سیدنا ابن عمر رضی اللہ عنہما سے روایت ہے کہ ام المؤمنین سیدہ عائشہ رضی اللہ عنہا نے ارادہ کیا کہ ایک لونڈی خرید کر آزاد کر دیں، تو لونڈی کے مالکوں نے کہا: ”ہم یہ آپ کو فروخت کر دیتے ہیں، لیکن اس کا ولاء ہمارے لیے رہے گا، (اس کی وفات پر اس کا مال ہم لیں گے یا نسبت ولاء ہم سے متعلق رہے گے۔)“ سیدہ عائشہ رضی اللہ عنہا نے ان کی یہ بات رسول اللہ صلی اللہ علیہ وسلم سے ذکر کی تو آپ صلی اللہ علیہ وسلم نے فرمایا: ”(ان کی یہ بات) تیرے لیے کوئی مانع نہیں ہے، کیونکہ ولاء اسی کا ہوتا ہے جو آزاد کرے۔“ [سنن ابي داود/كتاب الفرائض /حدیث: 2915]

ام المؤمنین سیدہ عائشہ رضی اللہ عنہا نے بیان کیا کہ رسول اللہ صلی اللہ علیہ وسلم نے فرمایا: ”ولاء اسی کا حق ہے جو قیمت ادا کرے اور احسان کرے (آزادی دلائے)۔“ [سنن ابي داود/كتاب الفرائض /حدیث: 2916]

جناب عمرو بن شعیب اپنے والد سے وہ اپنے دادا سے روایت کرتے ہیں کہ رئاب بن حذیفہ نے ایک عورت سے شادی کی، تو اس سے ان کے تین لڑکے پیدا ہوئے، پھر ان کی ماں فوت ہو گئی تو وہ بچے اپنی ماں کے گھروں اور غلاموں کے ولاء کے وارث ہوئے۔ سیدنا عمرو بن العاص رضی اللہ عنہ ان بچوں کے عصبہ تھے (یعنی وارث تھے)۔ وہ انہیں شام لے گئے جو وہاں جا کر فوت ہو گئے۔ (یہ بچے طاعونِ عمواس میں فوت ہوئے تھے)۔ سیدنا عمرو بن العاص رضی اللہ عنہ واپس آئے جبکہ اس عورت کا ایک غلام بھی وفات پا گیا اور مال چھوڑ گیا تھا، تو عورت کے بھائیوں نے سیدنا عمرو بن العاص رضی اللہ عنہ سے (اپنی بہن کے ولاء کے سلسلے میں) جھگڑا کیا اور معاملہ سیدنا عمر بن خطاب رضی اللہ عنہ کے سامنے پیش کیا۔ تو سیدنا عمر رضی اللہ عنہ نے کہا: رسول اللہ صلی اللہ علیہ وسلم نے فرمایا ہے: ”بیٹے نے یا باپ نے جو بھی جمع کیا ہو وہ اس کے «عَصَبَة» ”عصبہ“ کا ہوتا ہے جو بھی ہوں۔“ چنانچہ انہوں نے (اس فیصلے کی) ایک تحریر لکھی جس میں سیدنا عبدالرحمٰن بن عوف رضی اللہ عنہ، زید بن ثابت رضی اللہ عنہ اور ایک آدمی کی گواہی ثبت کی۔ پھر جب عبدالملک خلیفہ ہوئے تو عورت کے بھائیوں نے یہ مقدمہ ہشام بن اسماعیل یا اسماعیل بن ہشام کے سامنے پیش کیا۔ اس نے ان کو عبدالملک کے ہاں بھیج دیا۔ تو عبدالملک نے کہا: ”یہ وہی فیصلہ ہے جو میرا خیال ہے میں پہلے دیکھ چکا ہوں۔“ چنانچہ اس نے سیدنا عمر بن خطاب رضی اللہ عنہ کی تحریر کے مطابق ہمارے حق میں فیصلہ کر دیا اور اب تک ہم اسی میں ہیں۔ [سنن ابي داود/كتاب الفرائض /حدیث: 2917]

سیدنا تمیم داری رضی اللہ عنہ نے سوال کیا: ”اے اللہ کے رسول! جب کوئی شخص کسی مسلمان کے ہاتھ پر اسلام قبول کرتا ہے تو اس بارے میں مشروع سنت کیا ہے؟“ آپ صلی اللہ علیہ وسلم نے فرمایا: ”زندگی اور موت میں وہی سب سے بڑھ کر اس کا ولی ہے۔“ (اس کے ساتھ نیکی، ایثار اور احسان کا معاملہ کرتا رہے)۔ [سنن ابي داود/كتاب الفرائض /حدیث: 2918]

سیدنا ابن عمر رضی اللہ عنہ سے مروی ہے کہ رسول اللہ صلی اللہ علیہ وسلم نے ”نسبت ولاء کو بیچنے یا کسی کو ہبہ کر دینے سے منع فرمایا ہے“۔ [سنن ابي داود/كتاب الفرائض /حدیث: 2919]

