ابن عباس رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”بے شک جو شخص چت لیٹ کر سو جائے، اس پر وضو کرنا لازم ہے، کیونکہ جب وہ چت لیٹ جاتا ہے تو اس کے جوڑ ڈھیلے ہو جاتے ہیں: “ اسنادہ ضعیف، رواہ الترمذی (77) و ابوداؤد (202)۔ [مشكوة المصابيح/كتاب الطهارة/حدیث: 318]

بسرہ رضی اللہ عنہ بیان کرتی ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب تم میں سے کوئی اپنی شرم گاہ کو ہاتھ لگائے تو وہ وضو کرے۔ “ صحیح، رواہ مالک (1 /42 ح 88) و احمد (6 / 406، 407 ح 27836، 27838) و ابوداؤد (181) و الترمذی (82) و النسائی (1 / 100 ح 163) و ابن ماجہ (479) و الدارمی (1 / 184 ح 730)۔ [مشكوة المصابيح/كتاب الطهارة/حدیث: 319]

طلق بن علی رضی اللہ عنہ بیان کرتے ہیں، آدمی کے وضو کر لینے کے بعد اپنی شرم گاہ کو ہاتھ لگانے کے متعلق رسول اللہ صلی ‌اللہ ‌علیہ ‌وآلہ ‌وسلم سے مسئلہ دریافت کیا گیا، تو آپ صلی ‌اللہ ‌علیہ ‌وآلہ ‌وسلم نے فرمایا: ”وہ (شرم گاہ) بھی اس کے گوشت کا ایک ٹکڑا ہے۔ “ الشیخ الامام محی السنہ ؒ نے فرمایا: یہ منسوخ ہے، کیونکہ ابوہریرہ رضی اللہ عنہ طلق رضی اللہ عنہ کی آمد کے بعد مسلمان ہوئے۔ صحیح، رواہ ابوداؤد (182) و الترمذی (85) و النسائی (1 / 101 ح 165) و ابن ماجہ (483)۔ [مشكوة المصابيح/كتاب الطهارة/حدیث: 320]

ابوہریرہ رضی اللہ عنہ کی سند سے رسول اللہ صلی ‌اللہ ‌علیہ ‌وآلہ ‌وسلم سے مروی ہے، آپ صلی ‌اللہ ‌علیہ ‌وآلہ ‌وسلم نے فرمایا: ”جب تم میں سے کوئی شخص اپنا ہاتھ اپنی شرم گاہ کو لگائے جبکہ اس (ہاتھ) اور اس (شرم گاہ) کے درمیان کوئی چیز حائل نہ ہو تو وہ وضو کرے۔ “ حسن، رواہ الشافعی (1 / 19) و الدار قطنی (1 / 147 ح 525) و ابن حبان (1115) المستدرک (1 / 138 تحت ح 479) و النسائی (1 / 100 ح 163)۔ [مشكوة المصابيح/كتاب الطهارة/حدیث: 321]

امام نسائی نے اسے بسرہ رضی اللہ عنہ سے روایت کیا ہے، البتہ انہوں نے یہ ذکر نہیں کیا ”اس کے اور اس کے مابین کوئی چیز حائل نہ ہو۔ “ لم اجدہ۔ [مشكوة المصابيح/كتاب الطهارة/حدیث: 322]

عائشہ رضی اللہ عنہ بیان کرتی ہیں: نبی صلی ‌اللہ ‌علیہ ‌وآلہ ‌وسلم اپنی کسی زوجہ محترمہ کا بوسہ لے لیا کرتے تھے، پھر آپ نماز پڑھتے اور وضو نہیں کرتے تھے۔ اور امام ترمذی ؒ نے فرمایا: عروہ عن عائشہ رضی اللہ عنہ، اور ابراہیم التیمی عن عائشہ رضی اللہ عنہ کی سند سے یہ حدیث ہمارے اصحاب کے ہاں صحیح نہیں، اور ابوداؤد ؒ نے فرمایا: یہ حدیث مرسل ہے، اور ابراہیم التیمی نے عائشہ رضی اللہ عنہ سے نہیں سنا۔ ضعیف۔ [مشكوة المصابيح/كتاب الطهارة/حدیث: 323]

