سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”حسد (دوسروں پر جلنے اور کڑھنے) سے اپنے آپ کو بچاؤ، بلاشبہ حسد نیکیوں کو ایسے کھا جاتا ہے جیسے آگ ایندھن کو“ یا فرمایا: ”جیسے آگ گھاس پھوس کو کھا جاتی ہے۔“ [سنن ابي داود/كتاب الأدب /حدیث: 4903]

جناب سہل بن ابوامامہ رضی اللہ عنہ نے بیان کیا کہ وہ اور ان کے والد مدینہ میں سیدنا انس بن مالک رضی اللہ عنہ کے ہاں گئے۔ یہ سیدنا عمر بن عبدالعزیز رضی اللہ عنہ کے دور کی بات ہے، جبکہ وہ مدینہ کے گورنر تھے۔ ہم سیدنا انس رضی اللہ عنہ کے ہاں پہنچے تو وہ بڑی ہلکی پھلکی نماز پڑھ رہے تھے، گویا کہ مسافر کی نماز ہو یا اس کے قریب۔ جب انہوں نے سلام پھیرا تو میرے والد نے پوچھا: ”اللہ آپ پر رحم فرمائے! یہ بتائیں کہ یہ فرض نماز تھی یا آپ نے کوئی نفل پڑھے ہیں؟“ انہوں نے کہا: ”یہ فرض نماز تھی اور رسول اللہ صلی اللہ علیہ وسلم کی نماز ایسے ہی ہوتی تھی۔ میں نے اس میں سے کوئی چیز نہیں چھوڑی سوائے اس کے جو میں بھول گیا ہوں (تو وہ الگ بات ہے)۔“ انہوں نے بیان کیا کہ رسول اللہ صلی اللہ علیہ وسلم فرمایا کرتے تھے: ”اپنی جانوں پر سختی مت کرو ورنہ تم پر سختی کی جائے گی۔ بلاشبہ کئی قوموں نے اپنی جانوں پر سختیاں کیں تو اللہ نے بھی ان پر سختی کی۔ جنگلوں میں معبدوں کے اندر اور گرجا گھروں میں انہی لوگوں کے بقایا لوگ ہیں (جن کا قرآن مجید میں ذکر ہے)۔ ﴿ان لوگوں نے رہبانیت اختیار کر لی، انہوں نے یہ بدعت نکالی، ہم نے اسے ان پر فرض نہیں کیا تھا﴾ [سورة الحديد: 27] ۔“ پھر ہم اگلے دن صبح کے وقت ان کے پاس گئے تو انہوں نے کہا: ”کیا تم سوار نہیں ہو جاتے کہ کچھ دیکھو اور عبرت پکڑو؟“ والد نے کہا: ”ہاں چلتے ہیں۔“ چنانچہ ہم سب سوار ہو لیے۔ تو انہوں نے کچھ بستیاں دکھائیں کہ ان کے لوگ ہلاک ہو گئے تھے، مر کھپ گئے تھے اور انہیں برباد کر دیا گیا تھا اور ان کی بستیاں اپنی چھتوں پر گری پڑی تھیں۔ انہوں نے کہا: ”کیا تم ان بستیوں کو پہچانتے ہو؟“ والد نے کہا: ”نہیں، مجھے ان بستیوں کا اور ان لوگوں کا کوئی علم نہیں ہے۔“ انہوں نے بتایا کہ یہ اس قوم کی بستیاں ہیں جن کو بغاوت اور حسد نے ہلاک کر کے رکھ دیا تھا۔ بلاشبہ حسد سے نیکیوں کا نور بجھ جاتا ہے اور بغاوت اس کی تصدیق کرتی ہے یا اسے جھٹلا دیتی ہے۔ ”آنکھ زنا کرتی ہے اور پھر ہاتھ، پاؤں، جسم، زبان اور شرمگاہ اس کی تصدیق کر دیتے ہیں یا تکذیب۔“ [سنن ابي داود/كتاب الأدب /حدیث: 4904]

