اردو حاشہ:
فوائد و مسائل:
(1)
یہ حدیث واقعہ معراج کا ایک حصہ بیان کرتی ہے۔
تفصیل کے لئے دیکھئے: (صحیح البخاري، الصلاۃ، باب کیف فرضت الصلاۃ فی الإسراء، حدیث: 349)

(2)
حضرت موسیٰ علیہ السلام نے جو فرمایا آپ کی امت زیادہ نمازیں پڑھنے کی طاقت نہیں رکھتی۔
اس کی وجہ یہ ہے کہ انھیں بنی اسرائيل سے اس قسم کا تجربہ ہوا تھا۔
کہ بنی اسرائيل نے اللہ کے حکم کے مطابق نمازیں ادا کرنے میں کوتاہی کی تھی۔ (صحیح مسلم، الإیمان، باب الإسراء برسول اللہ صلی اللہ علیہ وسلم إلی السمٰوات وفرض الصلوات، حدیث: 162)

(3)
پچاس نمازوں کا حکم تبدیل کرکے پانچ کردینا اللہ تعالیٰ کی خصوصی رحمت ہے اور مسلمانوں پر اللہ کا احسان عظیم ہے اس احسان کا شکر صرف اسی طرح ادا کیا جا سکتا ہے کہ پانچوں نمازیں پابندی سے اور پورے آداب کا لحاظ رکھ کر بروقت ادا کی جایئں۔

(4)
پانچ نمازوں کو پچاس قرار دے کر فرمایا۔
کہ میرا فرمان تبدیل نہیں ہوتا۔
اس کی وجہ یہ ہے کہ خود اسی کا قانون ہے کہ صحیح انداز سے خلوص کے ساتھ کی ہوئی نیکی کا ثواب کم از کم دس گنا لکھا جاتا ہے۔
ارشاد ہے۔
﴿مَن جَاءَ بِالْحَسَنَةِ فَلَهُ عَشْرُ أَمْثَالِهَا﴾  (الانعام: 160)
جو نیکی لے کر حاضر ہوا اس کا دس گنا (بدلہ)
ملےگا
(5)
آخری بار رسول اللہ صلی اللہ علیہ وسلم نے مزید تخفیف کی درخواست کرنے سے اجتناب فرمایا۔
کیونکہ پانچ پر پچاس کے ثواب کی خوشخبری میں یہ ارشاد تھا کہ اب مزید تخفیف نہیں کی جائے گی۔

450 ۔ اردو حاشیہ:
➊”نماز کا ایک حصہ معاف کر دیا“ عربی میں لفظ «شطر» ہے جس کے معنی نصف بھی ہیں اور ایک حصہ بھی، اس لیے دوسرے معنی اختیار کیے گئے ہیں۔ اس روایت میں بھی اختصار ہے ورنہ نمازیں پانچ پانچ کر کے کم ہوئیں۔
➋ «لَا يُبَدَّلُ الْقَوْلُ لَدَيَّ» میں قول سے مراد کہی ہوئی بات ہے، یعنی پچاس نمازوں والا قول کہ تخفیف کے باوجود ان کا ثواب برقرار رہا۔
➌سند میں مذکور ابن حزم سے مراد ابوبکر بن محمد بن عمرو بن حزم ہیں۔ ان کا شمار تابعین میں ہوتا ہے۔

اردو حاشہ:
1؎:
یعنی:
پہلے جو پچاس وقت کی نمازیں فرض کی گئی تھیں،
کم کر کے ان کو اگرچہ پانچ وقت کی کر دیا گیا ہے مگر ثواب وہی پچاس وقت کا رکھا گیا ہے،
ویسے بھی اللہ کے یہاں ہر نیکی کا ثواب شروع سے دس گنا سے ہوتا ہے۔