حضرت انس بن مالک رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ نے فرمایا: ”ایمان کی نشانی انصار سے محبت کرنا اور منافقت کی نشانی ان سے بغض رکھنا ہے۔“ [صحيح البخاري/كتاب مناقب الأنصار/حدیث: 3784]

حضرت انس رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے کچھ عورتیں اور بچے کسی شادی سے آتے ہوئے دیکھے تو آپ صلی اللہ علیہ وسلم ان کے سامنے استقبال کے لیے کھڑے ہو گئے اور فرمایا: ”تم لوگ مجھے تمام لوگوں سے زیادہ محبوب ہو۔“ آپ صلی اللہ علیہ وسلم نے یہ کلمات تین دفعہ دہرائے۔ [صحيح البخاري/كتاب مناقب الأنصار/حدیث: 3785]

حضرت انس رضی اللہ عنہ ہی سے روایت ہے، انہوں نے کہا کہ ایک انصاری خاتون رسول اللہ صلی اللہ علیہ وسلم کے پاس آئی جس کے ہمراہ ایک بچہ تھا تو رسول اللہ صلی اللہ علیہ وسلم اس سے باتیں کرنے لگے۔ پھر آپ صلی اللہ علیہ وسلم نے فرمایا: ”اس ذات کی قسم جس کے ہاتھ میں میری جان ہے! تم لوگ مجھے سب سے زیادہ محبوب ہو۔“ آپ صلی اللہ علیہ وسلم نے یہ الفاظ دو دفعہ فرمائے۔ [صحيح البخاري/كتاب مناقب الأنصار/حدیث: 3786]

حضرت زید بن ارقم رضی اللہ عنہ سے روایت ہے کہ انصار نے عرض کی: ”اللہ کے رسول! ہر نبی کے پیروکار ہوتے ہیں اور ہم نے آپ کی پیروی کی ہے، آپ اللہ سے دعا کریں کہ وہ ہمارے پیروکار و لواحقین کو بھی ہم میں سے بنا دے“ تو آپ صلی اللہ علیہ وسلم نے اس کی دعا فرمائی۔ (راوی کہتے ہیں کہ) پھر میں نے یہ حدیث ابن ابی لیلیٰ سے بیان کی تو انہوں نے کہا کہ حضرت زید رضی اللہ عنہ یہ کہہ چکے ہیں۔ [صحيح البخاري/كتاب مناقب الأنصار/حدیث: 3787]

عمرو بن مرہ بیان کرتے ہیں کہ میں نے ایک انصاری آدمی ابو حمزہ سے سنا کہ انصار نے عرض کی: ”(اللہ کے رسول!) ہر قوم کے پیروکار ہوتے ہیں، ہم تو آپ کی پیروی کر چکے ہیں، آپ اللہ سے دعا کریں کہ ہمارے لواحقین کو بھی ہم میں سے بنا دے۔“ تو نبی صلی اللہ علیہ وسلم نے ان کے لیے دعا فرمائی: ”اے اللہ! ان کے لواحقین کو بھی ان سے بنا دے۔“ عمرو بن مرہ نے کہا: ”میں نے یہ حدیث ابن ابی لیلیٰ سے بیان کی تو انہوں نے کہا کہ حضرت زید نے بھی یہی کہا ہے۔“ شعبہ کہتے ہیں: ”میرا خیال ہے کہ زید سے مراد زید بن ارقم رضی اللہ عنہ ہیں۔“ [صحيح البخاري/كتاب مناقب الأنصار/حدیث: 3788]

حضرت ابو اسید رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”انصار میں بہترین گھرانہ بنو نجار ہے، پھر بنو عبد الاشہل، پھر بنو حارث بن خزرج، پھر بنو ساعدہ اور یوں تو انصار کے تمام گھرانوں میں خیر و برکت ہے۔“ حضرت سعد رضی اللہ عنہ نے کہا: ”میرے خیال کے مطابق نبی صلی اللہ علیہ وسلم نے انصار کے کئی قبیلوں کو ہم پر فضیلت دی ہے۔“ ان سے کہا گیا: ”آپ کو بھی تو بہت سے گھرانوں پر فضیلت دی ہے۔“ ایک روایت میں سعد کے باپ کا نام عبادہ مذکور ہے۔ [صحيح البخاري/كتاب مناقب الأنصار/حدیث: 3789]

حضرت ابو اسید رضی اللہ عنہ ہی سے روایت ہے، انہوں نے نبی صلی اللہ علیہ وسلم کو یہ فرماتے سنا: ”انصار کے گھرانوں میں سب سے بہتر بنو نجار، بنو عبد الاشہل، بنو حارث اور بنو ساعدہ کے گھرانے ہیں۔“ [صحيح البخاري/كتاب مناقب الأنصار/حدیث: 3790]

حضرت ابوحمید ساعدی رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”انصار کا سب سے بہتر گھرانہ بنو نجار کا ہے، پھر بنو عبدالأشہل کا، پھر بنو حارث کا اور پھر بنو ساعدہ کا، اور انصار کے تمام گھرانوں میں خیر و برکت ہے۔“ پھر ہماری ملاقات حضرت سعد بن عبادہ رضی اللہ عنہ سے ہوئی تو انہوں نے حضرت ابواسید رضی اللہ عنہ سے کہا: ”کیا آپ نہیں دیکھتے کہ نبی صلی اللہ علیہ وسلم نے انصار کے گھرانوں میں خیر و برکت کا ذکر کیا ہے لیکن ہمارا ذکر سب سے آخر میں کیا ہے؟“ اس کے بعد حضرت سعد بن عبادہ رضی اللہ عنہ کی نبی صلی اللہ علیہ وسلم سے ملاقات ہوئی تو انہوں نے عرض کیا: ”اے اللہ کے رسول! انصار کے گھرانوں کو خیر و برکت سے نوازا گیا لیکن ہمیں سب سے آخر میں کر دیا گیا ہے۔“ آپ صلی اللہ علیہ وسلم نے فرمایا: ”کیا تمہارے لیے یہ کافی نہیں کہ تمہارا خاندان بھی بہترین خاندان ہے؟“ [صحيح البخاري/كتاب مناقب الأنصار/حدیث: 3791]

حضرت اسید بن حضیر رضی اللہ عنہ سے روایت ہے، انہوں نے کہا کہ ایک انصاری آدمی نے کہا: ”اللہ کے رسول! آپ مجھے عامل مقرر نہیں کرتے جیسا کہ فلاں آدمی کو عامل بنایا ہے؟“ آپ صلی اللہ علیہ وسلم نے فرمایا: ”میرے بعد تمہیں ترجیح کا سامنا کرنا پڑے گا (تم پر دوسرے لوگوں کو ترجیح دی جائے گی)، لہذا صبر کرنا یہاں تک کہ حوض کوثر پر مجھ سے ملاقات کرو۔“ [صحيح البخاري/كتاب مناقب الأنصار/حدیث: 3792]