ام المؤمنین سیدہ عائشہ رضی اللہ عنہا بیان کرتی ہیں کہ ”رسول اللہ صلی اللہ علیہ وسلم نے مجھ سے شادی کی تو میری عمر سات سال یا چھ سال تھی۔ جب ہم مدینہ منورہ آئے تو چند عورتیں آئیں۔ بشر بن خالد کے الفاظ ہیں: (میری والدہ) ام رومان رضی اللہ عنہا آئیں۔ جبکہ میں ایک جھولے پر تھی اور وہ مجھے لے گئیں۔ مجھے تیار کیا، بنایا سنوارا اور رسول اللہ صلی اللہ علیہ وسلم کے ہاں بھیج دیا گیا۔ میری رخصتی ہوئی تو میری عمر نو سال تھی۔ (میری والدہ نے) مجھے دروازے پر کھڑا کر دیا تو میں نے کہا: «هَيْهْ هَيْهْ» یعنی ”انکار کرنے کی آواز“۔“ امام ابوداؤد رحمہ اللہ اس کی وضاحت میں کہتے ہیں: ”یعنی میں نے لمبا (ٹھنڈا) سانس لیا اور مجھے ایک گھر میں داخل کر دیا گیا تو وہاں انصار کی کچھ عورتیں تھیں۔ انہوں نے دعائے خیر و برکت کے ساتھ میرا استقبال کیا۔“ حماد اور ابو اسامہ کی روایت ایک دوسرے میں مل گئی ہے۔ [سنن ابي داود/كتاب الأدب /حدیث: 4933]

جناب ابواسامہ رحمہ اللہ نے مذکورہ بالا حدیث کے مثل روایت کیا اور کہا: «خَيْرًا لَكِ» ”اللہ کرے تیری قسمت اچھی ہو۔“ اور مجھے ان عورتوں کے حوالے کر دیا، انہوں نے میرا سر دھویا اور مجھے بنایا سنوارا، اور میں اس وقت ڈر سی گئی جب دن چڑھے رسول اللہ صلی اللہ علیہ وسلم میرے سامنے ہوئے تو انہوں نے مجھے آپ صلی اللہ علیہ وسلم کے حوالے کر دیا۔ [سنن ابي داود/كتاب الأدب /حدیث: 4934]

ام المؤمنین سیدہ عائشہ رضی اللہ عنہا بیان کرتی ہیں کہ ”جب ہم مدینے آئے تو میرے پاس کچھ عورتیں آئیں جبکہ میں ایک جھولے پر کھیل رہی تھی اور میرے بال کانوں سے نیچے اتر رہے تھے، تو وہ مجھے لے گئیں اور مجھے تیار کیا، بنایا سنوارا، پھر وہ مجھے رسول اللہ صلی اللہ علیہ وسلم کی خدمت میں لے آئیں، میری (رسول اللہ صلی اللہ علیہ وسلم کے گھر) رخصتی ہوئی تو میری عمر نو سال تھی۔“ [سنن ابي داود/كتاب الأدب /حدیث: 4935]

جناب ہشام بن عروہ نے اپنی سند سے اس روایت میں بیان کیا کہ سیدہ عائشہ رضی اللہ عنہا نے کہا: ”میں اپنی سہیلیوں کے ساتھ جھولے پر تھی، تو انہوں نے مجھے ایک گھر میں داخل کر دیا۔ وہاں انصار کی کچھ عورتیں تھیں، تو انہوں نے خیر و برکت کی دعا کے ساتھ میرا استقبال کیا۔“ [سنن ابي داود/كتاب الأدب /حدیث: 4936]

یحییٰ بن عبدالرحمٰن بن حاطب بیان کرتے ہیں کہ ام المؤمنین سیدہ عائشہ رضی اللہ عنہا نے فرمایا: ”ہم مدینے آئے اور بنو حارث بن خزرج کے ہاں ہمارا قیام ہوا۔“ کہتی ہیں: ”اللہ کی قسم! میں کھجور کی دو لکڑیوں میں لگے ایک جھولے پر تھی کہ میری والدہ آئیں، تو انہوں نے مجھے اس سے اتارا، اور میرے بال چھوٹے چھوٹے تھے۔“ اور پوری حدیث بیان کی۔ [سنن ابي داود/كتاب الأدب /حدیث: 4937]

سیدنا ابوموسیٰ اشعری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص چوسر کھیلا اس نے اللہ اور اس کے رسول کی نافرمانی کی۔“ [سنن ابي داود/كتاب الأدب /حدیث: 4938]

جناب سلیمان بن بریدہ اپنے والد (سیدنا بریدہ رضی اللہ عنہ) سے روایت کرتے ہیں کہ نبی کریم صلی اللہ علیہ وسلم نے فرمایا: ”جو شخص «نَرْدَشِير» (چوسر) کھیلا، گویا اس نے اپنا ہاتھ سور کے گوشت اور خون سے آلودہ کیا۔“ [سنن ابي داود/كتاب الأدب /حدیث: 4939]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ایک آدمی کو دیکھا، وہ کبوتری کے پیچھے لگا ہوا تھا۔ آپ صلی اللہ علیہ وسلم نے فرمایا: ”شیطان، شیطانہ کے پیچھے لگا ہوا ہے۔“ [سنن ابي داود/كتاب الأدب /حدیث: 4940]

سیدنا عبداللہ بن عمرو رضی اللہ عنہ نبی کریم صلی اللہ علیہ وسلم سے بیان کرتے ہیں کہ ”رحم کرنے والوں پر رحمٰن رحم فرمائے گا۔ تم اہل زمین پر رحم کرو، آسمان والا تم پر رحم کرے گا۔“ مسدد نے (سند میں وارد ”ابوقابوس“ کے متعلق) یہ نہیں کہا کہ وہ سیدنا عبداللہ بن عمرو رضی اللہ عنہ کا مولیٰ تھا۔ نیز بوضاحت کہا کہ سیدنا عبداللہ بن عمرو رضی اللہ عنہ نے روایت کیا کہ نبی کریم صلی اللہ علیہ وسلم نے فرمایا ہے۔ [سنن ابي داود/كتاب الأدب /حدیث: 4941]

سیدنا ابوہریرہ رضی اللہ عنہ کہتے ہیں کہ میں نے اس حجرے والے یعنی سیدنا ابوالقاسم صادق و مصدوق صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”کسی بدبخت سے ہی رحمت چھینی جاتی ہے۔“ [سنن ابي داود/كتاب الأدب /حدیث: 4942]