حضرت انس رضی اللہ عنہ سے روایت ہے، انہوں نے کہا کہ نبی کریم صلی اللہ علیہ وسلم ایک گری ہوئی کھجور کے پاس سے گزرے تو فرمایا: ”اگر یہ کھجور صدقے کی نہ ہوتی تو میں اسے کھا لیتا۔“ ہمام نے حضرت ابوہریرہ رضی اللہ عنہ سے، انہوں نے نبی کریم صلی اللہ علیہ وسلم سے بیان کیا کہ آپ صلی اللہ علیہ وسلم نے فرمایا: ”میں اپنے بستر پر گری ہوئی کھجور پاتا ہوں۔“ [صحيح البخاري/كتاب البيوع/حدیث: 2055]

حضرت عباد بن تمیم رحمہ اللہ اپنے چچا رضی اللہ عنہ سے روایت کرتے ہیں، انہوں نے کہا: نبی کریم صلی اللہ علیہ وسلم سے ایک شخص کے متعلق شکایت کی گئی کہ وہ نماز میں کوئی چیز محسوس کرتا ہے، کیا وہ نماز توڑ دے؟ آپ صلی اللہ علیہ وسلم نے فرمایا: ”نہ (توڑے) تاآنکہ وہ آواز سنے یا بو پائے۔“ اور ابن ابی حفصہ نے امام زہری رحمہ اللہ سے روایت کرتے ہوئے کہا کہ وضو اس وقت لازم ہوتا ہے جب تو بدبو پائے یا آواز سنے۔ [صحيح البخاري/كتاب البيوع/حدیث: 2056]

حضرت عائشہ رضی اللہ عنہا سے روایت ہے انہوں نے فرمایا: کچھ لوگوں نے عرض کیا: اے اللہ کے رسول صلی اللہ علیہ وسلم ! کئی لوگ ہمارے پاس گوشت لاتے ہیں لیکن ہمیں یہ معلوم نہیں کہ انہوں نے ذبح کرتے وقت اللہ کا نام ذکر کیا تھا یا نہیں؟ رسول اللہ صلی اللہ علیہ وسلم نے فرمایا: ”تم خود اس پر «بِسْمِ اللَّهِ» ”اللہ کا نام“ پڑھ لو اور اسے کھا لو۔“ [صحيح البخاري/كتاب البيوع/حدیث: 2057]

حضرت جابر رضی اللہ عنہ سے روایت ہے انہوں نے فرمایا کہ ایک دفعہ ہم نبی کریم صلی اللہ علیہ وسلم کے ہمراہ نماز پڑھ رہے تھے کہ شام سے ایک قافلہ آیا جو غلہ لادے ہوئے تھا۔ لوگ اس کی طرف چل دیے حتیٰ کہ نبی کریم صلی اللہ علیہ وسلم کے ہمراہ بارہ مردوں کے علاوہ کوئی باقی نہ رہا تو یہ آیت نازل ہوئی: ﴿جب انہوں نے کوئی تجارت یا کھیل تماشا دیکھا تو اس کی طرف دوڑ پڑے﴾ [سورة الجمعة: 11] [صحيح البخاري/كتاب البيوع/حدیث: 2058]

حضرت ابوہریرہ رضی اللہ عنہ سے روایت ہے، وہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”لوگوں پر ایک وقت آئے گا جب آدمی کو اس کی کچھ پروا نہیں رہے گی کہ مال حلال طریقے سے حاصل کیا ہے یا حرام طریقے سے کمایا ہے۔“ [صحيح البخاري/كتاب البيوع/حدیث: 2059]

حضرت ابو منہال رحمہ اللہ سے روایت ہے انہوں نے کہا کہ میں کرنسی کا کاروبار کرتا تھا۔ میں نے اس کے متعلق حضرت زید بن ارقم رضی اللہ عنہ سے دریافت کیا تو انہوں نے کہا کہ نبی کریم صلی اللہ علیہ وسلم نے فرمایا۔ ایک دوسری سند کے مطابق حضرت ابو منہال رحمہ اللہ کہتے ہیں کہ میں نے حضرت براء بن عازب اور حضرت زید بن ارقم رضی اللہ عنہما سے کرنسی کے کاروبار کے متعلق دریافت کیا تو انہوں نے فرمایا کہ ہم رسول اللہ صلی اللہ علیہ وسلم کے زمانے میں تجارت کرتے تھے۔ ہم نے رسول اللہ صلی اللہ علیہ وسلم سے بیع صرف یعنی کرنسی کے کاروبار کے متعلق پوچھا تو آپ صلی اللہ علیہ وسلم نے فرمایا: ”اگر نقد بنقد ہو تو کوئی حرج نہیں، اگر ادھار ہو تو جائز نہیں۔“ [صحيح البخاري/كتاب البيوع/حدیث: 2060]

