حضرت عبداللہ بن عمرو رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جب حضرت سلیمان بن داود علیہ السلام بیت المقدس کی تعمیر سے فارغ ہوئے تو انہوں نے اللہ سے تین چیزیں مانگیں، ایسا فیصلہ جو اللہ کے فیصلے کے مطابق ہو اور ایسی بادشاہت جو ان کے بعد کسی کے شایان نہ ہو اور جو شخص بھی اس مسجد میں صرف نماز کی نیت سے آئے وہ گناہوں سے اس طرح پاک صاف ہو جائے جس طرح اس دن (گناہوں سے پاک) تھا جب اسے اس کی ماں نے جنم دیا تھا۔“ نبی صلی اللہ علیہ وسلم نے فرمایا: ”دو چیزیں تو انہیں مل چکیں اور مجھے امید ہے کہ تیسری بھی مل ہی گئی ہے۔“ [سنن ابن ماجه/كتاب إقامة الصلاة والسنة/حدیث: 1408]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کجاوے کس کر صرف تین مسجدوں کی طرف سفر کیا جا سکتا ہے۔ مسجد حرام، میری یہ مسجد (مسجد نبوی) اور مسجد اقصیٰ۔“ [سنن ابن ماجه/كتاب إقامة الصلاة والسنة/حدیث: 1409]

حضرت عبداللہ بن عمرو بن عاص رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”کجاوے کس کر سفر نہ کیا جائے مگر تین مسجدوں کی طرف: مسجد حرام کی طرف، مسجد اقصیٰ کی طرف اور میری اس مسجد کی طرف۔“ [سنن ابن ماجه/كتاب إقامة الصلاة والسنة/حدیث: 1410]

نبی صلی اللہ علیہ وسلم کے صحابی حضرت اسید بن ظہیر انصاری رضی اللہ عنہ سے روایت ہے، نبی صلی اللہ علیہ وسلم نے فرمایا: ”مسجد قباء میں ایک نماز ایک عمرے کے برابر ہے۔“ [سنن ابن ماجه/كتاب إقامة الصلاة والسنة/حدیث: 1411]

حضرت ابو امامہ بن سہل بن حنیف رضی اللہ عنہ نے اپنے والد حضرت سہل بن حنیف رضی اللہ عنہ سے روایت کیا ہے کہ اللہ کے رسول صلی اللہ علیہ وسلم نے فرمایا: ”جو شخص اپنے گھر میں وضو کرے، پھر مسجد قباء میں آئے اور اس میں ایک نماز پڑھے، اسے ایک عمرے کا ثواب ملے گا۔“ [سنن ابن ماجه/كتاب إقامة الصلاة والسنة/حدیث: 1412]

حضرت انس بن مالک رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”آدمی کا اپنے گھر میں نماز پڑھنا ایک نماز کے برابر ہے اور اس کا قبیلے (یا محلے) کی مسجد میں نماز پڑھنا پچیس نمازوں کے برابر ہے اور جامع مسجد میں نماز پڑھنا پانچ سو نمازوں کے برابر ہے، اور مسجدِ اقصیٰ میں نماز پڑھنا پچاس ہزار نمازوں کے برابر ہے اور میری مسجد (مسجد نبوی) میں نماز پڑھنا پچاس ہزار نمازوں کے برابر ہے اور مسجدِ حرام میں نماز پڑھنا ایک لاکھ نمازوں کے برابر ہے۔“ [سنن ابن ماجه/كتاب إقامة الصلاة والسنة/حدیث: 1413]

