حضرت (زید بن کعب) بہزی رضی اللہ عنہ سے روایت ہے کہ رسول اللہ صلی اللہ علیہ وسلم مکہ مکرمہ کے ارادے سے نکلے، آپ صلی اللہ علیہ وسلم احرام باندھے ہوئے تھے حتیٰ کہ جب وہ (لوگ) مقامِ روحاء میں پہنچے تو انہوں نے ایک زخمی جنگلی گدھا دیکھا، اس بات کا تذکرہ رسول اللہ صلی اللہ علیہ وسلم سے کیا گیا تو آپ صلی اللہ علیہ وسلم نے فرمایا: ”اسے کچھ نہ کہو، ہو سکتا ہے اسے زخمی کرنے والا آ جائے“، اتنے میں وہ بہزی بھی رسول اللہ صلی اللہ علیہ وسلم کے پاس آ گیا جس نے اسے زخمی کیا تھا، کہنے لگا: اے اللہ کے رسول! اس جنگلی گدھے کو آپ اپنی مرضی کے مطابق استعمال فرمائیے، رسول اللہ صلی اللہ علیہ وسلم نے حضرت ابوبکر رضی اللہ عنہ کو (تقسیم کرنے کا) حکم دیا تو انہوں نے اسے تمام ساتھیوں میں تقسیم کر دیا، پھر آپ صلی اللہ علیہ وسلم چل پڑے حتیٰ کہ جب رویثہ اور عرج کے درمیان اثایہ مقام پر پہنچے تو ایک ہرن سائے میں سر جھکائے کھڑا آرام کر رہا تھا اور اس میں ایک تیر گھسا ہوا تھا، رسول اللہ صلی اللہ علیہ وسلم نے ایک آدمی کو حکم دیا: ”اس کے پاس کھڑا رہ تاکہ کوئی شخص اسے پریشان نہ کرے حتیٰ کہ قافلہ اس سے آگے گزر جائے“۔ [سنن نسائي/كتاب مناسك الحج/حدیث: 2820]

حضرت صعب بن جثامہ لیثی رضی اللہ عنہ سے منقول ہے کہ انہوں نے رسول اللہ صلی اللہ علیہ وسلم کی خدمت میں ایک جنگلی گدھا بطور ہدیہ پیش کیا۔ آپ صلی اللہ علیہ وسلم اس وقت ابواء یا ودان مقام میں تھے۔ رسول اللہ صلی اللہ علیہ وسلم نے وہ انہیں واپس کر دیا۔ لیکن جب رسول اللہ صلی اللہ علیہ وسلم نے میرے چہرے کے غم و تاسف کو ملاحظہ فرمایا تو فرمانے لگے: ”ہم نے یہ صرف اس لیے تجھے واپس کیا ہے کہ ہم محرم ہیں۔“ [سنن نسائي/كتاب مناسك الحج/حدیث: 2821]

حضرت صعب بن جثامہ رضی اللہ عنہ سے مروی ہے کہ نبی صلی اللہ علیہ وسلم تشریف لائے حتیٰ کہ جب آپ صلی اللہ علیہ وسلم ودان میں پہنچے تو آپ صلی اللہ علیہ وسلم نے ایک جنگلی گدھا (میرے پاس بطور تحفہ) دیکھا، آپ صلی اللہ علیہ وسلم نے وہ مجھے واپس فرما دیا اور فرمانے لگے: ”ہم محرم ہیں، یہ شکار نہیں کھا سکتے (کیونکہ یہ ہمارے لیے شکار کیا گیا ہے)۔“ [سنن نسائي/كتاب مناسك الحج/حدیث: 2822]

حضرت ابن عباس رضی اللہ عنہ نے حضرت زید بن ارقم رضی اللہ عنہ سے کہا: کیا آپ نہیں جانتے کہ نبی صلی اللہ علیہ وسلم کی خدمتِ عالیہ میں شکار کیے ہوئے جانور کا ایک ٹکڑا پیش کیا گیا تھا جبکہ آپ محرم تھے، لہٰذا آپ نے اسے قبول نہ فرمایا۔ حضرت زید رضی اللہ عنہ نے کہا: ہاں! (میں جانتا ہوں)۔ [سنن نسائي/كتاب مناسك الحج/حدیث: 2823]

حضرت طاؤس رحمہ اللہ سے روایت ہے کہ حضرت زید بن ارقم رضی اللہ عنہ تشریف لائے تو حضرت ابن عباس رضی اللہ عنہما نے انھیں یاد کرواتے ہوئے کہا کہ آپ نے مجھے شکار کے گوشت کے بارے میں کیسے بتایا تھا جو رسول اللہ صلی اللہ علیہ وسلم کو احرام کی حالت میں پیش کیا گیا تھا؟ وہ فرمانے لگے: ہاں، ہاں! ایک آدمی نے آپ کی خدمت میں شکار شدہ جانور کے گوشت کا ٹکڑا پیش کیا تھا تو آپ نے اسے واپس فرما دیا تھا، نیز فرمایا: ”ہم یہ نہیں کھا سکتے، ہم محرم ہیں۔“ [سنن نسائي/كتاب مناسك الحج/حدیث: 2824]

حضرت ابن عباس رضی اللہ عنہما بیان کرتے ہیں کہ حضرت صعب بن جثامہ رضی اللہ عنہ نے رسول اللہ صلی اللہ علیہ وسلم کی خدمت میں جنگلی گدھے کی ایک ران پیش کی جس سے خون کے قطرے گر رہے تھے۔ آپ صلی اللہ علیہ وسلم اس وقت محرم تھے اور مقام قدید میں فروکش تھے، تو آپ صلی اللہ علیہ وسلم نے اسے واپس فرما دیا۔ [سنن نسائي/كتاب مناسك الحج/حدیث: 2825]