حضرت ابو منہال رحمہ اللہ سے روایت ہے، انہوں نے کہا کہ میں کرنسی کا کاروبار کرتا تھا۔ میں نے اس کے متعلق حضرت زید بن ارقم رضی اللہ عنہ سے دریافت کیا تو انہوں نے کہا کہ نبی کریم صلی اللہ علیہ وسلم نے فرمایا۔ ایک دوسری سند کے مطابق حضرت ابو منہال کہتے ہیں کہ میں نے حضرت براء بن عازب اور حضرت زید بن ارقم رضی اللہ عنہما سے کرنسی کے کاروبار کے متعلق دریافت کیا تو انہوں نے فرمایا کہ ہم رسول اللہ صلی اللہ علیہ وسلم کے زمانے میں تجارت کرتے تھے۔ ہم نے رسول اللہ صلی اللہ علیہ وسلم سے «بَيْعِ صَرْفٍ» یعنی ”کرنسی کے کاروبار“ کے متعلق پوچھا تو آپ صلی اللہ علیہ وسلم نے فرمایا: ”اگر نقد بہ نقد ہو تو کوئی حرج نہیں، اگر ادھار ہو تو جائز نہیں۔“ [صحيح البخاري/كتاب البيوع/حدیث: 2061]

حضرت عبید بن عمیر رحمہ اللہ سے روایت ہے کہ حضرت ابو موسیٰ اشعری رضی اللہ عنہ نے ایک دفعہ حضرت عمر رضی اللہ عنہ سے ملاقات کی اجازت طلب کی لیکن انہیں اجازت نہ ملی، غالباً حضرت عمر رضی اللہ عنہ اس وقت کسی کام میں مصروف تھے، چنانچہ حضرت ابو موسیٰ اشعری رضی اللہ عنہ واپس آگئے۔ حضرت عمر رضی اللہ عنہ جب کام سے فارغ ہوئے تو کہنے لگے کہ میں نے حضرت عبداللہ بن قیس رضی اللہ عنہ (ابو موسیٰ اشعری رضی اللہ عنہ) کی آواز سنی تھی؟ انہیں اجازت دے دو۔ عرض کیا گیا: وہ تو واپس چلے گئے ہیں۔ آپ نے انہیں بلایا (اور پوچھا): کیوں واپس چلے گئے تھے؟ انہوں نے عرض کیا: ہمیں یہی حکم دیا گیا تھا۔ حضرت عمر رضی اللہ عنہ نے فرمایا: تم اس پر کوئی گواہ پیش کرو۔ یہ سن کر حضرت ابو موسیٰ اشعری رضی اللہ عنہ انصار کی مجلس میں گئے اور ان سے دریافت کیا تو انہوں نے کہا کہ اس بات کی گواہی تو حضرت ابو سعید خدری رضی اللہ عنہ ہی دے دیں گے جو ہم سب میں کم عمر ہیں۔ چنانچہ حضرت ابو موسیٰ اشعری رضی اللہ عنہ، حضرت ابو سعید خدری رضی اللہ عنہ کو حضرت عمر رضی اللہ عنہ کی خدمت میں لے گئے (انہوں نے شہادت دی کہ رسول اللہ صلی اللہ علیہ وسلم کا یہی حکم تھا)، تب حضرت عمر رضی اللہ عنہ نے فرمایا: رسول اللہ صلی اللہ علیہ وسلم کا حکم مجھ سے پوشیدہ رہ گیا؟ کیونکہ میں بازاروں میں خرید و فروخت اور تجارت میں مصروف رہا، یعنی تجارت کی غرض سے باہر آنے جانے میں مشغول رہا۔ [صحيح البخاري/كتاب البيوع/حدیث: 2062]