جناب عامر بن شہر رضی اللہ عنہ نے روایت کیا، انہوں نے کہا کہ ”میں نجاشی کے دربار میں تھا کہ اس کے بیٹے نے انجیل کی ایک آیت پڑھی، میں ہنس پڑا۔ تو اس نے کہا: کیا تم اللہ تعالیٰ کے کلام سے ہنستے ہو؟“ [سنن ابي داود/كتاب السنة /حدیث: 4736]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم سیدنا حسن اور حسین رضی اللہ عنہما کو ان الفاظ سے دم کیا کرتے تھے: «أُعِيذُكُمَا بِكَلِمَاتِ اللَّهِ التَّامَّةِ، مِنْ كُلِّ شَيْطَانٍ وَهَامَّةٍ، وَمِنْ كُلِّ عَيْنٍ لَامَّةٍ» ”میں تم دونوں کو اللہ کے کامل کلمات کی پناہ میں دیتا ہوں کہ ہر شیطان، ہر موذی اور ہر بد نظر کے شر سے محفوظ رہو۔“ پھر فرماتے: ”تمہارے ابا (سیدنا ابراہیم علیہ السلام) سیدنا اسماعیل علیہ السلام اور سیدنا اسحاق علیہ السلام کو ان کے ذریعے سے پناہ دیا کرتے تھے۔“ امام ابوداؤد رحمہ اللہ فرماتے ہیں: ”یہ دلیل ہے کہ قرآن کریم مخلوق نہیں۔“ [سنن ابي داود/كتاب السنة /حدیث: 4737]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب اللہ عز وجل کسی وحی کا کلام فرماتا ہے تو آسمان والے آسمان میں ایک آواز سنتے ہیں جیسے پتھر پر زنجیر گھسیٹی جا رہی ہو، اس سے وہ بے ہوش ہو جاتے ہیں اور پھر اسی کیفیت میں رہتے ہیں حتیٰ کہ ان کے پاس جبرائیل آتے ہیں، ان کے آنے سے ان کے دلوں سے یہ کیفیت زائل ہو جاتی ہے اور وہ جبرائیل سے پوچھتے ہیں: ”تمہارے رب نے کیا فرمایا؟“ وہ کہتے ہیں: ”حق فرمایا۔“ تو وہ بھی کہتے ہیں: ”حق فرمایا، حق فرمایا۔““ [سنن ابي داود/كتاب السنة /حدیث: 4738]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”میری سفارش میری امت کے ان لوگوں کے لیے ہو گی جو کبیرہ گناہوں کے مرتکب ہوئے ہوں گے۔“ [سنن ابي داود/كتاب السنة /حدیث: 4739]

سیدنا عمران بن حصین رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”ایک گروہ جہنم میں سے محمد صلی اللہ علیہ وسلم کی شفاعت سے نکلے گا اور وہ جنت میں داخل ہوں گے اور ان کا نام «جَهَنَّمِيِّينَ» ”جہنمی“ ہو گا۔“ [سنن ابي داود/كتاب السنة /حدیث: 4740]

سیدنا جابر رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو یہ فرماتے سنا: ”بلاشبہ اہل جنت، جنت میں کھائیں گے اور پیئیں گے۔“ [سنن ابي داود/كتاب السنة /حدیث: 4741]

سیدنا عبداللہ بن عمرو رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ” «الصُّورُ» ”صور“ ایک سینگ ہے جس میں پھونک ماری جائے گی۔“ [سنن ابي داود/كتاب السنة /حدیث: 4742]

سیدنا ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”ابنِ آدم کے سارے جسم کو مٹی کھا جائے گی، مگر دم کی جڑ کا آخری حصہ بچ رہے گا۔ اسی سے پیدائش کی ابتدا ہوتی ہے اور اسی سے دوبارہ جسم مرکب ہوں گے۔“ [سنن ابي داود/كتاب السنة /حدیث: 4743]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جب اللہ «عَزَّ وَجَلَّ» ”عزوجل“ نے جنت کو پیدا کیا تو جبرائیل امین سے کہا: ”جاؤ اور اسے دیکھو۔“ چنانچہ وہ گئے اور اسے دیکھا، پھر آئے تو کہا: ”اے میرے رب! تیری عزت کی قسم! اس کے متعلق جو کوئی بھی سنے گا اس میں داخل ہونا چاہے گا۔“ پھر اللہ نے اس کو مکروہات کے گھیرے میں دے دیا۔ (اس میں آنے والوں کو جو عمل کرنے ہوں گے اور جن شرعی پابندیوں کو قبول کرنا ہو گا، عمومی طور پر ان کی طرف طبیعت مائل نہیں ہوتی یا حق کی راہ پر جمے رہنے کی وجہ سے تکلیفیں اٹھانی ہوں گی۔) پھر فرمایا: ”جبرائیل! جاؤ اور اسے دیکھ کر آؤ۔“ پس وہ گئے اور اس کو دیکھا۔ پھر آئے اور کہا: ”اے میرے رب! تیری عزت کی قسم! مجھے اندیشہ ہے کہ اس میں کوئی داخل نہیں ہو سکے گا۔“ آپ صلی اللہ علیہ وسلم نے فرمایا: ”پھر جب دوزخ کو پیدا کیا تو جبرائیل سے کہا: ”جاؤ اور دوزخ کو دیکھ کر آؤ۔“ وہ گئے اور دیکھ کر آئے۔ واپس آ کر کہا: ”اے میرے رب! تیری عزت کی قسم! کوئی نہیں جو اس کے متعلق سنے اور پھر اس میں داخل ہو۔“ پھر اللہ تعالیٰ نے اس کو نفسانی خواہشات اور مرغوبات کے گھیرے میں دے دیا۔ پھر فرمایا: ”اے جبرائیل! جاؤ اور اسے دیکھ کر آؤ۔“ وہ گئے اور اسے دیکھا۔ پھر آئے اور کہا: ”اے میرے رب! تیری عزت اور تیرے جلال کی قسم! مجھے اندیشہ ہے کہ اس میں داخل ہونے سے کوئی بھی نہیں بچ سکے گا۔“” [سنن ابي داود/كتاب السنة /حدیث: 4744]

سیدنا ابن عمر رضی اللہ عنہما نے بیان کیا کہ رسول اللہ صلی اللہ علیہ وسلم نے فرمایا: ”بلاشبہ تمہارے آگے (محشر میں) ایک حوض ہے۔ اس کے کنارے اس قدر لمبے ہیں جیسے جرباء اور اذرح کے مابین فاصلہ ہے۔“ (یہ علاقہ شام کے دو مقام ہیں ان کے درمیان پرانے زمانے میں تین راتوں کے سفر کا فاصلہ تھا۔) [سنن ابي داود/كتاب السنة /حدیث: 4745]