حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”دو بار صور پھونکنے کے درمیان چالیس کا وقفہ ہو گا۔“ انہوں نے (لوگوں نے) کہا: اے ابوہریرہ! کیا چالیس دن؟ انہوں نے کہا: میں نے (تعین سے) انکار کیا ہے۔ لوگوں نے کہا: کیا چالیس مہینے؟ انہوں نے کہا: میں نے (تعین سے) انکار کیا ہے۔ لوگوں نے کہا: کیا چالیس سال؟ انہوں نے کہا: میں نے (تعین سے) انکار کیا ہے۔ (آپ صلی اللہ علیہ وسلم نے فرمایا:) ”پھر اللہ تعالیٰ آسمان سے پانی نازل فرمائے گا تو لوگ اسی طرح اگیں گے جس طرح سبزہ اگتا ہے۔“ انہوں نے (حضرت ابوہریرہ رضی اللہ عنہ نے) کہا کہ (نبی صلی اللہ علیہ وسلم نے فرمایا:) ”اور انسان کا کوئی حصہ نہیں مگر وہ بوحضرت ہو جائے گا، سوائے ایک ہڈی کے، وہ دمچی کی ہڈی کا آخری حصہ ہے، قیامت کے دن اسی سے خلقت کی ترکیب مکمل ہو گی۔“ [صحيح مسلم/كتاب الفتن وأشراط الساعة/حدیث: 7414]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”انسان کے ہر حصے کو مٹی کھا جاتی ہے، مگر دمچی کی ہڈی، اس سے انسان پیدا کیا گیا ہے اور اسی سے جوڑا جائے گا۔“ [صحيح مسلم/كتاب الفتن وأشراط الساعة/حدیث: 7415]

حضرت ابوہریرہ رضی اللہ عنہ کی ہمام بن منبہ کو سنائی ہوئی حدیثوں میں سے ایک یہ حدیث ہے، رسول اللہ صلی اللہ علیہ وسلم نے فرمایا: ”انسان میں ایک ہڈی ہے، اس کو زمین کبھی بھی نہیں کھا سکے گی، اس سے قیامت کے دن (انسان کو) جوڑا جائے گا۔“ لوگوں نے پوچھا: اے اللہ کے رسول صلی اللہ علیہ وسلم ! وہ کون سی ہڈی ہے؟ آپ صلی اللہ علیہ وسلم نے فرمایا: ”دمچی۔“ [صحيح مسلم/كتاب الفتن وأشراط الساعة/حدیث: 7416]