حضرت ابی بن کعب رضی اللہ عنہ سے روایت ہے انہوں نے فرمایا: جب مسجد نبوی ایک چھپر کی صورت میں تھی تو رسول اللہ صلی اللہ علیہ وسلم کھجور کے ایک تنے کی طرف (منہ کر کے) نماز پڑھا کرتے تھے اور اسی تنے سے ٹیک لگا کر خطبہ دیتے تھے۔ ایک صحابی نے عرض کیا: ”کیا ہم آپ کے لیے کوئی ایسی چیز نہ بنا دیں جس پر آپ جمعے کے دن (خطبہ دینے کے لیے) کھڑے ہوا کریں تاکہ لوگ آپ کی طرف متوجہ ہو سکیں اور آپ کا خطبہ (اچھی طرح) سن سکیں؟“ رسول اللہ صلی اللہ علیہ وسلم نے فرمایا: ”ہاں۔“ اس نے آپ کے لیے (منبر کے) تین درجے بنا دیے۔ وہی (تین سیڑھیاں) اب (موجود) منبر کا سب سے بالائی حصہ ہیں۔ جب منبر تیار ہوگیا تو صحابہ کرام رضی اللہ عنہم نے اسے اسی مقام پر رکھا جہاں وہ اب ہے۔ جب رسول اللہ صلی اللہ علیہ وسلم اٹھ کر منبر پر جانے لگے تو اس تنے کے پاس سے گزرے جس سے ٹیک لگا کر خطبہ دیا کرتے تھے۔ جب آپ صلی اللہ علیہ وسلم اس سے آگے بڑھے تو وہ زور زور سے رونے لگا حتی کہ (شدتِ غم سے) اس کی آواز پھٹ گئی۔ جب رسول اللہ صلی اللہ علیہ وسلم نے تنے (کے رونے) کی آواز سنی تو (منبر سے) نیچے تشریف لے آئے، اس (تنے) پر ہاتھ پھیرتے رہے حتی کہ وہ خاموش ہوگیا۔ اس کے بعد آپ صلی اللہ علیہ وسلم پھر منبر پر تشریف لے گئے۔ آپ صلی اللہ علیہ وسلم جب نماز پڑھتے تھے تو اس کے پیچھے نماز پڑھتے تھے۔ جب مسجد نبوی کو (دوبارہ تعمیر کرنے کے لیے) منہدم کیا گیا اور مسجد کی عمارت میں تبدیلی (اور توسیع) کی گئی تو وہ تنا حضرت ابی بن کعب رضی اللہ عنہ نے لے لیا، وہ ان کے پاس ان کے گھر ہی میں رہا حتی کہ بہت پرانا ہوگیا، پھر اسے دیمک نے کھا لیا اور وہ ریزہ ریزہ ہوگیا۔ [سنن ابن ماجه/كتاب إقامة الصلاة والسنة/حدیث: 1414]

حضرت عبداللہ بن عباس اور حضرت انس رضی اللہ عنہما سے روایت ہے کہ نبی کریم صلی اللہ علیہ وسلم ایک تنے سے ٹیک لگا کر خطبہ دیتے تھے، جب رسول اللہ صلی اللہ علیہ وسلم نے منبر بنوایا تو آپ صلی اللہ علیہ وسلم منبر کی طرف چلے تو وہ تنا (ستون) رو پڑا، نبی کریم صلی اللہ علیہ وسلم اس کے پاس آئے اور اسے سینے سے لگایا، تب وہ خاموش ہوا، نبی کریم صلی اللہ علیہ وسلم نے فرمایا: ”اگر میں اسے گلے سے نہ لگاتا تو یہ قیامت تک روتا رہتا۔“ [سنن ابن ماجه/كتاب إقامة الصلاة والسنة/حدیث: 1415]

حضرت ابو حازم رضی اللہ عنہ سے روایت ہے کہ لوگوں میں رسول اللہ صلی اللہ علیہ وسلم کے منبر کے بارے میں اختلاف پیدا ہوگیا کہ وہ کس چیز (کی لکڑی) سے بنا ہوا تھا؟ چنانچہ وہ حضرت سہل بن سعد رضی اللہ عنہ کے پاس آئے اور ان سے پوچھا۔ انہوں نے فرمایا: ”یہ بات مجھ سے زیادہ جاننے والا کوئی باقی نہیں رہا۔ وہ غابہ کے جھاؤ سے بنا تھا۔ اسے فلاں خاتون کے فلاں بڑھئی غلام نے بنایا تھا۔ وہ اسے لے کر حاضر ہوا۔ جب وہ (اپنے مقام پر) رکھا گیا تو نبی صلی اللہ علیہ وسلم اس پر کھڑے ہوئے، آپ نے قبلے کی طرف منہ کیا۔ لوگ آپ کے پیچھے (آپ کی اقتدا میں نماز ادا کر رہے) تھے۔ رسول اللہ صلی اللہ علیہ وسلم نے قراءت کی، پھر رکوع کیا، پھر (رکوع سے) سر اٹھایا، پھر آپ الٹے پاؤں پیچھے ہٹے حتی کہ زمین پر سجدے کیے، پھر دوبارہ منبر پر کھڑے ہو گئے اور قراءت کی، پھر رکوع کیا، پھر قومہ کیا، پھر الٹے پاؤں پیچھے ہٹے حتی کہ زمین پر سجدے کیے۔“ [سنن ابن ماجه/كتاب إقامة الصلاة والسنة/حدیث: 1416]

حضرت جابر بن عبداللہ رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ایک درخت کی جڑ یا (فرمایا:) ایک درخت کے تنے کے قریب کھڑے ہوتے تھے، پھر آپ صلی اللہ علیہ وسلم نے منبر بنوا لیا تو وہ تنا رونے لگا حتی کہ مسجد میں موجود لوگوں نے اس کی آواز سنی، (وہ روتا رہا) حتی کہ رسول اللہ صلی اللہ علیہ وسلم نے اس کے پاس آ کر اس پر ہاتھ پھیرا تو وہ خاموش ہو گیا۔“ ایک آدمی نے کہا: ”اگر آپ صلی اللہ علیہ وسلم اس کے پاس نہ آتے تو وہ قیامت تک روتا رہتا۔“ [سنن ابن ماجه/كتاب إقامة الصلاة والسنة/حدیث: 1417]