جناب قتادہ نے سیدنا انس رضی اللہ عنہ سے، انہوں نے نبی کریم صلی اللہ علیہ وسلم سے مذکورہ بالا حدیث کی مانند روایت کیا ہے، اس روایت میں ہے کہ ”ان (خوارج) کی علامت سر منڈانا اور بال دور کرنا ہے۔ جب تم انہیں پاؤ تو انہیں سلا (قتل کر) دینا۔“ امام ابوداؤد رحمہ اللہ نے فرمایا: ”حدیث میں وارد لفظ «التَّسْبِيدُ» کے معنی ہیں «اسْتِئْصَالُ الشَّعْرِ» ”بالوں کو جڑوں سے اکھیڑنا یا جڑوں سے مونڈنا۔“” [سنن ابي داود/كتاب السنة /حدیث: 4766]

سیدنا علی رضی اللہ عنہ نے کہا کہ جب میں تمہیں رسول اللہ صلی اللہ علیہ وسلم کی حدیث بیان کرتا ہوں (تو اس میں کوئی خفا نہیں ہوتا، بالکل حق اور صاف ہوتی ہے) ”مجھے آسمان سے گرنا، رسول اللہ صلی اللہ علیہ وسلم پر جھوٹ بولنے کی نسبت بہت زیادہ پسند ہے“ اور جب میں تم سے آپس کی کوئی بات کرتا ہوں تو (یاد رکھو) ”لڑائی چال کا نام ہے“ (بہت سی مصلحتیں ملحوظ رکھنی ضروری ہیں، اس لیے ان باتوں کو عام نہیں کرنا چاہیے) میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”آخری زمانے میں لوگ آئیں گے جو عمروں میں نوجوان ہوں گے مگر بے عقل۔ مخلوق میں سب سے افضل ترین شخصیت (رسول اللہ صلی اللہ علیہ وسلم ) کی باتیں کرتے ہوں گے، مگر دین سے ایسے گزر جائیں گے جیسے کہ تیر اپنے شکار سے نکل جاتا ہے۔ ان کا ایمان ان کے حلقوں سے نیچے نہیں اترتا ہو گا۔ تم ان سے جہاں بھی ملو، انہیں قتل کر دینا۔ بلاشبہ ان کے قتل میں ان کے قاتل کے لیے قیامت کے روز بہت بڑا اجر ہو گا۔“ [سنن ابي داود/كتاب السنة /حدیث: 4767]

زید بن وہب جہنی نے بیان کیا کہ وہ سیدنا علی رضی اللہ عنہ کے ساتھ اس لشکر میں شریک تھے جو خارجیوں کی طرف گیا تھا۔ سیدنا علی رضی اللہ عنہ نے فرمایا: ”لوگو! میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”میری امت میں ایسے لوگ ہوں گے جو قرآن پڑھتے ہوں گے۔ تمہاری قراءت ان کی قراءت کے مقابلے میں کچھ بھی نہیں ہو گی، نہ تمہاری نمازیں ان کی نمازوں کے مقابلے میں کچھ ہوں گی نہ تمہارے روزے ان کے روزوں کے مقابلے میں کچھ حیثیت رکھتے ہوں گے، وہ قرآن پڑھتے ہوں گے اور سمجھیں گے کہ یہ ان کے حق میں دلیل اور تائید ہے، حالانکہ وہ ان کے خلاف ہو گا۔ ان کی نمازیں ان کی ہنسلیوں سے آگے نہیں بڑھیں گی۔ اسلام سے ایسے گزر جائیں گے جیسے تیر اپنے شکار میں سے نکل جاتا ہے۔“ اگر اس لشکر کو جو ان (خارجیوں) کو قتل کرے گا ان فضائل کا علم ہو جائے جو اللہ نے ان کے نبی صلی اللہ علیہ وسلم کی زبانی ان کے لیے مقدر فرمائے ہیں تو وہ اسی پر تکیہ کر لیں اور ان (خارجیوں) کی نشانی یہ ہے کہ ان میں ایک ایسا آدمی ہو گا جس کی کہنی سے اوپر کا بازو تو ہو گا، کہنی سے نیچے کلائی نہیں ہو گی۔ اوپر کے بازو کا آخر پستان کی بھٹنی کی طرح ہو گا۔ اس پر سفید بال ہوں گے۔ کیا بھلا تم لوگ معاویہ اور اہل شام کی طرف جانا چاہتے ہو اور ان (خارجیوں) کو اپنی اولادوں اور مال و اسباب میں پیچھے چھوڑ دینا چاہتے ہو؟ اللہ کی قسم! مجھے امید ہے کہ یہی وہ لوگ ہیں (جن کی خبر رسول اللہ صلی اللہ علیہ وسلم نے دی) انہوں نے حرام خون بہایا اور لوگوں کے محفوظ علاقے (جان، عزت، مال) لوٹے۔ چنانچہ اللہ کا نام لے کر (ان کے مقابلے میں) چلو۔“ سلمہ بن کہیل نے کہا کہ زید بن وہب مجھے منزل بمنزل لے کر چلتے گئے حتیٰ کہ ہم ایک پل سے گزرے، پھر بتایا کہ جب ہم ان کے مقابل ہوئے اور خارجیوں کا سردار عبداللہ بن وہب راسبی تھا تو اس نے اپنے لوگوں سے کہا: ”نیزے پھینک دو اور تلواریں اپنی میانوں سے نکال لو۔ مجھے ڈر ہے کہ یہ تم سے اسی طرح مقابلہ کریں گے جیسے حروراء والے دن کیا تھا۔“ کہا: چنانچہ ان لوگوں نے اپنے نیزے پھینک دیے اور تلواریں کھینچ لیں تو لوگوں نے ان کو اپنے نیزوں سے چھلنی کرنا شروع کر دیا اور ان کو ایک دوسرے کے اوپر قتل کیا۔ جبکہ سیدنا علی رضی اللہ عنہ کے لشکر میں سے صرف دو آدمی شہید ہوئے۔ تو سیدنا علی رضی اللہ عنہ نے کہا: ”تلاش کرو، ان میں ایک لنجا ہو گا۔“ مگر انہیں نہ ملا۔ تو سیدنا علی رضی اللہ عنہ خود اٹھے حتیٰ کہ ان میتوں کے پاس آئے جو ایک دوسرے پر قتل ہوئے تھے۔ انہوں نے فرمایا: ”انہیں نکالو۔“ چنانچہ انہوں نے اسے پا لیا جو کہ سب سے نیچے زمین پر پڑا تھا۔ سیدنا علی رضی اللہ عنہ نے «اللَّهُ أَكْبَرُ» ”اللہ بہت بڑا ہے“ پکارا اور کہا: ”اللہ نے سچ فرمایا اور اس کے رسول صلی اللہ علیہ وسلم نے پہنچا دیا۔“ پس جناب عبیدہ سلمانی ان کی طرف کھڑے ہوئے اور کہا: ”اے امیر المؤمنین! قسم اس اللہ کی جس کے سوا کوئی معبود نہیں! کیا یہ بیان آپ نے رسول اللہ صلی اللہ علیہ وسلم سے سنا تھا؟“ انہوں نے فرمایا: ”ہاں اللہ کی قسم! جس کے سوا کوئی معبود نہیں۔“ حتیٰ کہ انہوں نے تین بار قسم دی اور سیدنا علی رضی اللہ عنہ نے بھی تین بار قسم سے جواب دیا۔ امام ابوداؤد رحمہ اللہ کہتے ہیں کہ امام مالک رحمہ اللہ نے فرمایا: ”یہ علم کی اہانت ہے کہ عالم ہر پوچھنے والے کا جواب دینے لگے۔“ [سنن ابي داود/كتاب السنة /حدیث: 4768]

