حضرت جابر بن عبداللہ رضی اللہ عنہ سے روایت ہے، انہوں نے کہا کہ مدینہ طیبہ میں ایک یہودی تھا جو کھجوروں کی تیاری تک قرض دیا کرتا تھا۔ رومہ کے راستے میں حضرت جابر رضی اللہ عنہ کی زمین تھی، ایک سال کھجور کے باغات پھل نہ لائے۔ کھجوریں توڑنے کے موسم میں یہودی میرے پاس آیا جبکہ میں نے کھجوروں سے کچھ نہ توڑا تھا، چنانچہ میں نے اس سے دوسرے سال تک مہلت طلب کی لیکن اس نے انکار کر دیا۔ نبی صلی اللہ علیہ وسلم کو یہ اطلاع ملی تو آپ صلی اللہ علیہ وسلم نے اپنے صحابہ کرام رضی اللہ عنہم سے فرمایا، پھر آپ صلی اللہ علیہ وسلم کھجوروں کے باغ میں میرے پاس تشریف لائے، نبی صلی اللہ علیہ وسلم نے یہودی سے گفتگو کی تو وہ کہنے لگا: ”اے ابوالقاسم! میں اسے مزید مہلت نہیں دوں گا۔“ جب نبی صلی اللہ علیہ وسلم نے اس صورت حال کو دیکھا تو وہاں سے اٹھ کھڑے ہوئے اور باغ کا چکر لگایا، پھر یہودی کے پاس آ کر اس سے بات چیت کی تو اس نے پھر انکار کر دیا۔ اس دوران میں اٹھا اور تھوڑی سی تازہ کھجوریں لا کر نبی صلی اللہ علیہ وسلم کے آگے رکھ دیں، آپ صلی اللہ علیہ وسلم نے انہیں تناول فرمایا، اس کے بعد مجھے کہنے لگے: ”اے جابر! تمہاری جھونپڑی کہاں ہے؟“ میں نے اس کی نشاندہی کی تو آپ صلی اللہ علیہ وسلم نے فرمایا: ”وہاں میرے لیے ایک بستر بچھا دو۔“ میں نے وہاں ایک بستر لگا دیا۔ آپ صلی اللہ علیہ وسلم وہاں گئے اور محوِ استراحت ہوئے، جب بیدار ہوئے تو میں نے پھر مٹھی بھر کھجوریں آپ صلی اللہ علیہ وسلم کو پیش کیں، آپ صلی اللہ علیہ وسلم نے ان میں سے کچھ کھائیں، پھر کھڑے ہوئے اور یہودی سے گفتگو کی، لیکن اس نے پھر انکار کر دیا، آپ صلی اللہ علیہ وسلم دوسری مرتبہ تازہ کھجوروں کے باغ میں کھڑے ہوئے پھر فرمایا: ”اے جابر! ان کو خوشوں سے الگ کر کے اپنا قرض ادا کرو۔“ چنانچہ آپ صلی اللہ علیہ وسلم وہاں کھڑے ہو گئے اور میں نے باغ میں سے اتنی کھجوریں توڑ لیں جس سے میں نے قرض ادا کر دیا اور اس میں سے کچھ کھجوریں بچ گئیں۔ پھر میں وہاں سے روانہ ہوا اور نبی صلی اللہ علیہ وسلم کی خدمت میں حاضر ہو کر یہ بشارت دی تو آپ صلی اللہ علیہ وسلم نے فرمایا: ”میں گواہی دیتا ہوں کہ میں اللہ کا رسول ہوں۔“ (امام بخاری رحمہ اللہ نے فرمایا:) ” «الْعَرْشُ» اور «الْعَرِيشُ» عمارت کی چھت کو کہتے ہیں،“ حضرت ابن عباس رضی اللہ عنہما نے فرمایا: ” «مَعْرُوشَاتٍ» سے مراد انگور وغیرہ کی چھتیں ہیں، اور «عُرُوشِهَا» سے مراد بھی چھتیں ہیں۔“ محمد بن اسماعیل (امام بخاری رحمہ اللہ) نے کہا: ”اس حدیث میں «فَخْلًا» کا لفظ میرے نزدیک محفوظ نہیں بلکہ میرے نزدیک «أَشْبَهُ» (زیادہ صحیح) یہ لفظ «نَخْلًا» ہے یعنی وہ باغ ایک سال کھجوروں کا پھل لانے سے بیٹھ گیا۔“ [صحيح البخاري/كتاب الأطعمة/حدیث: 5443]

