حضرت انس رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”ہر امت کا ایک امین ہوتا ہے اور اس امت کے امین ابو عبیدہ بن جراح ہیں۔“ [صحيح البخاري/كتاب أخبار الآحاد/حدیث: 7255]

حضرت عمر رضی اللہ عنہ سے روایت ہے، انہوں نے فرمایا: ”انصار میں سے ایک آدمی تھا، جب وہ رسول اللہ صلی اللہ علیہ وسلم کی مجلس میں شرکت نہ کرتا اور میں ہوتا تو جو کچھ میں رسول اللہ صلی اللہ علیہ وسلم سے سنتا اسے آکر بیان کر دیتا، اور جب میں غائب ہوتا اور وہ مجلس میں شریک ہوتا تو وہ رسول اللہ صلی اللہ علیہ وسلم سے سنتا وہ مجھے بیان کر دیتا۔“ [صحيح البخاري/كتاب أخبار الآحاد/حدیث: 7256]

حضرت علی رضی اللہ عنہ سے روایت ہے کہ نبی صلی اللہ علیہ وسلم نے ایک لشکر بھیجا اور اس پر ایک آدمی کو امیر مقرر فرمایا۔ اس نے آگ کا الاؤ تیار کیا اور لشکریوں سے کہا: ”اس آگ میں کود پڑو۔“ کچھ لوگوں نے اس میں کودنے کا ارادہ کیا تو دوسرے کہنے لگے: ”ہم آگ ہی سے بھاگ کر ادھر آئے ہیں۔“ جب انہوں نے اس بات کا ذکر نبی صلی اللہ علیہ وسلم سے کیا تو آپ نے ان لوگوں سے فرمایا جنہوں نے کود جانے کا ارادہ کیا تھا: ”اگر یہ لوگ آگ میں داخل ہو جاتے تو قیامت تک اس میں رہتے۔“ پھر دوسرے لوگوں سے فرمایا: ”اللہ تعالیٰ کی نافرمانی میں کسی کی اطاعت جائز نہیں۔ اطاعت صرف نیک کاموں میں ہوتی ہے۔“ [صحيح البخاري/كتاب أخبار الآحاد/حدیث: 7257]

حضرت ابوہریرہ رضی اللہ عنہ اور حضرت زید بن خالد رضی اللہ عنہ سے روایت ہے، انہوں نے بتایا کہ ”دو شخص نبی صلی اللہ علیہ وسلم کے پاس اپنا ایک مقدمہ لے کر آئے (اس کی تفصیل اگلی حدیث میں ہے)۔“ [صحيح البخاري/كتاب أخبار الآحاد/حدیث: 7258]

حضرت ابوہریرہ اور حضرت زید بن خالد رضی اللہ عنہما سے روایت ہے، انہوں نے بتایا کہ ”دو شخص نبی صلی اللہ علیہ وسلم کے پاس اپنا ایک مقدمہ لے کر آئے (اس کی تفصیل اگلی حدیث میں ہے)۔“ [صحيح البخاري/كتاب أخبار الآحاد/حدیث: 7259]

حضرت ابو ہریرہ رضی اللہ عنہ ہی سے روایت ہے انہوں نے کہا: ایک دفعہ ہم رسول اللہ صلی اللہ علیہ وسلم کی خدمت میں موجود تھے کہ اچانک ایک دیہاتی کھڑا ہوا اور عرض کرنے لگا: ”اللہ کے رسول! کتاب اللہ کے مطابق میرا فیصلہ کر دیں۔“ اس کے بعد اس کا مد مقابل کھڑا ہوا اس نے بھی یہی عرض کی: ”اللہ کے رسول! یہ سچ کہتا ہے۔ اس کا فیصلہ اللہ کی کتاب کے مطابق فرمائیں لیکن مجھے کچھ کہنے کی اجازت دیں۔“ نبی صلی اللہ علیہ وسلم نے اس سے فرمایا: ”بیان کرو۔“ اس نے کہا: ”میرا بیٹا اس شخص کے ہاں ملازم تھا۔ اس نے اس کی بیوی سے زنا کر لیا۔ لوگوں نے مجھے بتایا کہ میرے بیٹے کو رجم کی سزا ملے گی لیکن میں نے اس کی طرف سے سو بکریاں اور ایک لونڈی بطور فدیہ ادا کیں۔ پھر میں نے اہل علم سے رابطہ کیا تو انہوں نے مجھے بتایا کہ اس کی بیوی پر رجم اور میرے بیٹے پر سو کوڑے اور ایک سال کے لیے جلاوطنی کی سزا ہے۔“ آپ صلی اللہ علیہ وسلم نے فرمایا: ”اس ذات کی قسم جس کے ہاتھ میں میری جان ہے! میں تمہارے درمیان اللہ کی کتاب کے مطابق فیصلہ کروں گا۔ لونڈی اور بکریاں (تجھے) واپس کر دی جائیں اور تیرے بیٹے پر سو کوڑے اور ایک سال جلاوطنی واجب ہے۔“ پھر قبیلہ اسلم کے ایک آدمی حضرت انیس رضی اللہ عنہ سے کہا: ”اے انیس! تم اس کی بیوی کے پاس جاؤ، اگر وہ زنا کا اعتراف کرلے تو اسے رجم کر دو۔“ چنانچہ حضرت انیس رضی اللہ عنہ ان کے پاس گئے اور اس نے اقرار کر لیا اس کے بعد حضرت انیس رضی اللہ عنہ نے اسے سنگسار کر ڈالا۔ [صحيح البخاري/كتاب أخبار الآحاد/حدیث: 7260]

