´کچی کھجور سے نبیذ بنانا کیسا ہے؟`
جابر بن زید اور عکرمہ سے روایت ہے کہ وہ دونوں صرف کچی کھجور کی نبیذ کو مکروہ جانتے تھے، اور اس مذہب کو ابن عباس رضی اللہ عنہما سے لیتے تھے۔ ابن عباس رضی اللہ عنہما کہتے ہیں: میں ڈرتا ہوں کہیں یہ «مزاء» نہ ہو جس سے عبدالقیس کو منع کیا گیا تھا ہشام کہتے ہیں: میں نے قتادہ سے کہا: «مزاء» کیا ہے؟ انہوں نے کہا: حنتم اور مزفت میں تیار کی گئی نبیذ۔ [سنن ابي داود/كتاب الأشربة /حدیث: 3709]

فوائد ومسائل:
فائدہ: مختلف علاقوں میں شراب بنانے کا رواج بھی مختلف تھا۔
اور نام بھی مختلف تھے۔
مذاء کا نام غالبا اہل حجاز کے لئے پہلے سے متعارف نہ تھا۔
اس لئے مذاء کے بارے میں جو بات حضرت ابن عباس رضی اللہ تعالیٰ عنہ تک پہنچی تھی وہ اتنی تھی کہ یہ نشہ آور مشروب نیم پختہ کھجور سے بنتاہے۔
ہشام نے قتادہ سے پوچھ کر اس کی مزید تفصیل بیان کردی ہے۔
علاوہ ازیں نہایہ ابن ایثر میں صراحت ہے۔
کہ مذاء وہ شراب ہوتی ہے۔
جس میں ترشی ہو۔
بعض نے نیم پختہ اور پختہ کھجور ملا کر نبیذ بنانے کو بھی مزاء کہا ہے۔
بہرحال جس صورت میں بھی کسی مشروب میں نشے کے اثرات آجایئں اس کا استعمال جائز نہیں۔