سیدنا ابودرداء رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”بندہ جب کسی چیز کو لعنت کرتا ہے تو وہ لعنت آسمان کی جانب چڑھتی ہے تو اس کے آگے آسمان کے دروازے بند کر دیے جاتے ہیں۔ پھر وہ زمین کی طرف اترتی ہے تو اس کے آگے اس کے دروازے بند کر دیے جاتے ہیں۔ پھر وہ دائیں اور بائیں جاتی ہے۔ اگر کوئی جگہ نہ پائے تو جس پر لعنت کی گئی ہو اس پر واقع ہو جاتی ہے، بشرطیکہ وہ چیز اس کی حقدار ہو ورنہ اس کے کہنے والے کی طرف لوٹ جاتی ہے۔“ امام ابوداؤد رحمہ اللہ کہتے ہیں کہ مروان بن محمد نے کہا: ”(سند میں مذکور راوی ولید بن رباح دراصل) رباح بن ولید ہے، یحییٰ بن حسان کو اس میں وہم ہوا ہے۔“ [سنن ابي داود/كتاب الأدب /حدیث: 4905]

سیدنا سمرہ بن جندب رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”اللہ کی لعنت سے لعنت مت کیا کرو اور اللہ کے غضب اور دوزخ کی بددعا مت دیا کرو۔“ [سنن ابي داود/كتاب الأدب /حدیث: 4906]

سیدنا ابودرداء رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ”جو بہت زیادہ لعنت کرنے والے ہوں گے وہ (کسی کے) سفارشی یا گواہ نہیں بن سکیں گے۔“ [سنن ابي داود/كتاب الأدب /حدیث: 4907]

سیدنا ابن عباس رضی اللہ عنہما سے روایت ہے کہ ایک شخص نے ہوا کو لعنت کی۔ اور مسلم (مسلم بن ابراہیم) کے الفاظ ہیں کہ نبی کریم صلی اللہ علیہ وسلم کے زمانے میں ہوا سے ایک شخص کی چادر اڑ گئی تو اس نے اسے لعنت کر دی، تو نبی کریم صلی اللہ علیہ وسلم نے فرمایا: ”اسے لعنت مت کرو، بلاشبہ یہ (اللہ کے حکم کی) پابند ہے۔ اور بلاشبہ جس نے کسی چیز کو لعنت کی جب کہ وہ اس کی حقدار نہ ہو، تو یہ لعنت کرنے والے پر لوٹ آتی ہے۔“ [سنن ابي داود/كتاب الأدب /حدیث: 4908]

ام المؤمنین سیدہ عائشہ رضی اللہ عنہا بیان کرتی ہیں کہ ان کی کوئی چیز چوری ہو گئی تو وہ (چور کو) بد دعا دینے لگیں۔ تو رسول اللہ صلی اللہ علیہ وسلم نے ان سے فرمایا: ”اس کی سزا کو اس سے ہلکا مت کرو۔“ [سنن ابي داود/كتاب الأدب /حدیث: 4909]

سیدنا انس بن مالک رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”غصہ مت کیا کرو۔ ایک دوسرے سے حسد مت کیا کرو۔ ایک دوسرے کو پیٹھ مت دیا کرو (کہ میل جول چھوڑ دو) بلکہ اللہ کے بندے بھائی بھائی بن کر رہو۔ کسی مسلمان کے لیے حلال نہیں کہ اپنے بھائی سے تین رات سے زیادہ میل جول چھوڑے رہے۔“ [سنن ابي داود/كتاب الأدب /حدیث: 4910]

سیدنا ابو ایوب انصاری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کسی مسلمان کے لیے جائز نہیں کہ اپنے بھائی کے ساتھ تین دن سے زیادہ میل جول چھوڑے رہے کہ جب دونوں کی ملاقات ہو تو یہ بھی منہ پھیر لے اور وہ بھی، اور ان میں سب سے بہتر وہ ہے جو «اَلسَّلَامُ عَلَیْكُمْ» ”تم پر سلامتی ہو“ کہنے میں ابتداء کرے۔“ [سنن ابي داود/كتاب الأدب /حدیث: 4911]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”کسی مسلمان کو حلال نہیں کہ کسی صاحب ایمان سے تین دن سے زیادہ مقاطعہ کرے۔ اگر تین دن گزر جائیں تو چاہیے کہ اس سے ملے اور اس کو سلام کہے۔ اگر وہ سلام کا جواب دے دے تو اجر و ثواب میں دونوں شریک ہو گئے۔ اگر وہ جواب نہ دے تو اس کا گناہ اسی دوسرے کے ذمے ہے۔“ احمد (احمد بن سعید سرخسی) نے مزید کہا: ”سلام کرنے والا مقاطعے کے گناہ سے نکل گیا۔“ [سنن ابي داود/كتاب الأدب /حدیث: 4912]