ابن عباس رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے دستی کا گوشت کھایا، پھر اپنے نیچے بچھی ہوئی چادر سے اپنا ہاتھ صاف کیا، پھر کھڑے ہوئے اور نماز پڑھی۔ ضعیف۔ [مشكوة المصابيح/كتاب الطهارة/حدیث: 324]

ام سلمہ رضی اللہ عنہ بیان کرتی ہیں، میں نے بھنی ہوئی پسلی (چانپ) نبی صلی ‌اللہ ‌علیہ ‌وآلہ ‌وسلم کی خدمت میں پیش کی تو آپ صلی ‌اللہ ‌علیہ ‌وآلہ ‌وسلم نے اس میں سے تناول فرمایا، پھر نماز کے لیے اٹھے اور وضو نہیں کیا۔ صحیح، رواہ احمد۔ [مشكوة المصابيح/كتاب الطهارة/حدیث: 325]

ابورافع رضی اللہ عنہ بیان کرتے ہیں، میں گواہی دیتا ہوں کہ میں رسول اللہ صلی ‌اللہ ‌علیہ ‌وآلہ ‌وسلم کے لیے بکری کی کلیجی اور دل وغیرہ بھونا کرتا تھا، (آپ نے اسے کھایا) پھر نماز پڑھی اور وضو نہیں کیا۔ “ رواہ مسلم۔ [مشكوة المصابيح/كتاب الطهارة/حدیث: 326]

ابورافع رضی اللہ عنہ بیان کرتے ہیں، انہیں ایک بکری ہدیہ کے طور پر دی گئی، تو انہوں نے اسے ہنڈیا میں ڈال دیا، رسول اللہ صلی ‌اللہ ‌علیہ ‌وآلہ ‌وسلم تشریف لائے تو فرمایا: ”ابورافع! یہ کیا ہے؟“ انہوں نے عرض کیا: اللہ کے رسول! ایک بکری ہمیں بطور ہدیہ دی گئی تھی تو میں نے اسے ہنڈیا میں پکایا ہے، آپ صلی ‌اللہ ‌علیہ ‌وآلہ ‌وسلم نے فرمایا: ”ابورافع! مجھے دستی دو۔ “ میں نے دستی آپ کو دے دی، پھر آپ صلی ‌اللہ ‌علیہ ‌وآلہ ‌وسلم نے فرمایا: ”مجھے دوسری دستی دو۔ “ میں نے دوسری دستی بھی آپ کو دے دی، پھر آپ صلی ‌اللہ ‌علیہ ‌وآلہ ‌وسلم نے فرمایا: ”مجھے اور دستی دو۔ “ انہوں نے عرض کیا اللہ کے رسول! بکری کی صرف دو دستیاں ہوتی ہیں، رسول اللہ صلی ‌اللہ ‌علیہ ‌وآلہ ‌وسلم نے انہیں فرمایا: ”اگر تم خاموش رہتے اور جب تک خاموش رہتے تو مجھے یکے بعد دیگرے دستی ملتی رہتی۔ “ پھر آپ نے پانی منگوایا، کلی کی اور اپنی انگلیوں کے کنارے دھوئے، پھر کھڑے ہوئے تو نماز پڑھی، پھر دوبارہ ان کے پاس تشریف لائے تو ان کے ہاں ٹھنڈا گوشت پایا تو اسے کھایا، پھر آپ مسجد میں تشریف لے گئے تو نماز پڑھی، اور پانی کو ہاتھ تک نہ لگایا۔ ضعیف۔ [مشكوة المصابيح/كتاب الطهارة/حدیث: 327]