حضرت جابر بن عبداللہ رضی اللہ عنہما سے روایت ہے کہ ان کے والد غزوۂ احد میں شہید ہو گئے تھے اور ان پر قرض تھا، تو قرض خواہوں نے حقوق طلبی میں سختی سے کام لیا۔ میں نبی صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے قرض خواہوں سے فرمایا کہ: ”وہ ان کے باغ کا پھل قبول کر لیں اور ان کے والد کو قرض سے بری کر دیں۔“ لیکن ان لوگوں نے اس سے انکار کر دیا۔ نبی صلی اللہ علیہ وسلم نے انہیں میرا باغ نہ دیا بلکہ مجھ سے فرمایا: ”کل تمہارے باغ میں آؤں گا۔“ چنانچہ آپ صلی اللہ علیہ وسلم صبح تشریف لائے تو میرے باغ کا پورا چکر لگایا اور اس کے پھل میں برکت کی دعا فرمائی۔ اس کے بعد میں نے پھل اتارا، اس میں سے قرض خواہوں کا قرض بھی ادا کر دیا اور ہمارے لیے کچھ کھجوریں بچ بھی گئیں۔ [صحيح البخاري/كتاب الأطعمة/حدیث: 2395]

وہب بن کیسان سے روایت ہے کہ حضرت جابر بن عبداللہ رضی اللہ عنہما نے انہیں بتایا کہ ان کے والد جب فوت ہوئے تو ان پر ایک یہودی کے تیس وسق (کھجوریں) قرض تھیں، حضرت جابر رضی اللہ عنہ نے اس سے مہلت طلب کی تو اس نے مہلت دینے سے انکار کر دیا، حضرت جابر رضی اللہ عنہ نے رسول اللہ صلی اللہ علیہ وسلم سے عرض کیا کہ آپ اس یہودی سے ان کی سفارش کریں، چنانچہ رسول اللہ صلی اللہ علیہ وسلم یہودی کے پاس تشریف لے گئے اور اس سے گفتگو کی کہ وہ اپنے قرض کے عوض اس (جابر) کے باغ کی کھجوریں لے لے تو اس نے انکار کر دیا، تب رسول اللہ صلی اللہ علیہ وسلم باغ میں تشریف لے گئے اور اس کا چکر لگایا، پھر حضرت جابر رضی اللہ عنہ سے فرمایا: ”ان کا پھل توڑ کر اس کا قرض ادا کرو۔“ چنانچہ حضرت جابر رضی اللہ عنہ نے رسول اللہ صلی اللہ علیہ وسلم کے واپس جانے کے بعد پھل توڑا اور یہودی کے تیس وسق پورے دے دیے، ان کے پاس سترہ وسق کھجوریں باقی بچ گئیں، اس کے بعد حضرت جابر رضی اللہ عنہ رسول اللہ صلی اللہ علیہ وسلم کی خدمت میں حاضر ہوئے تاکہ آپ سے یہ واقعہ بیان کریں، انہوں نے رسول اللہ صلی اللہ علیہ وسلم کو عصر کی نماز پڑھتے ہوئے پایا، جب آپ صلی اللہ علیہ وسلم نماز سے فارغ ہوئے تو حضرت جابر رضی اللہ عنہ نے آپ سے کھجوروں کے باقی بچ رہنے کا ذکر کیا، آپ صلی اللہ علیہ وسلم نے فرمایا: ”ابن خطاب (رضی اللہ عنہ) کو بھی اس سے آگاہ کرو۔