دارمی رحمہ اللہ نے ابوعبید رحمہ اللہ سے روایت کیا ہے، لیکن انہوں نے ”پھر پانی منگایا“ سے آخر تک ذکر نہیں کیا۔ (ضعیف)۔ [مشكوة المصابيح/كتاب الطهارة/حدیث: 328]

انس بن مالک رضی اللہ عنہ بیان کرتے ہیں، میں، ابی بن کعب اور ابوطلحہ رضی اللہ عنہما بیٹھے ہوئے تھے، پس ہم نے گوشت روٹی کھائی، پھر میں نے وضو کے لیے پانی منگایا، تو ان دونوں نے کہا: ”تم وضو کیوں کرتے ہو؟“ میں نے کہا: ”اس کھانے کی وجہ سے جو ہم نے کھایا ہے“، تو انہوں نے کہا: ”کیا تم پاکیزہ چیزوں سے وضو کرتے ہو؟ یہ چیزیں کھا کر تو اس شخصیت (یعنی نبی صلی ‌اللہ ‌علیہ ‌وآلہ ‌وسلم) نے وضو نہیں کیا جو تم سے بہتر ہے“۔ اسنادہ حسن، رواہ احمد۔ [مشكوة المصابيح/كتاب الطهارة/حدیث: 329]

عبداللہ بن عمر رضی اللہ عنہما کہا کرتے تھے: آدمی کا اپنی اہلیہ کا بوسہ لینا اور اسے اپنے ہاتھ سے چھونا ملامسہ کے زمرے میں ہے، اور جو شخص اپنی اہلیہ کا بوسہ لے یا اسے اپنے ہاتھ سے چھوئے تو اس پر وضو کرنا لازم ہے۔ (صحیح، رواہ مالک والشافعی)۔ [مشكوة المصابيح/كتاب الطهارة/حدیث: 330]

ابن مسعود رضی اللہ عنہ فرمایا کرتے تھے: اپنی اہلیہ کا بوسہ لینے سے وضو کرنا ضروری ہے۔ صحیح، رواہ مالک۔ [مشكوة المصابيح/كتاب الطهارة/حدیث: 331]

ابن عمر رضی اللہ عنہما سے روایت ہے کہ عمر بن خطاب رضی اللہ عنہ نے فرمایا: بے شک بوسہ لینا، لمس کے زمرے میں آتا ہے، پس اس (وجہ) سے وضو کرو۔ ضعیف۔ [مشكوة المصابيح/كتاب الطهارة/حدیث: 332]

عمر بن عبدالعزیز رحمہ اللہ تمیم داری رضی اللہ عنہ سے روایت کرتے ہیں، انہوں نے کہا: رسول اللہ صلی ‌اللہ ‌علیہ ‌وآلہ ‌وسلم نے فرمایا: ”ہر قسم کے بہتے خون کی وجہ سے وضو کرنا ضروری ہے۔“ دونوں حدیثوں کو دارقطنی نے روایت کیا، اور انہوں نے کہا: عمر بن عبدالعزیز رحمہ اللہ نے تمیم داری رضی اللہ عنہ سے سنا نہ انہیں دیکھا، جبکہ یزید بن خالد اور یزید بن محمد دونوں مجہول ہیں۔ ضعیف۔ [مشكوة المصابيح/كتاب الطهارة/حدیث: 333]

ابوایوب انصاری رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب تم قضائے حاجت کے لیے جاؤ تو قبلہ کی طرف نہ منہ کرو اور نہ پشت، بلکہ مشرق یا مغرب کی طرف منہ کرو۔“ متفق علیہ۔ الشیخ امام محی السنہ رحمہ اللہ نے فرمایا: یہ حدیث صحرا کے بارے میں ہے، رہا عمارت وغیرہ میں قضائے حاجت کرنا تو اس میں کوئی حرج نہیں، جیسا کہ عبداللہ بن عمر رضی اللہ عنہما سے مروی ہے۔ [مشكوة المصابيح/كتاب الطهارة/حدیث: 334]

عبداللہ بن عمر رضی اللہ عنہما بیان کرتے ہیں، میں اپنی کسی ضرورت کے تحت ام المومنین حفصہ رضی اللہ عنہا کے گھر کی چھت پر چڑھا تو میں نے رسول اللہ صلی ‌اللہ ‌علیہ ‌وآلہ ‌وسلم کو قبلہ کی طرف پشت اور شام کی طرف منہ کر کے قضائے حاجت کرتے ہوئے دیکھا۔ متفق علیہ۔ [مشكوة المصابيح/كتاب الطهارة/حدیث: 335]

سلمان رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ”بول و براز کے لیے قبلہ کی طرف منہ کرنے یا دائیں ہاتھ سے استنجا کرنے یا تین سے کم ڈھیلوں سے استنجا کرنے یا لید یا ہڈی کے ساتھ استنجا کرنے“ سے ہمیں منع فرمایا۔ [رواہ مسلم] ۔ [مشكوة المصابيح/كتاب الطهارة/حدیث: 336]

انس رضی اللہ عنہ بیان کرتے ہیں کہ جب رسول اللہ صلی ‌اللہ ‌علیہ ‌وآلہ ‌وسلم بیت الخلا میں داخل ہوتے تو فرماتے: «اللَّهُمَّ إِنِّي أَعُوذُ بِكَ مِنَ الْخُبُثِ وَالْخَبَائِثِ» ”اے اللہ! میں ناپاک جنوں اور ناپاک مادہ جنات سے تیری پناہ چاہتا ہوں۔“ متفق علیہ۔ [مشكوة المصابيح/كتاب الطهارة/حدیث: 337]