سیدنا ابن عباس رضی اللہ عنہما سے مروی ہے کہ انہوں نے آیتِ کریمہ: ﴿وَالَّذِينَ آمَنُوا وَهَاجَرُوا﴾ [سورة الأنفال: 72] اور ﴿وَالَّذِينَ آمَنُوا وَلَمْ يُهَاجِرُوا﴾ [سورة الأنفال: 72] کی تفسیر میں فرمایا کہ ”دیہاتی (مسلمان جس نے ہجرت نہ کی ہوتی) مہاجر کا وارث نہ بنتا تھا۔ پھر اس حکم کو آیتِ کریمہ: ﴿وَأُولُو الْأَرْحَامِ بَعْضُهُمْ أَوْلَىٰ بِبَعْضٍ﴾ [سورة الأنفال: 75] نے منسوخ کر دیا۔“ [سنن ابي داود/كتاب الفرائض /حدیث: 2924]

سیدنا جبیر بن مطعم رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”اسلام میں کوئی (نیا) حلف نہیں ہے اور قبل از اسلام (ایام جاہلیت میں) جو عہد و معاہدے ہو چکے، ان کو اسلام نے اور مضبوط کیا ہے۔“ [سنن ابي داود/كتاب الفرائض /حدیث: 2925]

سیدنا انس بن مالک رضی اللہ عنہ بیان کرتے ہیں کہ ”رسول اللہ صلی اللہ علیہ وسلم نے ہمارے احاطے میں بیٹھ کر مہاجرین اور انصار کے درمیان بھائی چارہ قائم فرمایا تھا۔“ ان سے کہا گیا: ”کیا رسول اللہ صلی اللہ علیہ وسلم نے یہ نہیں فرمایا: ”اسلام میں کوئی حلف نہیں۔““ تو انہوں نے جواب دیا کہ ”رسول اللہ صلی اللہ علیہ وسلم نے ہمارے احاطے میں بیٹھ کر مہاجرین اور انصار کے درمیان حلف قائم کیا تھا۔“ انہوں نے اپنی یہ بات دو یا تین بار دہرائی۔ [سنن ابي داود/كتاب الفرائض /حدیث: 2926]

سیدنا سعید بن مسیب رحمہ اللہ سے روایت ہے کہ سیدنا عمر بن خطاب رضی اللہ عنہ کہا کرتے تھے: ”دیت کنبے والوں کا حق ہے (جو باپ کی طرف سے قرابت دار ہوتے ہیں) اور عورت اپنے شوہر کی دیت میں سے کچھ نہ پائے گی“، حتیٰ کہ سیدنا ضحاک بن سفیان رضی اللہ عنہ نے ان سے کہا: ”رسول اللہ صلی اللہ علیہ وسلم نے مجھے لکھا تھا کہ میں اشیم ضبابی کی بیوی کو اس کے شوہر کی دیت سے حصہ دلاؤں۔“ چنانچہ سیدنا عمر رضی اللہ عنہ نے اپنی رائے سے رجوع کر لیا۔ احمد بن صالح نے بیان کیا کہ ہمیں یہ حدیث عبدالرزاق نے بواسطہ زہری اور انہوں نے سعید سے روایت کی ہے اور اس میں ہے کہ ”نبی کریم صلی اللہ علیہ وسلم نے ضحاک کو دیہاتیوں پر عامل بنایا تھا۔“ [سنن ابي داود/كتاب الفرائض /حدیث: 2927]