“ چنانچہ حضرت جابر رضی اللہ عنہ حضرت عمر رضی اللہ عنہ کے پاس آئے اور انہیں اس کی خبر دی تو انہوں نے فرمایا کہ جب رسول اللہ صلی اللہ علیہ وسلم نے باغ کا چکر لگایا تھا تو مجھے اسی وقت یقین ہو گیا تھا کہ اللہ تعالیٰ اس میں ضرور برکت فرمائے گا۔ [صحيح البخاري/كتاب الأطعمة/حدیث: 2396]

حضرت جابر بن عبداللہ رضی اللہ عنہما سے روایت ہے کہ ان کے والد غزوہ احد میں شہید ہوئے تو ان کے قرض خواہوں نے اپنے حقوق کی ادائیگی کا سختی سے مطالبہ کیا۔ میں رسول اللہ صلی اللہ علیہ وسلم کی خدمت میں حاضر ہوا اور آپ سے گفتگو کی۔ آپ نے قرض خواہوں سے کہا کہ وہ میرے باغ کا پھل قبول کر لیں اور میرے باپ کو قرض کی ذمہ داری سے بری کر دیں، تو انہوں نے صاف انکار کر دیا۔ رسول اللہ صلی اللہ علیہ وسلم نے پھر ان لوگوں کو میرا باغ نہیں دیا اور نہ ان کے لیے پھل ہی تڑوایا، بلکہ آپ نے فرمایا: ”میں تیرے پاس «إِنْ شَاءَ اللّٰهُ تَعَالَىٰ» ”اگر اللہ تعالیٰ نے چاہا“ کل آؤں گا۔“ چنانچہ آپ اگلے روز صبح تشریف لائے، نخلستان میں چکر لگایا اور پھل میں برکت کی دعا فرمائی، پھر میں نے باغ کا پھل توڑا اور قرض خواہوں کے تمام حقوق ادا کر دیے، باغ کے پھل میں سے کچھ بچ بھی رہا۔ پھر میں رسول اللہ صلی اللہ علیہ وسلم کی خدمت میں حاضر ہوا جبکہ آپ تشریف فرما تھے۔ میں نے صورتِ واقعہ سے آپ کو آگاہ کیا تو آپ نے حضرت عمر رضی اللہ عنہ سے فرمایا جو وہاں بیٹھے ہوئے تھے: ”عمر! سن رہے ہو؟“ حضرت عمر فاروق رضی اللہ عنہ نے عرض کیا: یہ کیوں نہ ہوتا! ہم تو پہلے ہی آپ کو اللہ تعالیٰ کا فرستادہ مانتے ہیں۔ اللہ کی قسم! واقعی آپ اللہ کے رسول صلی اللہ علیہ وسلم ہیں۔ [صحيح البخاري/كتاب الأطعمة/حدیث: 2601]

حضرت جابر بن عبداللہ رضی اللہ عنہما سے روایت ہے، انہوں نے فرمایا: میرے والد گرامی شہید ہوئے تو ان کے ذمے قرض تھا۔ میں نے قرض خواہوں کے سامنے ایک تجویز پیش کی کہ وہ اس قرض کے عوض میری تمام کھجوریں قبول کر لیں لیکن انہوں نے انکار کر دیا کیونکہ وہ سمجھتے تھے کہ ان کھجوروں سے ان کا قرض پورا نہیں ہوگا، چنانچہ میں نبی کریم صلی اللہ علیہ وسلم کے پاس حاضر ہوا اور آپ سے ان کا تذکرہ کیا تو آپ نے فرمایا: ”جب تم کھجوریں توڑ کر ان کے لیے مخصوص جگہ میں رکھو تو (مجھے) رسول اللہ صلی اللہ علیہ وسلم کو اطلاع کرو۔