حضرت عبداللہ بن عمرو رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”دنیا (عارضی) فائدے کی چیز ہے اور دنیا کے سازوسامان میں نیک عورت سے بہتر کوئی چیز نہیں۔“ [سنن ابن ماجه/كتاب النكاح/حدیث: 1855]

حضرت ثوبان رضی اللہ عنہ سے روایت ہے، انہوں نے فرمایا: جب سونے چاندی کے بارے میں حکم نازل ہوا تو صحابہ کرام رضی اللہ عنہم نے (آپس میں) کہا: ”ہم کون سا مال حاصل کریں؟“ حضرت عمر رضی اللہ عنہ نے فرمایا: ”میں تمہیں یہ (مسئلہ) معلوم کر کے بتاتا ہوں۔“ انہوں نے اپنے اونٹ کو تیز چلایا، حتی کہ نبی صلی اللہ علیہ وسلم تک پہنچ گئے۔ (ثوبان فرماتے ہیں:) میں بھی ان کے پیچھے پیچھے تھا۔ حضرت عمر رضی اللہ عنہ نے کہا: ”اے اللہ کے رسول صلی اللہ علیہ وسلم ! ہم کون سا مال حاصل (کرنے کی کوشش) کریں؟“ تو آپ صلی اللہ علیہ وسلم نے فرمایا: ”تمہیں چاہیے کہ شکر کرنے والا دل حاصل کرو اور ذکر کرنے والی زبان، اور مومن بیوی جو آخرت کے معاملات میں مرد کی مدد کرے۔“ [سنن ابن ماجه/كتاب النكاح/حدیث: 1856]

حضرت ابوامامہ رضی اللہ عنہ سے روایت ہے کہ نبی صلی اللہ علیہ وسلم فرمایا کرتے تھے: ”مومن کو اللہ کے تقوے کے بعد نیک بیوی سے بہتر کوئی چیز نہیں مل سکتی۔ (ایسی بیوی کہ) جب وہ اسے کوئی حکم دے تو وہ اس کی تعمیل کرے، جب اس کی طرف نظر اٹھا کر دیکھے تو اسے خوش کر دے، اگر اسے کوئی قسم دے تو وہ قسم پوری کر دے، اگر وہ اس کی نظروں سے اوجھل ہو (سفر وغیرہ میں چلا جائے) تو اپنی ذات کے بارے میں اور اس کے مال کے بارے میں اس سے مخلص رہے (خیانت نہ کرے)۔“ [سنن ابن ماجه/كتاب النكاح/حدیث: 1857]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”عورتوں سے چار چیزوں کی وجہ سے نکاح کیا جاتا ہے: (کسی سے) اس کے مال کی وجہ سے، (کسی سے) اس کے حسب و نسب کی وجہ سے، (کسی سے) اس کے حسن و جمال کی وجہ سے، (کسی سے) اس کی دین داری (اور نیکی) کی وجہ سے۔ تو دین دار عورت (کے حصول میں) کامیاب ہو جا، «تَرِبَتْ يَدَاكَ» ”تیرا بھلا ہو۔““ [سنن ابن ماجه/كتاب النكاح/حدیث: 1858]

حضرت عبداللہ بن عمرو رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”عورتوں سے ان کے حسن کی وجہ سے نکاح نہ کرو، ممکن ہے ان کا حسن انہیں (تکبر میں مبتلا کر کے) تباہ کر دے، ان سے ان کے مال کی وجہ سے نکاح نہ کرو، ممکن ہے ان کا مال انہیں سرکش بنا (کر گناہوں میں مبتلا کر) دے، البتہ ان کے دین کو پیش نظر رکھتے ہوئے نکاح کیا کرو۔ ایک سیاہ فام، ناک کٹی، دین دار لونڈی (خوبصورت، بے دین آزاد عورت سے) افضل ہے۔“ [سنن ابن ماجه/كتاب النكاح/حدیث: 1859]

حضرت جابر بن عبداللہ رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم کے زمانہ مبارک میں، میں نے ایک خاتون سے نکاح کیا۔ (اس کے بعد جب) میری ملاقات اللہ کے رسول صلی اللہ علیہ وسلم سے ہوئی تو آپ نے فرمایا: ”جابر! کیا آپ نے شادی کر لی؟“ میں نے کہا: جی ہاں! آپ نے فرمایا: ”کنواری سے یا بیوہ سے؟“ میں نے کہا: بیوہ سے۔ فرمایا: ”کنواری سے کیوں نہ کی جس سے تم دل بہلاتے؟“ میں نے کہا: میری کئی بہنیں تھیں۔ مجھے ڈر محسوس ہوا کہ وہ میرے اور ان کے درمیان حائل نہ ہو جائے۔ آپ نے فرمایا: ”تب یہ بات (درست ہے۔)““ [سنن ابن ماجه/كتاب النكاح/حدیث: 1860]

حضرت عتبہ بن عویم بن ساعدہ انصاری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کنواریوں سے نکاح کرو کیونکہ وہ شیریں دہن، زیادہ بچے پیدا کرنے والی اور تھوڑی چیز پر راضی رہنے والی ہوتی ہیں۔“ [سنن ابن ماجه/كتاب النكاح/حدیث: 1861]

حضرت انس بن مالک رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم سے سنا آپ فرما رہے تھے: ”جو شخص پاک صاف ہو کر اللہ سے ملاقات کرنا چاہتا ہے، اسے چاہیے کہ آزاد عورتوں سے نکاح کرے۔“” [سنن ابن ماجه/كتاب النكاح/حدیث: 1862]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”نکاح کرو، میں تمہاری کثرت پر فخر کروں گا۔“ [سنن ابن ماجه/كتاب النكاح/حدیث: 1863]

حضرت محمد بن سلمہ رضی اللہ عنہ سے روایت ہے، انہوں نے فرمایا: ”میں نے ایک عورت کو نکاح کا پیغام دیا۔ میں اس (کو دیکھنے) کے لیے چھپ جایا کرتا تھا حتی کہ میں نے اسے کھجوروں کے باغ میں دیکھ لیا۔“ (حاضرین میں سے) کسی نے کہا: ”آپ اللہ کے رسول صلی اللہ علیہ وسلم کے صحابی ہو کر بھی ایسا کرتے ہیں؟“ انہوں نے کہا: ”میں نے رسول اللہ صلی اللہ علیہ وسلم سے یہ فرمان سنا ہے: ”جب اللہ تعالیٰ کسی شخص کے دل میں کسی عورت سے نکاح کی خواہش ڈالے تو اسے دیکھ لینے میں کوئی حرج نہیں۔““ [سنن ابن ماجه/كتاب النكاح/حدیث: 1864]