حضرت حنظلہ کاتب (حنظلہ بن ربیع تمیمی رضی اللہ عنہ) سے روایت ہے انہوں نے فرمایا: ”ہم لوگ رسول اللہ صلی اللہ علیہ وسلم کی معیت میں ایک غزوے میں گئے، ہمارا گزر ایک مقتول عورت (کی لاش) کے پاس سے ہوا، اس کے پاس لوگ اکٹھے ہو گئے تھے، انہوں نے رسول اللہ صلی اللہ علیہ وسلم کے لیے جگہ بنا دی تو رسول اللہ صلی اللہ علیہ وسلم نے فرمایا: ”یہ عورت تو جنگ کرنے والوں کے ساتھ شریک ہونے والی نہ تھی۔“ پھر ایک آدمی سے فرمایا: ”خالد بن ولید رضی اللہ عنہ کے پاس جاؤ اور اسے کہو: رسول اللہ صلی اللہ علیہ وسلم آپ کو حکم دیتے ہیں کہ بچوں اور مزدوروں کو ہرگز قتل نہ کریں۔““ [سنن ابن ماجه/كتاب الجهاد/حدیث: 2842]

حضرت اسامہ بن زید رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم نے مجھے اُبنیٰ نامی بستی کی طرف بھیجا تو فرمایا: ”صبح کے وقت اُبنیٰ جاؤ، اسے نذرِ آتش کر دو۔“ [سنن ابن ماجه/كتاب الجهاد/حدیث: 2843]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے (یہودیوں کے قبیلے) بنو نضیر کے کھجوروں کو جلا دیا اور کاٹ دیا۔ یہ مقام (جہاں کھجوروں کے یہ باغ واقع تھے) بویرہ کہلاتا ہے۔ تب اللہ تعالیٰ نے یہ آیت نازل فرمائی: ﴿مَا قَطَعْتُمْ مِنْ لِينَةٍ أَوْ تَرَكْتُمُوهَا قَائِمَةً عَلَىٰ أُصُولِهَا فَبِإِذْنِ اللَّهِ وَلِيُخْزِيَ الْفَاسِقِينَ﴾ [سورة الحشر: 5] ”تم نے کھجوروں کے جو درخت کاٹ ڈالے یا جنہیں تم نے ان کی جڑوں پر باقی رہنے دیا۔ یہ سب اللہ تعالیٰ کے فرمان سے تھا اور اس لیے بھی کہ فاسقوں کو اللہ تعالیٰ رسوا کرے۔“ [سنن ابن ماجه/كتاب الجهاد/حدیث: 2844]

حضرت عبداللہ بن عمر رضی اللہ عنہما سے روایت ہے کہ نبی صلی اللہ علیہ وسلم نے بنو نضیر کے کھجوروں کے درخت جلائے اور کاٹے اور اسی کے بارے میں شاعر نے کہا: ”بنو لؤی (قریش) کے سرداروں کے لیے آسان ہو گیا کہ بویرہ میں ہر طرف پھیلی ہوئی آگ لگی ہو۔“ [سنن ابن ماجه/كتاب الجهاد/حدیث: 2845]

حضرت سلمہ بن اکوع رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم کے زمانے میں حضرت ابوبکر رضی اللہ عنہ کی قیادت میں قبیلہ ہوازن سے جنگ کی (اور فتح پائی)، انہوں نے بنو فزارہ کی ایک لڑکی انعام کے طور پر عطا فرمائی جو عرب کی انتہائی حسین عورتوں میں سے تھی۔ اس نے پرانی پوستین اوڑھ رکھی تھی۔ میں نے مدینہ پہنچ جانے تک اس کا کپڑا (اس کے جسم سے) ہٹا کر بھی نہ دیکھا۔ (مدینے میں) مجھے نبی صلی اللہ علیہ وسلم بازار میں ملے تو فرمایا: ”تیرا بھلا ہو، یہ مجھے ہبہ کر دو۔“ میں نے وہ رسول اللہ صلی اللہ علیہ وسلم کو ہبہ کر دی۔ آپ صلی اللہ علیہ وسلم نے اسے (مکے) بھیج کر اس کے بدلے میں ان مسلمان قیدیوں کو چھڑا لیا جو مکے میں قید تھے۔“ [سنن ابن ماجه/كتاب الجهاد/حدیث: 2846]

