حضرت عبداللہ بن زمعہ رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے لوگوں کو ہوا خارج ہونے پر ہنسنے سے منع فرمایا، نیز فرمایا: ”تم میں سے کوئی اپنی بیوی کو نر حیوان جیسی مار کیوں مارتا ہے؟ پھر شاید وہ اسے بغل میں لے گا۔“ [صحيح البخاري/كتاب الأدب/حدیث: 6042]

حضرت ابن عمر رضی اللہ عنہما سے روایت ہے انہوں نے کہا کہ نبی صلی اللہ علیہ وسلم نے میدانِ منیٰ میں فرمایا: ”کیا تم جانتے ہو کہ کون سا دن ہے؟“ لوگوں نے کہا: ”اللہ اور اس کے رسول کو زیادہ علم ہے۔“ آپ صلی اللہ علیہ وسلم نے فرمایا: ”یہ حرمت والا دن ہے۔“ آپ صلی اللہ علیہ وسلم نے فرمایا: ”تم جانتے ہو یہ کون سا شہر ہے؟“ صحابہ نے عرض کیا: ”اللہ اور اس کے رسول کو زیادہ علم ہے۔“ آپ صلی اللہ علیہ وسلم نے فرمایا: ”یہ حرمت والا شہر ہے۔“ آپ صلی اللہ علیہ وسلم نے پھر پوچھا: ”تم جانتے ہو یہ کون سا مہینہ ہے؟“ صحابہ نے کہا: ”اللہ اور اس کے رسول کو زیادہ علم ہے۔“ آپ صلی اللہ علیہ وسلم نے فرمایا: ”یہ حرمت والا مہینہ ہے۔“ پھر فرمایا: ”بے شک اللہ تعالیٰ نے تم پر ایک دوسرے کا خون، مال اور عزتیں حرام کی ہیں جیسے اس دن کو تمہارے اس مہینے میں اور تمہارے اس شہر میں حرمت والا بنایا ہے۔“ [صحيح البخاري/كتاب الأدب/حدیث: 6043]

حضرت عبداللہ بن مسعود رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: «سِبَابُ الْمُسْلِمِ فُسُوقٌ، وَقِتَالُهُ كُفْرٌ» ”مسلمان کو گالی دینا گناہ ہے اور اس کو قتل کرنا کفر ہے۔“ محمد بن جعفر نے شعبہ سے روایت کرنے میں سلیمان کی متابعت کی ہے۔ [صحيح البخاري/كتاب الأدب/حدیث: 6044]

حضرت ابو ذر رضی اللہ عنہ سے روایت ہے انہوں نے نبی صلی اللہ علیہ وسلم سے سنا، آپ نے فرمایا: ”اگر کوئی شخص دوسرے کو فسق اور کفر سے متہم کرتا ہے اور وہ در حقیقت فاسق یا کافر نہ ہو تو یہ (فسق اور کفر) کہنے والے پر لوٹ آتا ہے۔“ [صحيح البخاري/كتاب الأدب/حدیث: 6045]

حضرت انس رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم فحش گو نہ تھے اور نہ لعنت کرنے والے تھے، نیز گالی گلوچ بھی نہیں کرتے تھے بلکہ کسی کو عتاب و زجر کرتے وقت فرماتے: «مَا لَهُ تَرِبَ جَبِينُهُ» ”اسے کیا ہو گیا ہے؟ اس کی پیشانی خاک آلود ہو۔“ [صحيح البخاري/كتاب الأدب/حدیث: 6046]

حضرت ثابت بن ضحاک رضی اللہ عنہ سے روایت ہے، اور یہ اصحابِ شجرہ سے تھے، انہوں نے کہا کہ رسول اللہ صلی اللہ علیہ وسلم نے فرمایا: ”جس نے ملتِ اسلام کے علاوہ کسی دوسرے مذہب کی قسم اٹھائی تو وہ اپنے کہنے کے مطابق بن جاتا ہے، ابنِ آدم کا ایسی چیز کے متعلق نذر ماننا صحیح نہیں جس کا وہ مالک نہیں، جس نے دنیا میں خود کو کسی چیز کے ساتھ قتل کیا تو قیامت کے دن اسی کے ساتھ اسے سزا دی جائے گی، جس نے کسی مومن پر لعنت کی تو یہ اس کو قتل کرنے کے مترادف ہے اور جس نے کسی مسلمان کو کفر سے متہم کیا تو اس کو مار ڈالنے کی طرح ہے۔“ [صحيح البخاري/كتاب الأدب/حدیث: 6047]

