حضرت عائشہ رضی اللہ عنہا سے روایت ہے کہ ”جو شخص تم سے بیان کرے کہ اللہ کے رسول صلی اللہ علیہ وسلم نے کھڑے ہو کر پیشاب کیا تو اس کی تصدیق نہ کرو، آپ صلی اللہ علیہ وسلم بیٹھ کر ہی پیشاب کرتے تھے۔“ [سنن نسائي/ذكر الفطرة/حدیث: 29]

حضرت عبدالرحمن بن حسنہ رضی اللہ عنہ سے روایت ہے، انہوں نے کہا: اللہ کے رسول صلی اللہ علیہ وسلم ہمارے پاس تشریف لائے جب کہ آپ کے ہاتھ میں ڈھال جیسی کوئی چیز تھی۔ آپ صلی اللہ علیہ وسلم نے اسے نیچے رکھا اور اس کی اوٹ میں بیٹھ کر پیشاب کیا۔ لوگوں میں سے ایک شخص کہنے لگا: ”دیکھو! آپ اس طرح پیشاب کر رہے ہیں جیسے عورت پیشاب کرتی ہے۔“ آپ صلی اللہ علیہ وسلم نے اس کی بات سن لی اور فرمایا: ”کیا تجھے علم نہیں کہ بنی اسرائیل کے ایک شخص کو کیا سزا ملی تھی؟ انہیں جب پیشاب لگ جاتا تو وہ قینچی سے (اتنا کپڑا) کاٹتے تھے، چنانچہ ان کے ساتھی نے انہیں روکا تو اسے قبر میں عذاب دیا گیا۔“ [سنن نسائي/ذكر الفطرة/حدیث: 30]

حضرت ابن عباس رضی اللہ عنہما سے روایت ہے کہ اللہ کے رسول صلی اللہ علیہ وسلم دو قبروں کے پاس سے گزرے تو فرمایا: ”تحقیق ان قبروں والوں کو عذاب ہو رہا ہے اور انہیں کسی بھاری کام (کہ جس سے بچنا ناممکن ہو) کی وجہ سے عذاب نہیں ہو رہا۔ اس قبر والا تو اپنے پیشاب کے چھینٹوں سے نہیں بچتا تھا اور اس قبر والا چغلیاں کھاتا تھا۔“ پھر آپ صلی اللہ علیہ وسلم نے کھجور کی تازہ شاخ منگوائی اور اسے چیر کر دو حصے کر دیے۔ پھر ایک اس قبر پر گاڑ دی اور ایک دوسری پر۔ پھر فرمایا: ”امید ہے جب تک یہ خشک نہیں ہوتیں، ان سے عذاب میں تخفیف کی جائے گی۔“ اس روایت کو بیان کرتے ہوئے منصور نے اعمش کی مخالفت کی ہے کہ اس نے یہ روایت مجاہد بواسطہ ابن عباس بیان کی ہے، یعنی مجاہد اور ابن عباس کے درمیان طاؤس کا واسطہ ذکر نہیں کیا۔ [سنن نسائي/ذكر الفطرة/حدیث: 31]

حضرت امیمہ بنت رقیقہ رضی اللہ عنہا سے روایت ہے کہ: ”نبی صلی اللہ علیہ وسلم کے پاس لکڑی کا ایک پیالہ تھا جس میں آپ (رات کے وقت) پیشاب کرتے تھے اور اسے اپنی چارپائی کے نیچے رکھ لیتے تھے۔“ [سنن نسائي/ذكر الفطرة/حدیث: 32]

حضرت عائشہ رضی اللہ عنہا فرماتی ہیں: ”لوگ کہتے ہیں کہ نبی صلی اللہ علیہ وسلم نے حضرت علی رضی اللہ عنہ کو وصیت کی۔ حقیقت یہ ہے کہ آپ صلی اللہ علیہ وسلم نے تھال منگوایا کہ اس میں پیشاب کریں، مگر (اس سے قبل ہی) آپ صلی اللہ علیہ وسلم کا جسم ڈھیلا پڑ گیا (آپ صلی اللہ علیہ وسلم فوت ہو گئے) مجھے پتہ بھی نہ چلا، تو آپ صلی اللہ علیہ وسلم نے کس کو وصیت کی؟“ شیخ ابن سنی رحمہ اللہ نے کہا: ”سند میں مذکور راوی ازہر سے مراد ازہر بن سعد سمان (گھی فروش) ہیں۔“ [سنن نسائي/ذكر الفطرة/حدیث: 33]

حضرت عبداللہ بن سرجس رضی اللہ عنہ سے روایت ہے، اللہ کے نبی صلی اللہ علیہ وسلم نے فرمایا: ”تم میں سے کوئی شخص بل (زمینی سوراخ) میں پیشاب نہ کرے۔“ شاگردوں نے قتادہ رحمہ اللہ سے پوچھا کہ بل میں پیشاب کرنا کیوں منع ہے؟ تو انہوں نے کہا: ”کہا جاتا ہے کہ سوراخ جنوں کی رہائش گاہیں ہیں۔“ [سنن نسائي/ذكر الفطرة/حدیث: 34]

حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ”ٹھہرے ہوئے پانی میں پیشاب کرنے سے منع فرمایا ہے“۔ [سنن نسائي/ذكر الفطرة/حدیث: 35]

حضرت عبداللہ بن مغفل رضی اللہ عنہ سے روایت ہے، نبی صلی اللہ علیہ وسلم نے فرمایا: ”تم میں سے کوئی اپنے غسل کی جگہ میں پیشاب نہ کرے کیونکہ عموماً وسوسے اسی سے پیدا ہوتے ہیں۔“ [سنن نسائي/ذكر الفطرة/حدیث: 36]

حضرت ابن عمر رضی اللہ عنہما سے روایت ہے کہ ”ایک آدمی نبی صلی اللہ علیہ وسلم کے پاس سے گزرا جبکہ آپ پیشاب کر رہے تھے، چنانچہ اس نے آپ کو سلام کہا، مگر آپ نے اسے سلام کا جواب نہیں دیا۔“ [سنن نسائي/ذكر الفطرة/حدیث: 37]

حضرت مہاجر بن قنفذ رضی اللہ عنہ سے روایت ہے کہ ”انہوں نے نبی صلی اللہ علیہ وسلم کو سلام کہا جب کہ آپ صلی اللہ علیہ وسلم پیشاب کر رہے تھے، تو آپ صلی اللہ علیہ وسلم نے سلام کا جواب نہ دیا حتیٰ کہ وضو کرنے لگے اور جب وضو مکمل کیا تو سلام کا جواب دیا۔“ [سنن نسائي/ذكر الفطرة/حدیث: 38]