4022. حضرت قیس سے روایت ہے کہ غزوہ بدر میں شریک ہونے والوں کا وظیفہ پانچ، پانچ ہزار تھا۔ حضرت عمر ؓ نے فرمایا: میں انہیں بعد میں آنے والوں پر ضرور برتری دوں گا۔ [صحيح بخاري، حديث نمبر:4022]

حدیث حاشیہ:
معلوم ہوا بدری صحابہ غیر بدری سے افضل ہیں۔
حضرت عمر ؓ نے مہاجرین کے لیے سال میں دس ہزار اور انصار کے لیے سال میں آٹھ ہزار اور ازواج مطہرات کے لیے سال میں24ہزار مقرر کئے تھے۔
یہ صحیح اسلامی خلافت راشدہ کی برکت تھی اور ان کے بیت المال کا صحیح ترین مصرف تھا۔
صد افسوس کہ یہ برکت عروج اسلام کے ساتھ خاص ہوکر رہ گئیں۔
آج دور تنزل میں یہ سب خواب و خیال کی باتیں معلوم ہوتی ہیں۔
کچھ اسلامی تنظیمیں بیت المال کا نام لے کر کھڑی ہوتی ہیں۔
یہ تنظیمیں اگر صحیح طور پر قائم ہوں بہر حال اچھی ہیں مگر وہ بات کہاں مولوی مدن کی سی۔

4022. حضرت قیس سے روایت ہے کہ غزوہ بدر میں شریک ہونے والوں کا وظیفہ پانچ، پانچ ہزار تھا۔ حضرت عمر ؓ نے فرمایا: میں انہیں بعد میں آنے والوں پر ضرور برتری دوں گا۔ [صحيح بخاري، حديث نمبر:4022]

حدیث حاشیہ:
1۔
اس حدیث سے معلوم ہوا کہ بدری صحابہ دوسروں سے افضل ہیں۔
2۔
حضرت مالک بن اوس کی روایت ہے کہ حضرت عمر ؓ مہاجرین کو پانچ پانچ ہزار انصار کو چار چار ہزار اور ازواج مطہرات رضوان اللہ عنھن اجمعین میں سے ہر ایک کو بارہ بارہ ہزار وظیفہ دیتے تھے۔
(السنن الکبری للبیهقي: 349/6۔
وفتح الباري: 404/7)
یہ خلافت راشدہ کی برکات تھیں اور بیت المال کا صحیح مصرف تھا لیکن افسوس کہ یہ برکات عروج اسلام کے ساتھ خاص ہو کر رہ گئیں۔
اس دور انحطاط میں یہ باتیں خواب و خیال معلوم ہوتی ہیں بیت المال کا نظام تو صرف کھانے پینے کا دھندا ہے۔
اللہ تعالیٰ اسے صحیح مقام عطا فرمائے۔
آمین یا رب العالمین۔