ابو وضی نے بیان کیا کہ سیدنا علی رضی اللہ عنہ نے فرمایا: ”اس لنجے کو تلاش کرو۔“ اور حدیث بیان کی۔ چنانچہ اسے مقتولین کے نیچے سے نکال لیا گیا جو کیچڑ میں لت پت پڑا تھا۔ ابو وضی نے کہا: ”میں گویا اسے دیکھ رہا ہوں، حبشی آدمی تھا، اس پر قبا تھی، اس کا ایک ہاتھ ایسے تھا جیسے عورت کی پستان پر بھٹنی، اس پر چند بال تھے جیسے جنگلی چوہے کی دم پر ہوتے ہیں۔“ [سنن ابي داود/كتاب السنة /حدیث: 4769]

ابومریم نے کہا: ”تحقیق یہ لنجا آدمی ان دنوں ہمارے ساتھ مسجد میں ہوتا تھا۔ دن رات ہم اس کے ساتھ بیٹھتے تھے، فقیر آدمی تھا۔ میں نے اسے مسکینوں کے ساتھ دیکھا جو سیدنا علی رضی اللہ عنہ کے طعام میں شریک ہوتا تھا، جو وہ لوگوں کے ساتھ تناول کرتے تھے۔ اور میں نے اس کو اپنا اوور کوٹ بھی دیا تھا۔“ ابومریم نے کہا: ”اس لنجے کو «نَافِعٌ ذُو الثُّدَيَّةِ» ”پستان والا“ کہا جاتا تھا۔ اس کے بازو پر عورت کے پستان کی طرح پستان سا تھا اور اس کے سرے پر بھٹنی بھی تھی۔ اور اس پر بلی کی مونچھوں کی طرح کچھ بال تھے۔“ امام ابوداؤد رحمہ اللہ فرماتے ہیں: ”لوگوں میں اس کا نام حرقوس معروف ہے۔“ [سنن ابي داود/كتاب السنة /حدیث: 4770]

سیدنا عبداللہ بن عمرو رضی اللہ عنہ کا بیان ہے کہ نبی کریم صلی اللہ علیہ وسلم نے فرمایا: ”جس کسی کا مال ناحق طور پر چھیننے کی کوشش کی گئی اور پھر اس نے قتال کیا اور اس میں وہ قتل ہو گیا، تو وہ شہید ہے۔“ [سنن ابي داود/كتاب السنة /حدیث: 4771]

سیدنا سعید بن زید رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جو شخص اپنے مال کی حفاظت میں قتل ہو جائے وہ شہید ہے، اور جو اپنے گھر والوں کی حفاظت یا خون یا دین کے دفاع میں قتل ہو جائے، وہ شہید ہے۔“ [سنن ابي داود/كتاب السنة /حدیث: 4772]