حضرت ابن عباس رضی اللہ عنہما سے روایت ہے، انہوں نے کہا: ”نبی صلی اللہ علیہ وسلم کو کسی مسئلے میں کوئی حکم معلوم نہ ہوتا تو آپ اس میں اہل کتاب کی موافقت کرتے تھے، اہل کتاب اپنے بالوں کو لٹکائے رکھتے اور مشرکین مانگ نکالتے تھے، چنانچہ نبی صلی اللہ علیہ وسلم نے اپنی پیشانی کے بال لٹکائے لیکن اس کے بعد آپ صلی اللہ علیہ وسلم مانگ نکالتے تھے۔“ [صحيح البخاري/كتاب اللباس/حدیث: 5917]

حضرت عائشہ رضی اللہ عنہا سے روایت ہے، انہوں نے کہا: ”گویا میں اب بھی نبی صلی اللہ علیہ وسلم کی مانگ میں خوشبو کی چمک دیکھ رہی ہوں جبکہ آپ صلی اللہ علیہ وسلم احرام کی حالت میں تھے۔“ حضرت عبداللہ بن رجاء نے (مفارق کے بجائے) «مَفْرِقِ النَّبِيِّ صلی اللہ علیہ وسلم » کے الفاظ کہے ہیں۔ [صحيح البخاري/كتاب اللباس/حدیث: 5918]

حضرت ابن عباس رضی اللہ عنہ سے روایت ہے، انہوں نے کہا: ”میں ایک رات اپنی خالہ حضرت میمونہ بنت حارث رضی اللہ عنہا کے گھر سویا، جبکہ اس رات رسول اللہ صلی اللہ علیہ وسلم ان کی باری کی وجہ سے ان کے پاس تھے۔ رسول اللہ صلی اللہ علیہ وسلم رات کی نماز پڑھنے کے لیے کھڑے ہوئے تو میں بھی آپ صلی اللہ علیہ وسلم کی بائیں طرف کھڑا ہو گیا۔ آپ صلی اللہ علیہ وسلم نے میرے گیسو پکڑے اور مجھے اپنی دائیں جانب کر لیا۔“ عمرو بن محمد نے کہا: ”ہم سے ہشیم نے بیان کیا، انہیں ابو بشیر نے خبر دی کہ ابن عباس رضی اللہ عنہ نے کہا: ”آپ صلی اللہ علیہ وسلم نے میری چوٹی یا میرا سر پکڑا۔““ [صحيح البخاري/كتاب اللباس/حدیث: 5919]

حضرت ابن عمر رضی اللہ عنہما سے روایت ہے، انہوں نے کہا: ”میں نے رسول اللہ صلی اللہ علیہ وسلم سے سنا، آپ «الْقَزَعِ» (سر کے کچھ بال مونڈنے اور کچھ چھوڑنے) سے منع فرمایا کرتے تھے۔“ (راویِ حدیث) عبید اللہ کہتے ہیں: ”میں نے پوچھا: «الْقَزَعُ» کیا ہے؟“ پھر عبید اللہ نے ہمیں اشارے سے بتایا کہ ”بچے کا سر منڈواتے وقت کچھ بال یہاں چھوڑ دیے جائیں اور کچھ بال وہاں چھوڑ دیے جائیں۔“ عبید اللہ نے اپنی پیشانی اور اپنے سر کے دونوں کناروں کی طرف اشارہ کر کے ہمیں اس کی صورت سے آگاہ کیا۔ عبید اللہ سے پوچھا گیا: ”کیا اس میں لڑکے اور لڑکی دونوں کا ایک ہی حکم ہے؟“ فرمایا: ”مجھے معلوم نہیں، عمر بن نافع رحمہ اللہ نے صرف بچے کا لفظ کہا تھا۔“ عبید اللہ نے کہا: ”میں نے عمر بن نافع رحمہ اللہ سے دوبارہ اس کے متعلق دریافت کیا تو انہوں نے کہا کہ لڑکے کی پیشانی اور گدی کے بال مونڈنے میں کوئی حرج نہیں، لیکن «الْقَزَعُ» یہ ہے کہ پیشانی کے بال چھوڑ دیے جائیں اور اس کے سوا سر پر کوئی بال نہ ہو، اسی طرح سر کے اس طرف اور اس طرف (یعنی دائیں بائیں) کے بال چھوڑ دیے جائیں۔“ [صحيح البخاري/كتاب اللباس/حدیث: 5920]

حضرت ابن عمر رضی اللہ عنہما سے ہی روایت ہے کہ رسول اللہ صلی اللہ علیہ وسلم نے «الْقَزَعِ» ”قزع“ سے منع فرمایا تھا۔ [صحيح البخاري/كتاب اللباس/حدیث: 5921]

حضرت عائشہ رضی اللہ عنہا سے روایت ہے، انہوں نے کہا: ”میں نے اپنے ہاتھوں سے نبی صلی اللہ علیہ وسلم کو احرام باندھتے وقت اور طوافِ زیارت سے پہلے منیٰ میں خوشبو لگائی۔“ [صحيح البخاري/كتاب اللباس/حدیث: 5922]

حضرت عائشہ رضی اللہ عنہا سے روایت ہے، انہوں نے فرمایا: ”میں رسول اللہ صلی اللہ علیہ وسلم کو سب سے عمدہ خوشبو لگایا کرتی تھی یہاں تک کہ خوشبو کی چمک آپ کی ڈاڑھی اور سر میں دیکھتی تھی۔“ [صحيح البخاري/كتاب اللباس/حدیث: 5923]

حضرت سہل بن سعد رضی اللہ عنہ سے روایت ہے کہ ایک آدمی نے نبی صلی اللہ علیہ وسلم کے گھر کے دروازے کے سوراخ سے جھانکا، جبکہ نبی صلی اللہ علیہ وسلم اس وقت آلہ خارش سے اپنا سر کھجلا رہے تھے، آپ صلی اللہ علیہ وسلم نے فرمایا: ”اگر مجھے معلوم ہوتا کہ تو جھانک رہا ہے تو میں تیری آنکھ پھوڑ دیتا۔ اجازت طلب کرنا صرف اس لیے ہے کہ آدمی کی نظر سے محفوظ رہا جا سکے۔“ [صحيح البخاري/كتاب اللباس/حدیث: 5924]

حضرت عائشہ رضی اللہ عنہا سے روایت ہے، انہوں نے کہا: ”میں حالتِ حیض کے باوجود رسول اللہ صلی اللہ علیہ وسلم کے سر مبارک میں کنگھی کرتی تھی۔“ [صحيح البخاري/كتاب اللباس/حدیث: 5925]