بریدہ رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے فتح مکہ کے روز ایک وضو سے (متعدد) نمازیں پڑھیں اور موزوں پر مسح کیا، تو عمر رضی اللہ عنہ نے عرض کیا: آپ نے اس طرح پہلے تو کبھی نہیں کیا تھا؟ آپ صلی ‌اللہ ‌علیہ ‌وآلہ ‌وسلم نے فرمایا: ”عمر! میں نے عمداً ایسے کیا ہے۔“ رواہ مسلم۔ [مشكوة المصابيح/كتاب الطهارة/حدیث: 308]

سوید بن نعمان رضی اللہ عنہ سے روایت ہے کہ غزوہ خیبر کے موقع پر وہ رسول اللہ صلی ‌اللہ ‌علیہ ‌وآلہ ‌وسلم کے ساتھ روانہ ہوئے، حتیٰ کہ خیبر کے زیریں علاقے صہبا پر پہنچے تو آپ صلی ‌اللہ ‌علیہ ‌وآلہ ‌وسلم نے نماز عصر ادا کی، پھر آپ صلی ‌اللہ ‌علیہ ‌وآلہ ‌وسلم نے زاد راہ طلب کیا تو صرف ستو آپ صلی ‌اللہ ‌علیہ ‌وآلہ ‌وسلم کی خدمت میں پیش کیے گئے، آپ صلی ‌اللہ ‌علیہ ‌وآلہ ‌وسلم کے فرمان کے مطابق انہیں بھگو دیا گیا تو پھر رسول اللہ صلی ‌اللہ ‌علیہ ‌وآلہ ‌وسلم نے اور ہم نے اسے کھایا، پھر آپ صلی ‌اللہ ‌علیہ ‌وآلہ ‌وسلم نماز مغرب کے لیے کھڑے ہوئے تو کلی کی اور ہم نے بھی کلی کی، پھر آپ صلی ‌اللہ ‌علیہ ‌وآلہ ‌وسلم نے نماز پڑھی اور (نیا) وضو نہ فرمایا۔ رواہ البخاری (209)۔ [مشكوة المصابيح/كتاب الطهارة/حدیث: 309]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”آواز یا بدبو (محسوس ہونے) کی صورت میں وضو واجب ہوتا ہے۔“ صحیح، رواہ احمد (2 /41، ح: 9301)، والترمذی (74) وابن ماجہ (515)۔ [مشكوة المصابيح/كتاب الطهارة/حدیث: 310]

علی رضی اللہ عنہ بیان کرتے ہیں، میں نے مذی کے متعلق نبی صلی ‌اللہ ‌علیہ ‌وآلہ ‌وسلم سے مسئلہ دریافت کیا تو آپ صلی ‌اللہ ‌علیہ ‌وآلہ ‌وسلم نے فرمایا: ”مذی سے وضو اور منی سے غسل واجب ہوتا ہے۔“ سندہ ضعیف، رواہ الترمذی (114) و ابن ماجہ (504) و ابوداؤد (210) و البخاری (132، 269) و مسلم یغنی عنہ۔ [مشكوة المصابيح/كتاب الطهارة/حدیث: 311]

علی رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”طہارت نماز کی چابی ہے، تکبیر «اَللّٰهُ أَكْبَرُ» ”اللہ اکبر“ اس کی تحریم (اس تکبیر سے نماز شروع کرنے سے پہلے جو کام مباح تھے وہ حرام ہو جاتے ہیں) اور تسلیم «اَلسَّلَامُ عَلَيْكُمْ وَرَحْمَةُ اللّٰهِ» ”السلام علیکم ورحمۃ اللہ“ اس کی تحلیل ہے“ (یعنی سلام پھیرنے سے نماز کی صورت میں حرام ہونے والے کام حلال ہو جاتے ہیں)۔ [حسن، رواہ ابوداؤد: 61، والترمذی: 3، والدارمی: 1/175، ح: 693، وابن ماجہ: 275، والبیہقی: 2/16] ۔ [مشكوة المصابيح/كتاب الطهارة/حدیث: 312]

ابن ماجہ نے علی اور ابوسعید رضی اللہ عنہما سے روایت کیا ہے۔ حسن، رواہ ابن ماجہ (276)۔ [مشكوة المصابيح/كتاب الطهارة/حدیث: 313]

علی بن طلق رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب تم میں کوئی آواز کے بغیر ہوا خارج کرے تو وہ وضو کرے، اور تم عورتوں سے ان کی پیٹھ میں مجامعت نہ کرو۔“ اسنادہ حسن، رواہ الترمذی (1164) و ابوداود (205) و ابن حبان (203)۔ [مشكوة المصابيح/كتاب الطهارة/حدیث: 314]

معاویہ بن ابی سفیان رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے فرمایا: ”آنکھیں دبر کا تسمہ ہیں، جب آنکھیں سو جاتی ہیں تو تسمہ کھل جاتا ہے۔“ سندہ ضعیف، رواہ الدارمی (1 /184 ح 728)۔ [مشكوة المصابيح/كتاب الطهارة/حدیث: 315]

علی رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”پیٹھ کا تسمہ دونوں آنکھیں ہیں، پس جو شخص سو جائے تو وہ وضو کرے۔“ الشیخ الامام محی السنہ رحمہ اللہ نے فرمایا: صحیح حدیث کی روشنی میں یہ حکم لیٹ کر سونے والے شخص کے لیے ہے، (بیٹھے بیٹھے سو جانے والے کے لیے نہیں ہے) سندہ ضعیف، رواہ ابوداؤد (203) و ابن ماجہ (477)۔ [مشكوة المصابيح/كتاب الطهارة/حدیث: 316]

انس رضی اللہ عنہ بیان کرتے ہیں کہ نبی صلی ‌اللہ ‌علیہ ‌وآلہ ‌وسلم کے صحابہ کرام رضی اللہ عنہم نمازِ عشاء کا انتظار کرتے رہتے حتیٰ کہ (نیند کی وجہ سے) ان کے سر جھک جاتے، پھر وہ نماز پڑھتے لیکن وہ (نیا) وضو نہ کرتے تھے۔ البتہ امام ترمذی رحمہ اللہ نے اپنی روایت میں انتظار کے بدلے سو جانے کا ذکر کیا ہے کہ وہ عشاء کے وقت بیٹھے سو جاتے حتیٰ کہ ان کے سر جھک جاتے۔ [صحیح، رواہ ابوداؤد: 200، والترمذی: 78، ومسلم] [مشكوة المصابيح/كتاب الطهارة/حدیث: 317]