حضرت ابو موسیٰ اشعری رضی اللہ عنہ سے روایت ہے، انہوں نے فرمایا: میں نے رسول اللہ صلی اللہ علیہ وسلم سے سوال کیا: ”بندہ لوگوں کو پہچاننا کب چھوڑ دیتا ہے؟“ نبی صلی اللہ علیہ وسلم نے فرمایا: ”جب وہ (آخرت کی چیزوں یا موت کے فرشتوں) کا مشاہدہ کر لیتا ہے۔“ [سنن ابن ماجه/كتاب الجنائز/حدیث: 1453]

حضرت ام المؤمنین ام سلمہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم ابو سلمہ رضی اللہ عنہ (کی میت) کے پاس آئے تو ان کی آنکھیں کھلی تھیں۔ آپ نے ان کی آنکھیں بند کر دیں اور فرمایا: ”جب روح قبض کی جاتی ہے تو نظر اس کا تعاقب کرتی ہے۔““ [سنن ابن ماجه/كتاب الجنائز/حدیث: 1454]

حضرت شداد بن اوس رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب تم اپنے فوت ہونے والوں کے پاس موجود ہو تو (ان کی) آنکھیں بند کر دیا کرو کیونکہ نظر بھی روح کے پیچھے پیچھے جاتی ہے اور اچھی بات کہو کیونکہ (اس وقت) گھر والے جو کچھ کہتے ہیں فرشتے اس پر آمین کہتے ہیں۔“ [سنن ابن ماجه/كتاب الجنائز/حدیث: 1455]

حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم نے حضرت عثمان بن مظعون رضی اللہ عنہ کو ان کی وفات کے بعد بوسہ دیا، گویا میں نبی صلی اللہ علیہ وسلم کے رخساروں پر آنسو بہتے دیکھ رہی ہوں۔“ [سنن ابن ماجه/كتاب الجنائز/حدیث: 1456]

حضرت عبداللہ بن عباس رضی اللہ عنہما اور حضرت عائشہ صدیقہ رضی اللہ عنہا سے روایت ہے کہ ”حضرت ابوبکر رضی اللہ عنہ نے نبی صلی اللہ علیہ وسلم کی وفات کے بعد آپ صلی اللہ علیہ وسلم کو بوسہ دیا۔“ [سنن ابن ماجه/كتاب الجنائز/حدیث: 1457]

حضرت ام عطیہ (نسیبہ بنت کعب انصاریہ رضی اللہ عنہا) سے روایت ہے، انہوں نے فرمایا: ہم رسول اللہ صلی اللہ علیہ وسلم کی صاحب زادی ام کلثوم کو غسل دے رہی تھیں کہ رسول اللہ صلی اللہ علیہ وسلم ہمارے پاس تشریف لائے آپ صلی اللہ علیہ وسلم نے فرمایا: ”اسے پانی اور بیری کے پتوں کے ساتھ تین بار یا پانچ بار غسل دو، اگر ضرورت محسوس ہو تو اس سے زیادہ بار غسل دے دینا اور آخر بار غسل دیتے وقت پانی میں کافور یا فرمایا: تھوڑا سا کافور ڈال لینا اور جب تم فارغ ہو جاؤ تو اطلاع دینا۔“ ہم نے (غسل دینے سے) فارغ ہو کر آپ صلی اللہ علیہ وسلم کو اطلاع دی تو آپ صلی اللہ علیہ وسلم نے اپنا تہ بند ہماری طرف پھینک دیا اور فرمایا: ”اسے اس کے جسم سے متصل پہنا دو۔“ [سنن ابن ماجه/كتاب الجنائز/حدیث: 1458]

ام عطیہ رضی اللہ عنہا سے یہی حدیث دوسری سند سے مروی ہے، اس میں یہ الفاظ ہیں (آپ صلی اللہ علیہ وسلم نے فرمایا:) ”اسے طاق بار غسل دو۔“ اور یہ الفاظ بھی ہیں: ”اسے تین بار یا پانچ بار غسل دو۔“ اور یہ الفاظ بھی ہیں: ”اس کی دائیں جانب سے اور وضو کے اعضاء سے غسل دینا شروع کرو۔“ اور اس میں یہ بھی ہے کہ ام عطیہ رضی اللہ عنہا نے فرمایا: ”ہم نے ان کے بالوں کو کنگھی کر کے تین لٹیں بنا دیں۔“ [سنن ابن ماجه/كتاب الجنائز/حدیث: 1459]

حضرت علی رضی اللہ عنہ سے روایت ہے انہوں نے فرمایا: نبی صلی اللہ علیہ وسلم نے مجھ سے فرمایا: ”اپنی ران ظاہر نہ کرو اور کسی زندہ یا مردہ کی ران کو نہ دیکھو۔“ [سنن ابن ماجه/كتاب الجنائز/حدیث: 1460]

حضرت عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”تمہارے مردوں کو وہ لوگ غسل دیں جو قابل اعتماد ہوں۔“ (تاکہ اگر میت کے بارے میں کوئی ایسی چیز معلوم ہو جس کا ظاہر کرنا مناسب نہیں تو وہ اسے راز رکھ سکیں۔) [سنن ابن ماجه/كتاب الجنائز/حدیث: 1461]

حضرت علی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے میت کو غسل دیا، کفن دیا، خوشبو لگائی اور اسے اٹھایا (قبرستان کو لے جاتے ہوئے اس کی چارپائی کو کندھا دیا)، اس کا جنازہ پڑھا اور اس کی جو چیز نظر آئی (جو ظاہر کرنے کے قابل نہ ہو) اسے ظاہر نہ کیا، تو وہ گناہوں سے اس طرح پاک صاف ہو جاتا ہے جس طرح اپنی ماں کے ہاں پیدا ہونے کے دن (گناہوں سے پاک صاف) تھا۔“ [سنن ابن ماجه/كتاب الجنائز/حدیث: 1462]