“ میں نے حسب ارشاد جب انہیں توڑ کر کھلیان میں رکھا تو آپ کو اطلاع کی، چنانچہ آپ حضرت ابوبکر رضی اللہ عنہ اور حضرت عمر رضی اللہ عنہ کے ہمراہ تشریف لائے۔ آپ کھجوروں کی ڈھیری کے پاس بیٹھ گئے، پھر ان کے متعلق برکت کی دعا کی اور فرمایا: ”اپنے قرض خواہوں کو بلاؤ اور ان کا قرض ادا کرو۔“ اب کوئی شخص ایسا نہ رہا جس کا میرے باپ کے ذمے قرض تھا اور میں نے اسے ادا نہ کر دیا ہو، اس کے باوجود تیرہ وسق کھجوریں بچ گئیں جن میں سات وسق عجوہ اور چھ وسق لون تھیں یا چھ وسق عجوہ اور سات وسق لون تھیں۔ پھر میں بوقتِ مغرب رسول اللہ صلی اللہ علیہ وسلم سے ملا اور آپ سے اس بات کا تذکرہ کیا تو آپ ہنس پڑے اور فرمایا: ”ابوبکر اور عمر رضی اللہ عنہما کے پاس جاؤ اور انہیں بھی اس واقعے سے مطلع کرو۔“ (چنانچہ میں نے انہیں بتایا) تو انہوں نے فرمایا: ہم نے تو اسی وقت سمجھ لیا تھا جب رسول اللہ صلی اللہ علیہ وسلم نے برکت کی دعا کی تھی کہ عنقریب ایسا ہوگا۔ ہشام حضرت جابر رضی اللہ عنہما سے نمازِ عصر کا ذکر کرتے ہیں اور اس روایت میں حضرت ابوبکر رضی اللہ عنہ کا اور (رسول اللہ صلی اللہ علیہ وسلم کے) ہنسنے کا ذکر نہیں ہے۔ اس میں یہ الفاظ ہیں کہ میرے والد کے ذمے تیس وسق کھجوریں قرض تھا۔ ابن اسحاق حضرت جابر رضی اللہ عنہما سے نمازِ ظہر کا ذکر کرتے ہیں۔ [صحيح البخاري/كتاب الأطعمة/حدیث: 2709]

حضرت جابر بن عبد اللہ رضی اللہ عنہما سے روایت ہے کہ ان کے والد گرامی غزوہ احد میں شہید کر دیے گئے۔ انہوں نے پسماندگان میں چھ بیٹیاں اور کافی قرض چھوڑا۔ جب کھجوریں توڑنے کا وقت آیا تو میں رسول اللہ صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول صلی اللہ علیہ وسلم ! آپ کو یہ معلوم ہی ہے کہ میرے والد گرامی غزوہ احد میں شہید کر دیے گئے ہیں اور وہ بہت قرض چھوڑ گئے ہیں۔ میری خواہش ہے کہ قرض خواہ آپ کو دیکھ لیں (تاکہ قرض میں کچھ رعایت کریں)۔ آپ صلی اللہ علیہ وسلم نے فرمایا: ”جاؤ تمام کھجوریں ایک طرف اکٹھی کر دو اور ہر قسم الگ الگ رکھو۔“ جب میں نے ایسا کر لیا تو پھر رسول اللہ صلی اللہ علیہ وسلم کو تشریف لانے کے لیے عرض کیا۔ قرض خواہوں نے آپ صلی اللہ علیہ وسلم کو دیکھ کر اور زیادہ سختی شروع کر دی۔ آپ صلی اللہ علیہ وسلم نے جب ان کا یہ طرز عمل ملاحظہ فرمایا تو آپ صلی اللہ علیہ وسلم نے بڑے ڈھیر کے چاروں طرف تین چکر لگائے، پھر اس پر بیٹھ گئے، پھر فرمایا: ”اپنے قرض خواہوں کو بلاؤ۔