں۔ پھر آپ صلی اللہ علیہ وسلم مدینہ واپس تشریف لے آئے۔ قریش کا ایک آدمی ابوبصیر، آپ صلی اللہ علیہ وسلم کے پاس آ گیا۔ تو ان لوگوں نے اس کو لینے کے لیے اپنے دو آدمی بھیج دیے۔ نبی کریم صلی اللہ علیہ وسلم نے اسے ان کے حوالے کر دیا۔ وہ اسے لے کر چلے گئے حتیٰ کہ جب ذوالحلیفہ مقام پر پہنچے تو انہوں نے وہاں پڑاؤ کیا اور اپنی کھجوریں کھانے لگے۔ ابوبصیر نے ان میں سے ایک کو کہا: ”ارے! تیری یہ تلوار تو بہت عمدہ دکھائی دیتی ہے۔“ اس نے اسے میان سے نکالا اور کہا: ”ہاں ہاں میں نے اس کو بہت آزمایا ہے۔“ ابوبصیر نے کہا: ”دکھانا ذرا، میں اسے دیکھوں تو سہی۔“ اور وہ اس نے اس کو پکڑا دی۔ پس ابوبصیر نے وہ اسے دے ماری حتیٰ کہ وہ ٹھنڈا ہو گیا۔ اور اس کے ساتھ والا دوسرا آدمی بھاگ کر مدینے آ گیا اور بھاگتے بھاگتے مسجد میں چلا آیا۔ نبی کریم صلی اللہ علیہ وسلم نے فرمایا: ”(یہ خوف زدہ ہے) اس نے کوئی خوفناک چیز دیکھی ہے۔“ وہ بولا: ”اللہ کی قسم میرا ساتھی قتل کر دیا گیا ہے اور میں بھی مارا جانے والا ہوں۔“ پھر ابوبصیر بھی آ گیا تو اس نے کہا: ”اللہ نے آپ کی ذمہ داری پوری کرا دی کہ آپ صلی اللہ علیہ وسلم نے مجھے ان کے حوالے کر دیا تھا، پھر اللہ نے مجھے ان سے نجات دے دی ہے۔“ نبی کریم صلی اللہ علیہ وسلم نے فرمایا: ”اس کی ماں کا افسوس! یہ تو جنگ کی آگ بھڑکانے والا ہے اگر کوئی اسے مل جائے۔“ جب اس نے یہ سنا تو سمجھ گیا کہ آپ صلی اللہ علیہ وسلم اسے ان لوگوں کی طرف لوٹا دیں گے۔ سو وہ وہاں سے نکل کھڑا ہوا اور ساحل سمندر پر آ گیا۔ پھر ابوجندل بھی نکل بھاگا اور ابوبصیر کے ساتھ جا ملا حتیٰ کہ وہاں ایک جماعت اکٹھی ہو گئی۔ [سنن ابي داود/كتاب الجهاد /حدیث: 2765]

سیدنا مسور بن مخرمہ اور مروان بن حکم رضی اللہ عنہما سے منقول ہے کہ قریش نے اس بات پر صلح کی کہ ”دس سال تک کوئی جنگ نہیں ہو گی، لوگ اس مدت میں ہر طرح امن سے رہیں گے، (اس معاہدے کے متعلق) ہم دونوں فریقوں کے دل صاف رہیں گے، چوری چھپے یا خیانت سے اس کی مخالفت نہ ہو گی۔“ [سنن ابي داود/كتاب الجهاد /حدیث: 2766]