4021. حضرت عمر ؓ سے روایت ہے کہ جب نبی ﷺ کی وفات ہو گئی تو میں نے حضرت ابوبکر ؓ سے عرض کی: آپ ہمارے ساتھ ہمارے انصاری بھائیوں کے پاس چلیں۔ پھر ہماری ملاقات انصار کے دو نیک لوگوں سے ہوئی جو بدر کی لڑائی میں شریک ہوئے تھے۔ (راوی حدیث) عبیداللہ نے کہا: پھر میں نے اس حدیث کا تذکرہ عروہ بن زبیر سے کیا تو انہوں نے بتایا کہ وہ دو مرد عویم بن ساعدہ اور معن بن عدی ؓ ہیں۔ [صحيح بخاري، حديث نمبر:4021]

حدیث حاشیہ:
1۔
اس حدیث سے یہ ثابت کرنا ہے کہ حضرت عویم بن ساعد اور معن بن عدی ؓ بدری صحابہ سے ہیں۔
یہ دونوں بیعت عقبہ میں شریک تھے۔
اس کے بعد انھوں نے غزوہ بدر احد اور خندق میں شرکت کی۔
حضرت معن بن عد ؓ حضرت ابو بکر ؓ کے دور خلافت میں جنگ یمامہ کے وقت شہید ہوئے تھے۔
2۔
اس حدیث میں خلافت ابو بکر ؓ کا بیان ہے جو آئندہ تفصیل سے بیان ہو گا۔
(صحیح البخاري، الحدود، حدیث: 6830)
3۔
یہ حدیث "حدیث سقیفہ" کے نام سے مشہور ہے۔