حضرت ابن عباس رضی اللہ عنہ سے مروی ہے کہ حضرت صعب بن جثامہ رضی اللہ عنہ نے نبی صلی اللہ علیہ وسلم کو ایک جنگلی گدھا بطور تحفہ پیش کیا جبکہ آپ محرم تھے، لہٰذا آپ نے وہ انہیں واپس فرما دیا۔ [سنن نسائي/كتاب مناسك الحج/حدیث: 2826]

حضرت عبداللہ بن ابی قتادہ رضی اللہ عنہ نے کہا کہ میرے والد (حضرت ابو قتادہ رضی اللہ عنہ) رسول اللہ صلی اللہ علیہ وسلم کے ساتھ حدیبیہ والے سال گئے۔ ان کے ساتھیوں نے احرام باندھ رکھا تھا مگر انہوں نے احرام نہیں باندھا تھا۔ (وہ کہتے ہیں کہ) میں ایک دفعہ اپنے ساتھیوں کے پاس بیٹھا تھا کہ وہ ایک دوسرے کی طرف دیکھ کر ہنسنے لگے۔ میں نے (ادھر ادھر) دیکھا تو مجھے ایک جنگلی گدھا نظر آیا۔ میں نے نیزے سے اس پر وار کیا (اور اسے شکار کر لیا، اس سے پہلے) میں نے ان سے (شکار کے سلسلے میں) مدد طلب کی تھی تو انہوں نے میری مدد کرنے سے انکار کر دیا تھا (کیونکہ وہ محرم تھے)۔ پھر ہم نے اس شکار کا گوشت کھایا۔ ہمیں خطرہ محسوس ہوا کہ ہمیں دشمن کہیں رسول اللہ صلی اللہ علیہ وسلم سے منقطع نہ کر دے۔ میں اپنے گھوڑے کو تیز بھگاتے ہوئے رسول اللہ صلی اللہ علیہ وسلم کے پیچھے (انہیں مطلع کرنے کے لیے) چلا۔ کبھی میں گھوڑے کو تیز بھگاتا تھا اور کبھی آہستہ چلاتا تھا۔ (راستے میں) میں آدھی رات کو بنو غفار کے ایک آدمی سے ملا۔ میں نے اس سے پوچھا: تم نے رسول اللہ صلی اللہ علیہ وسلم کو کہاں چھوڑا ہے؟ اس نے کہا: میں آپ صلی اللہ علیہ وسلم کے پاس سے چلا تو آپ صلی اللہ علیہ وسلم مقامِ سقیا پر قیلولہ فرما رہے تھے۔ میں آپ صلی اللہ علیہ وسلم کو جا ملا۔ میں نے عرض کیا: اے اللہ کے رسول صلی اللہ علیہ وسلم ! آپ کے صحابہ آپ کو «السَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ» ”آپ پر سلامتی، اللہ کی رحمت اور اس کی برکتیں ہوں“ (سلام و دعا) عرض کرتے ہیں۔ انہیں خطرہ ہے کہ کہیں دشمن (ان پر حملہ کر کے) انہیں آپ سے منقطع نہ کر دے، اس لیے آپ رک کر ان کا انتظار فرمائیں۔ آپ صلی اللہ علیہ وسلم نے ان کا انتظار فرمایا۔ میں نے عرض کیا: اے اللہ کے رسول صلی اللہ علیہ وسلم ! میں نے ایک جنگلی گدھا شکار کیا ہے اور میرے پاس اس کا کچھ گوشت باقی ہے۔ آپ صلی اللہ علیہ وسلم نے لوگوں سے فرمایا: ”کھاؤ۔“ حالانکہ وہ محرم تھے۔ [سنن نسائي/كتاب مناسك الحج/حدیث: 2827]

حضرت ابو قتادہ رضی اللہ عنہ بیان کرتے ہیں کہ میں رسول اللہ صلی اللہ علیہ وسلم کے پاس آیا اور آپ صلی اللہ علیہ وسلم کو بتلایا کہ ہمارے پاس اس کا بچا ہوا گوشت موجود ہے۔ آپ صلی اللہ علیہ وسلم نے (حاضرین سے) فرمایا: ”کھاؤ۔“ حالانکہ وہ محرم تھے۔ [سنن نسائي/كتاب مناسك الحج/حدیث: 2828]

حضرت ابوقتادہ رضی اللہ عنہ سے روایت ہے کہ وہ اپنے ایک سفر میں جا رہے تھے، ان میں سے کچھ محرم تھے اور کچھ غیر محرم۔ حضرت ابوقتادہ رضی اللہ عنہ نے کہا کہ میں نے ایک جنگلی گدھا دیکھا تو میں گھوڑے پر سوار ہوا اور نیزہ پکڑا۔ میں نے ان سے مدد طلب کی مگر انہوں نے مدد کرنے سے انکار کر دیا۔ میں نے زبردستی ان میں سے کسی سے کوڑا چھینا اور گدھے پر حملہ کر دیا اور اسے شکار کر لیا۔ انہوں نے بھی اس سے کھا لیا، پھر انہیں ڈر محسوس ہوا (کہ کہیں یہ ناجائز نہ ہو) تو نبی صلی اللہ علیہ وسلم سے اس بارے میں پوچھا گیا۔ آپ صلی اللہ علیہ وسلم نے فرمایا: ”کیا تم نے (شکار کی طرف) اشارہ کیا تھا؟ کیا تم نے کوئی مدد کی تھی؟“ انہوں نے کہا: نہیں۔ آپ صلی اللہ علیہ وسلم نے فرمایا: ”کھا سکتے ہو۔“ [سنن نسائي/كتاب مناسك الحج/حدیث: 2829]