سیدنا زید بن ارقم رضی اللہ عنہ سے مروی ہے کہ نبی کریم صلی اللہ علیہ وسلم نے ہمیں خطبہ دیا اور فرمایا: ” «أَمَّا بَعْدُ» ! حمد و صلاۃ کے بعد۔“ [سنن ابي داود/كتاب الأدب /حدیث: 4973]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”تم میں سے کوئی شخص (انگور کے لیے) لفظ ”کرم“ استعمال نہ کرے۔ بیشک ”کرم“ (سخاوت کا منطوق) مسلمان آدمی ہے۔ بلکہ یوں کہا کرو «حَدَائِقُ الْأَعْنَابِ» ”انگوروں کے باغات۔“” [سنن ابي داود/كتاب الأدب /حدیث: 4974]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں سے کوئی شخص اپنے غلام اور لونڈی کو «عَبْدِي» ”میرے بندے۔“ یا «أَمَتِي» ”میری بندی“ کے لفظ سے ہرگز نہ پکارے۔ اور نہ کوئی غلام اپنے مالک کو «رَبِّي» اور «رَبَّتِي» ”میرے رب“ کہے۔ مالک کو چاہیے کہ یوں پکارے «فَتَايَ» ”اے میرے جوان“ «فَتَاتِي» ”اے میری لڑکی“ اور مملوک کو چاہیے کہ کہے «سَيِّدِي، سَيِّدَتِي» ”اے میرے سردار!“ بلاشبہ تم سب مملوک ہو اور ”رب“ اللہ عز وجل ہی ہے۔“ [سنن ابي داود/كتاب الأدب /حدیث: 4975]

ابویونس (سلیمان بن جبیر) نے سیدنا ابوہریرہ رضی اللہ عنہ سے بیان کیا اور اس روایت میں نبی کریم صلی اللہ علیہ وسلم کا ذکر نہیں کیا۔ (موقوف روایت بیان کی اور «سَيِّدِي وَسَيِّدَتِي» کی بجائے کہا) ”اور چاہیے کہ «سَيِّدِي» اور «مَوْلَايَ» ”اے میرے سردار!“ کہے۔“ [سنن ابي داود/كتاب الأدب /حدیث: 4976]

جناب عبداللہ بن بریدہ اپنے والد (سیدنا بریدہ رضی اللہ عنہ) سے روایت کرتے ہیں کہ رسول اللہ صلی اللہ علیہ وسلم نے فرمایا: ”کسی منافق کو «سَيِّد» (سردار، آقا) کہہ کر مت پکارو۔ اس لیے کہ اگر وہ سردار ہوا تو تم نے اپنے رب «عَزَّ وَجَلَّ» کو ناراض کر دیا۔“ [سنن ابي داود/كتاب الأدب /حدیث: 4977]

سیدنا ابوامامہ رضی اللہ عنہ اپنے والد (سہل بن حنیف رضی اللہ عنہ) سے روایت کرتے ہیں کہ رسول اللہ صلی اللہ علیہ وسلم نے فرمایا: ”تم میں سے کوئی شخص ہرگز یوں نہ کہے: ”میرا نفس خبیث ہو گیا ہے۔“ اگر کہنا بھی ہو تو یوں کہے: ”میری طبیعت پریشان ہے، طبیعت خراب ہے۔““ [سنن ابي داود/كتاب الأدب /حدیث: 4978]

ام المؤمنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”تم میں سے کوئی شخص ہرگز یوں نہ کہے: «خَبُثَتْ نَفْسِي» ”میرا جی جوش مارتا ہے“، بلکہ یوں کہے: «لَقِسَتْ نَفْسِي» ”میرا جی پریشان ہے۔““ [سنن ابي داود/كتاب الأدب /حدیث: 4979]

سیدنا حذیفہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”یوں مت کہو: جو اللہ چاہے اور فلاں چاہے، بلکہ یوں کہو: جو اللہ چاہے پھر فلاں چاہے۔“ [سنن ابي داود/كتاب الأدب /حدیث: 4980]

سیدنا عدی بن حاتم رضی اللہ عنہ سے روایت ہے کہ ایک خطیب نے نبی کریم صلی اللہ علیہ وسلم کے سامنے خطبہ دیا تو اس نے کہا «مَنْ يُطِعِ اللَّهَ وَرَسُولَهُ فَقَدْ رَشَدَ وَمَنْ يَعْصِهِمَا» ”جس نے اللہ اور اس کے رسول کی اطاعت کی، بلاشبہ وہ ہدایت یافتہ ہوا اور جس نے ان دونوں کی نافرمانی کی۔“ آپ صلی اللہ علیہ وسلم نے فرمایا: ”چل کھڑا ہو۔“ یا فرمایا: ”چلا جا، تو بہت برا خطیب ہے۔“ [سنن ابي داود/كتاب الأدب /حدیث: 4981]

جناب ابوملیح ایک شخص سے روایت کرتے ہیں، انہوں نے کہا کہ میں نبی کریم صلی اللہ علیہ وسلم کے ساتھ سواری پر ان کے پیچھے بیٹھا ہوا تھا کہ آپ صلی اللہ علیہ وسلم کی سواری کو ٹھوکر سی لگی تو میری زبان سے نکلا: ”ہلاک ہو شیطان۔“ تو آپ صلی اللہ علیہ وسلم نے فرمایا: ”یہ مت کہو، تم جب یہ کہتے ہو تو وہ پھول جاتا ہے یہاں تک کہ ایک گھر کے برابر ہو جاتا ہے اور وہ سمجھتا ہے کہ میری قوت سے ایسا ہوا لیکن کہو «بِسْمِ اللّٰهِ» ”اللہ کے نام سے“ تم جب ایسے کہتے ہو تو وہ سکڑ جاتا ہے، حتیٰ کہ مکھی کی مانند ہو جاتا ہے۔“ [سنن ابي داود/كتاب الأدب /حدیث: 4982]