حضرت سلیمان بن صرد رضی اللہ عنہ سے روایت ہے، وہ نبی صلی اللہ علیہ وسلم کے صحابہ کرام میں سے تھے، انہوں نے کہا: نبی صلی اللہ علیہ وسلم کے سامنے دو آدمیوں نے گالی گلوچ کی۔ ان میں سے ایک کو بہت زیادہ غصہ آیا حتی کہ اس کا چہرہ پھول گیا اور رنگ متغیر ہو گیا۔ اس وقت نبی صلی اللہ علیہ وسلم نے فرمایا: ”میں ایک کلمہ جانتا ہوں، اگر یہ شخص وہ (کلمہ) کہہ دے تو اس کا غصہ جاتا رہے گا۔“ چنانچہ ایک آدمی اس (غصہ ہونے والے) کے پاس گیا اور اسے نبی صلی اللہ علیہ وسلم کے ارشاد سے مطلع کیا، اور کہا: «أَعُوذُ بِاللَّهِ مِنَ الشَّيْطَانِ الرَّجِيمِ» ”شیطان سے اللہ کی پناہ مانگو۔“ اس نے کہا: ”کیا تجھے گمان ہے کہ مجھے کوئی بیماری ہے؟ یا میں دیوانہ ہوں؟ جاؤ اپنا راستہ لو۔“ [صحيح البخاري/كتاب الأدب/حدیث: 6048]

حضرت عبادہ بن صامت رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم لوگوں کو لیلۃ القدر کی بشارت دینے کے لیے گھر سے نکلے۔ اس دوران مسلمانوں کے دو آدمی کسی بات پر جھگڑنے لگے۔ نبی صلی اللہ علیہ وسلم نے فرمایا: ”میں اس لیے گھر سے نکلا تھا کہ تمہیں شبِ قدر کی بشارت دوں، لیکن فلاں فلاں جھگڑنے لگے، اس لیے وہ اٹھا لی گئی۔ ممکن ہے کہ یہی تمہارے لیے اچھا ہو۔ اب تم اسے انتیسویں، ستائیسویں اور پچیسویں رمضان کی راتوں میں تلاش کرو۔“ [صحيح البخاري/كتاب الأدب/حدیث: 6049]

حضرت معرور رحمہ اللہ سے روایت ہے، انہوں نے کہا کہ میں نے حضرت ابوذر رضی اللہ عنہ پر ایک چادر دیکھی اور ان کے غلام نے بھی اسی طرح کی چادر اوڑھ رکھی تھی، میں نے کہا: ”اگر آپ اپنے غلام کی چادر لے لیں اور اسے زیب تن کریں تو آپ کے لیے ایک رنگ کا جوڑا ہو جائے اور اپنے غلام کو کوئی دوسرا جوڑا پہنا دیں۔“ انہوں نے بتایا کہ ”میرے اور ایک آدمی کے درمیان کچھ تکرار ہو گئی تھی، اس کی والدہ عجمیہ تھی، میں نے اس کے متعلق اسے طعنہ دے دیا۔ اس نے یہ بات نبی صلی اللہ علیہ وسلم سے کہہ دی تو آپ صلی اللہ علیہ وسلم نے مجھے فرمایا: ”تو نے فلاں شخص کو گالی دی ہے؟“ میں نے کہا: ”جی ہاں۔“ آپ صلی اللہ علیہ وسلم نے فرمایا: ”تو نے اس کی ماں کو بھی مطعون کیا ہے؟“ میں نے کہا: ”جی ہاں۔“ آپ صلی اللہ علیہ وسلم نے فرمایا: ”تمہارے اندر ابھی دورِ جاہلیت کی خو باقی ہے۔“ میں نے عرض کی: ”اس وقت بھی جبکہ میں بڑھاپے میں پہنچ چکا ہوں؟“ آپ صلی اللہ علیہ وسلم نے فرمایا: ”ہاں، یاد رکھو! یہ غلام بھی تمہارے بھائی ہیں، اللہ تعالیٰ نے انہیں تمہارے ماتحت کر دیا ہے، لہذا جس شخص کے بھائی کو اللہ تعالیٰ نے اس کے زیرِ دست کر دیا ہو اسے وہ کچھ کھلائے جو وہ خود کھاتا ہے اور اسے وہی پہنائے جو وہ خود پہنتا ہے اور اسے کسی ایسے کام کی تکلیف نہ دے جو اس پر گراں بار ہو۔ اگر ایسا کام اسے کہے جو اس کے بس میں نہ ہو تو وہ کام نمٹانے میں اس کا تعاون کرے۔“ [صحيح البخاري/كتاب الأدب/حدیث: 6050]