حضرت جابر بن عبداللہ رضی اللہ عنہ سے روایت ہے، انہوں نے کہا: نبی صلی اللہ علیہ وسلم نے خندق کے روز صحابہ کو آواز دی تو حضرت زبیر رضی اللہ عنہ ہی تیار ہوئے، آپ صلی اللہ علیہ وسلم نے تیسری مرتبہ پکارا تو بھی حضرت زبیر رضی اللہ عنہ نے آمادگی کا اظہار کیا۔ اس کے بعد آپ صلی اللہ علیہ وسلم نے فرمایا: ”ہر نبی کا مدد گار ہوتا ہے اور میرا مددگار زبیر رضی اللہ عنہ ہے۔“ (راویِ حدیث) سفیان نے کہا: ”میں نے یہ حدیث محمد بن منکدر سے یاد کی ہے۔“ ایوب نے ان (ابن منکدر) سے کہا: ”اے ابوبکر! آپ لوگوں سے حضرت جابر رضی اللہ عنہ کی حدیث بیان کریں کیونکہ لوگ اس بات کو پسند کرتے ہیں“، تو انہوں نے اسی مجلس میں کہا: ”میں نے حضرت جابر رضی اللہ عنہ سے سنا ہے“ اور پے در پے احادیث بیان کرنے لگے کہ ”میں نے حضرت جابر رضی اللہ عنہ سے سنا۔“ (علی بن عبداللہ کہتے ہیں:) میں نے سفیان بن عیینہ سے کہا: ”سفیان ثوری نے یومِ قریظہ کہا۔“ سفیان بن عیینہ نے کہا: ”میں نے ابن منکدر سے یومِ خندق اس طرح آمنے سامنے یاد کیا ہے جیسے آپ بیٹھے ہیں۔“ سفیان نے کہا: ”یہ دونوں نام ایک ہی غزوے کے ہیں“ اور پھر سفیان مسکرا دیے۔ [صحيح البخاري/كتاب أخبار الآحاد/حدیث: 7261]

حضرت ابو موسیٰ اشعری رضی اللہ عنہ سے روایت ہے کہ نبی صلی اللہ علیہ وسلم ایک باغ میں تشریف لے گئے اور مجھے دروازے کی نگرانی کا حکم دیا۔ پھر ایک آدمی آیا اور وہ اجازت طلب کرتا تھا، آپ صلی اللہ علیہ وسلم نے فرمایا: ”اسے اجازت کے ساتھ جنت کی بھی بشارت دے دو۔“ وہ حضرت ابوبکر رضی اللہ عنہ تھے۔ پھر حضرت عمر رضی اللہ عنہ آئے تو آپ صلی اللہ علیہ وسلم نے فرمایا: ”انہیں بھی اجازت دے دو اور جنت کی بشارت سنا دو۔“ پھر حضرت عثمان رضی اللہ عنہ آئے تو آپ صلی اللہ علیہ وسلم نے فرمایا: ”انہیں بھی اجازت کے ساتھ جنت کی خوشخبری دے دو۔“ [صحيح البخاري/كتاب أخبار الآحاد/حدیث: 7262]

حضرت عمر رضی اللہ عنہ سے روایت ہے، انہوں نے کہا: ”میں ایک دفعہ رسول اللہ صلی اللہ علیہ وسلم کی خدمت میں حاضر ہوا جبکہ آپ صلی اللہ علیہ وسلم اپنے بالاخانہ میں تشریف فرما تھے اور آپ کا سیاہ غلام سیڑھی کے اوپر تعینات تھا۔ میں نے اس سے کہا: (رسول اللہ صلی اللہ علیہ وسلم سے) عرض کرو: عمر بن خطاب کھڑا اجازت طلب کر رہا ہے، چنانچہ آپ نے مجھے اجازت دے دی۔“ [صحيح البخاري/كتاب أخبار الآحاد/حدیث: 7263]