سیدنا ابوہریرہ رضی اللہ عنہ روایت کرتے ہیں کہ نبی کریم صلی اللہ علیہ وسلم نے فرمایا: ”(نو مولود) بچہ جب آواز بلند کرے تو وارث ہو گا۔“ [سنن ابي داود/كتاب الفرائض /حدیث: 2920]

سیدنا ابن عباس رضی اللہ عنہما نے آیتِ کریمہ ﴿وَالَّذِينَ عَاقَدَتْ أَيْمَانُكُمْ فَآتُوهُمْ نَصِيبَهُمْ﴾ [سورة النساء: 33] کی تفسیر میں بیان کیا: ”ایک آدمی دوسرے کا حلیف بن جاتا تھا، جبکہ ان میں کوئی نسبی قرابت نہ ہوتی تھی، پھر ہر ایک دوسرے کا وارث بھی ہوتا تھا، تو اس حکم کو سورۃ الانفال نے منسوخ کر دیا۔ اللہ تعالیٰ نے فرمایا: ﴿وَأُولُو الْأَرْحَامِ بَعْضُهُمْ أَوْلَى بِبَعْضٍ﴾ [سورة الأنفال: 75] ”رشتے ناتے والے ایک دوسرے سے زیادہ نزدیک ہیں۔“” [سنن ابي داود/كتاب الفرائض /حدیث: 2921]

سیدنا ابن عباس رضی اللہ عنہما سے مروی ہے کہ انہوں نے اللہ تعالیٰ کے فرمان ﴿وَالَّذِينَ عَقَدَتْ أَيْمَانُكُمْ فَآتُوهُمْ نَصِيبَهُمْ﴾ [سورة النساء: 33] کی تفسیر میں فرمایا: ”مہاجرین جب مدینہ آئے تو انصار کے وارث وہی (مہاجرین) بنتے تھے نہ کہ دیگر رشتہ دار۔ یہ اس بنا پر تھا کہ رسول اللہ صلی اللہ علیہ وسلم نے ان کے آپس میں بھائی چارہ قائم فرما دیا تھا۔ پھر جب یہ آیت ﴿وَلِكُلٍّ جَعَلْنَا مَوَالِيَ مِمَّا تَرَكَ﴾ [سورة النساء: 33] اتری تو اس نے آیت ﴿وَالَّذِينَ عَقَدَتْ أَيْمَانُكُمْ فَآتُوهُمْ نَصِيبَهُمْ﴾ [سورة النساء: 33] کو منسوخ کر دیا۔ مگر عام نصرت، خیر خواہی اور تعاون کو قائم رکھا۔ وہ ایک دوسرے کو وصیت بھی کر سکتے تھے، جب کہ وراثت ختم کر دی گئی۔“ [سنن ابي داود/كتاب الفرائض /حدیث: 2922]

جناب داود بن حصین بیان کرتے ہیں کہ ”میں ام سعد بنت ربیع کے ہاں پڑھا کرتا تھا، جبکہ وہ یتیم تھیں اور سیدنا ابوبکر رضی اللہ عنہ کی زیر تربیت تھیں، تو میں نے یوں قراءت کی: ﴿وَالَّذِينَ عَقَدَتْ أَيْمَانُكُمْ﴾ [سورة النساء: 33] اس نے کہا: ” «وَالَّذِينَ عاقَدَتْ أَيْمانُكُمْ» مت پڑھو۔ (بلکہ بات یہ ہے کہ) یہ آیت ابوبکر رضی اللہ عنہ اور ان کے بیٹے عبدالرحمٰن کے سلسلے میں نازل ہوئی تھی، جبکہ اس نے اسلام قبول کرنے سے انکار کر دیا تھا۔ تو سیدنا ابوبکر رضی اللہ عنہ نے قسم کھائی تھی کہ اسے اپنی وراثت نہیں دوں گا۔ پھر جب اس نے اسلام قبول کر لیا تو اللہ کے نبی صلی اللہ علیہ وسلم نے اس کو حکم دیا کہ وہ اسے اس کا حصہ دیں۔““ عبدالعزیز (بن یحییٰ) نے مزید کہا: ”عبدالرحمٰن نے اس وقت تک اسلام قبول نہیں کیا جب تک کہ اسے تلوار کے زور پر مجبور نہیں کر دیا گیا۔ (جب اسلام بزور تلوار غالب آ گیا اور بہت سے لوگ اسلام لانے پر مجبور ہو گئے)۔“ امام ابوداؤد رحمہ اللہ فرماتے ہیں: ” «عَقَدَتْ» کا مفہوم حلف یعنی قسم کھانے کے معنی میں ہوگا (سیدنا ابوبکر رضی اللہ عنہ نے قسم کھائی تھی کہ اپنے غیر مسلم بیٹے کو وراثت نہیں دیں گے) اور جو «عاقَدَتْ» پڑھتے ہیں، ان کے نزدیک معنی ”باہمی عہد و پیمان“ ہیں۔ اور سابقہ حدیث طلحہ بن مصرف زیادہ صحیح ہے۔“ [سنن ابي داود/كتاب الفرائض /حدیث: 2923]