“ چنانچہ آپ صلی اللہ علیہ وسلم نے انہیں ناپ ناپ کر دینا شروع کر دیا یہاں تک کہ اللہ تعالیٰ نے میرے والد کی امانت ادا کر دی۔ اللہ کی قسم! میں اس پر بھی راضی تھا کہ اللہ تعالیٰ میرے والد کا تمام قرض ادا کر دے اور میں اپنی بہنوں کے پاس ایک کھجور بھی نہ لے کر جاؤں۔ اللہ کی قسم! ساری کھجوریں بچ رہیں حتیٰ کہ میں اس ڈھیر کو دیکھ رہا تھا جس پر آپ صلی اللہ علیہ وسلم تشریف فرما تھے۔ اس میں سے ایک کھجور بھی کم نہیں ہوئی تھی۔ ابو عبد اللہ (امام بخاری) رحمہ اللہ فرماتے ہیں کہ «أَغْرَوْا بِي» کے معنی ہیں: وہ مجھ پر بھڑکنے لگے اور مزید سختی کرنا شروع کر دی۔ اللہ تعالیٰ کا ارشاد ہے: ﴿فَأَغْرَيْنَا بَيْنَهُمُ الْعَدَاوَةَ وَالْبَغْضَاءَ إِلَىٰ يَوْمِ الْقِيَامَةِ﴾ [سورة المائدة: 14] ”ہم نے ان کے درمیان قیامت تک دشمنی اور بغض بھڑکا دیا۔“ [صحيح البخاري/كتاب الأطعمة/حدیث: 2781]

حضرت جابر بن عبداللہ رضی اللہ عنہ سے روایت ہے کہ ان کے والد گرامی غزوہ احد میں شہید ہو گئے اور اپنے اوپر بہت سا قرض اور چھ بیٹیاں چھوڑ گئے تھے۔ جب کھجوریں اتارنے کا موسم آیا تو میں رسول اللہ صلی اللہ علیہ وسلم کی خدمت میں حاضر ہوا اور عرض کی: ”اے اللہ کے رسول! آپ کو معلوم ہے کہ میرے والد احد میں شہید ہو گئے ہیں اور بہت سا قرض چھوڑ گئے ہیں۔ میں چاہتا ہوں کہ قرض خواہ آپ کو دیکھ لیں اور کچھ رعایت کریں۔“ آپ صلی اللہ علیہ وسلم نے فرمایا: ”تم جا کر کھجوروں کی الگ الگ ڈھیریاں لگاؤ۔“ میں نے آپ صلی اللہ علیہ وسلم کے حکم کے مطابق عمل کیا، پھر آپ صلی اللہ علیہ وسلم کو بلانے گیا۔ جب قرض خواہوں نے آپ صلی اللہ علیہ وسلم کو دیکھا تو اس وقت میرے خلاف اور زیادہ مشتعل ہو گئے۔ آپ صلی اللہ علیہ وسلم نے جب ان کا طرز عمل دیکھا تو آپ صلی اللہ علیہ وسلم نے پہلے سب سے بڑے ڈھیر کے گرد تین چکر لگائے پھر اس پر بیٹھ گئے اور فرمایا: ”اپنے قرض خواہوں کو بلا لاؤ۔“ آپ صلی اللہ علیہ وسلم مسلسل انہیں ناپ کر دیتے رہے یہاں تک کہ اللہ تعالیٰ نے میرے باپ کی طرف سے ان کا قرض ادا کر دیا۔ میں اس بات پر ہی خوش تھا کہ اللہ تعالیٰ میرے والد گرامی کا قرض پورے طور پر ادا کر دے اور میں اپنی بہنوں کے لیے ایک کھجور بھی نہ لے جاؤں، لیکن اللہ تعالیٰ نے تمام دوسرے ڈھیر محفوظ رکھے حتیٰ کہ میں اس ڈھیر کو بھی دیکھ رہا تھا جس پر نبی صلی اللہ علیہ وسلم رونق افروز تھے، گویا اس میں سے کھجور کا ایک دانہ بھی کم نہ ہوا تھا۔ [صحيح البخاري/كتاب الأطعمة/حدیث: 4053]