حضرت عبداللہ بن عمر رضی اللہ عنہ سے روایت ہے، انہوں نے فرمایا: ”میرا گھوڑا بھاگ گیا تو اسے دشمن نے پکڑ لیا، پھر (جنگ کے بعد) اس پر مسلمانوں نے قبضہ کیا تو واپس مجھے (ابن عمر کو) دے دیا گیا۔ یہ واقعہ رسول اللہ صلی اللہ علیہ وسلم کے زمانے کا ہے۔ (اس کے علاوہ) حضرت ابن عمر رضی اللہ عنہ کا ایک غلام بھاگ گیا اور رومیوں سے جا ملا۔ مسلمانوں نے ان پر فتح پائی تو حضرت خالد بن ولید رضی اللہ عنہ نے وہ غلام دوبارہ حضرت عمر رضی اللہ عنہ کو دے دیا۔ یہ واقعہ رسول اللہ صلی اللہ علیہ وسلم کی وفات کے بعد کا ہے۔“ [سنن ابن ماجه/كتاب الجهاد/حدیث: 2847]

حضرت زید بن خالد جہنی رضی اللہ عنہ سے روایت ہے، انہوں نے فرمایا: قبیلہ اشجع کا ایک آدمی خیبر میں (جنگ کے دوران میں) فوت ہوگیا۔ نبی صلی اللہ علیہ وسلم نے فرمایا: ”اپنے ساتھی کا جنازہ پڑھ لو۔“ لوگوں کو اس پر تعجب ہوا اور ان کے چہروں پر حیرت کے آثار ظاہر ہوئے۔ نبی صلی اللہ علیہ وسلم نے یہ دیکھا تو فرمایا: ”تمہارے ساتھی نے اللہ کی راہ میں (جہاد میں غنیمت میں) خیانت کی ہے۔“ حضرت زید رضی اللہ عنہ نے فرمایا: صحابہ رضی اللہ عنہم نے اس کے سامان کی تلاشی لی تو یہودیوں کے چند منکے ملے جن کی قیمت دو درہم کے برابر بھی نہیں تھی۔ [سنن ابن ماجه/كتاب الجهاد/حدیث: 2848]

حضرت عبداللہ بن عمر رضی اللہ عنہما سے روایت ہے انہوں نے فرمایا: نبی صلی اللہ علیہ وسلم کے سامان کی دیکھ بھال پر ایک آدمی متعین تھا جسے کرکرہ کہتے تھے۔ وہ فوت ہو گیا تو نبی صلی اللہ علیہ وسلم نے فرمایا: ”وہ جہنم میں ہے“۔ صحابہ کرام دیکھنے لگے (کہ اس کی کیا وجہ ہو سکتی ہے) تو انہیں اس کے پاس ایک چادر ملی یا عبا ملی جو اس نے (مال غنیمت میں سے) چرا لی تھی۔ [سنن ابن ماجه/كتاب الجهاد/حدیث: 2849]

حضرت عبادہ بن صامت رضی اللہ عنہ سے روایت ہے انہوں نے فرمایا: غزوہ حنین کے موقع پر رسول اللہ صلی اللہ علیہ وسلم نے ہمیں غنیمت کے پاس کھڑے ہوکر نماز پڑھائی، پھر رسول اللہ صلی اللہ علیہ وسلم نے اونٹ کے تھوڑے سے بال لیے، انہیں اپنی انگلیوں میں پکڑا اور فرمایا: ”اے لوگو! یہ بھی تمہاری غنیمتوں میں سے ہے۔ سوئی، دھاگہ اور اس سے کم و بیش چیز بھی ادا کرو۔ (غنیمت میں) خیانت قیامت کے دن خیانت کرنے والے کے لیے عار، عیب اور آگ بن جائے گی۔“ [سنن ابن ماجه/كتاب الجهاد/حدیث: 2850]