حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”اذان وہ لوگ دیں جو زیادہ بہتر (نیک) ہوں، اور تمہیں نماز وہ افراد پڑھائیں جو قرآن پڑھنے والے (حافظ اور عالم) ہوں۔“ [سنن ابن ماجه/كتاب الأذان والسنة فيه/حدیث: 726]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جس نے ثواب کی نیت سے سات سال (مسلسل) اذان دی، اللہ تعالیٰ اس کے لیے جہنم سے نجات لکھ دیتا ہے۔“ [سنن ابن ماجه/كتاب الأذان والسنة فيه/حدیث: 727]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص بارہ برس تک اذان دیتا ہے، اس کے لیے جنت واجب ہو جاتی ہے، اور اس کے لیے روزانہ اذان کے عوض ساٹھ نیکیاں لکھی جاتی ہیں اور ہر اقامت کے عوض تیس نیکیاں لکھی جاتی ہیں۔“ [سنن ابن ماجه/كتاب الأذان والسنة فيه/حدیث: 728]

حضرت انس بن مالک رضی اللہ عنہ سے روایت ہے، انہوں نے فرمایا: ”صحابہ کرام رضی اللہ عنہم کو کسی ایسی چیز کی تلاش تھی جس کو علامت بنا کر وہ نماز کی اطلاع دے سکیں۔ (آخر کار) حضرت بلال رضی اللہ عنہ کو حکم دیا گیا کہ اذان میں دو بار کلمات کہیں اور اقامت میں ایک ایک بار کہیں۔“ [سنن ابن ماجه/كتاب الأذان والسنة فيه/حدیث: 729]

حضرت انس رضی اللہ عنہ سے روایت ہے کہ حضرت بلال رضی اللہ عنہ کو حکم دیا گیا تھا کہ ”اذان کے کلمات دو دو بار کہیں اور اقامت کے کلمات ایک ایک بار۔“ [سنن ابن ماجه/كتاب الأذان والسنة فيه/حدیث: 730]

حضرت سعد بن عمار بن سعد رضی اللہ عنہ سے روایت ہے، انہوں نے اپنے والد سے اور انہوں نے اپنے دادا سے روایت کی کہ ”حضرت بلال رضی اللہ عنہ کی اذان دہری اور اقامت اکہری ہوتی تھی۔“ [سنن ابن ماجه/كتاب الأذان والسنة فيه/حدیث: 731]

حضرت ابو رافع رضی اللہ عنہ جو نبی صلی اللہ علیہ وسلم کے غلام تھے سے روایت ہے، انہوں نے فرمایا: ”میں نے حضرت بلال رضی اللہ عنہ کو رسول اللہ صلی اللہ علیہ وسلم کی موجودگی میں اذان کے کلمات دو دو بار اور اقامت کے کلمات ایک ایک بار کہتے دیکھا۔“ [سنن ابن ماجه/كتاب الأذان والسنة فيه/حدیث: 732]

جناب ابو شعثاء رحمہ اللہ سے روایت ہے، انہوں نے فرمایا: ”ہم حضرت ابو ہریرہ رضی اللہ عنہ کے ساتھ مسجد میں بیٹھے ہوئے تھے۔ (اسی اثناء میں) مؤذن نے اذان کہی۔ ایک آدمی مسجد سے اٹھا اور چل دیا۔ حضرت ابو ہریرہ رضی اللہ عنہ اس کی طرف دیکھتے رہے حتی کہ وہ مسجد سے نکل گیا۔ تب حضرت ابو ہریرہ رضی اللہ عنہ نے فرمایا: ”اس شخص نے حضرت ابو القاسم صلی اللہ علیہ وسلم کی حکم عدولی کی ہے۔““ [سنن ابن ماجه/كتاب الأذان والسنة فيه/حدیث: 733]

حضرت عثمان رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جو شخص مسجد میں اذان ہوجانے کے بعد مسجد سے نکل گیا، وہ کسی مجبوری کی وجہ سے نہیں نکلا اور واپس آنے کا ارادہ بھی نہیں رکھتا تو وہ منافق ہے۔“ [سنن ابن ماجه/كتاب الأذان والسنة فيه/حدیث: 734]