سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے اپنی قوم کی ایک خاتون کو شادی کا پیغام بھیجا، جن کا نام سیدہ سودہ رضی اللہ عنہ تھا، وہ خاتون بیوہ تھیں، اُن کے پانچ، یا شاید چھ بچے تھے، ان کے شوہر کا انتقال ہو گیا تھا، نبی اکرم صلی اللہ علیہ وسلم نے اس خاتون سے کہا: تم میرے ساتھ شادی کیوں نہیں کرتی ہو؟ انہوں نے کہا: اللہ کی قسم! یا رسول اللہ! آپ کے ساتھ شادی کرنے میں یہ چیز رکاوٹ نہیں ہے کہ آپ میرے نزدیک مخلوق میں سب سے زیادہ محبوب ہیں، بلکہ میں اس چیز سے بچنا چاہ رہی ہوں کہ بچے صبح و شام آپ کے سرہانے موجود ہوں گے اور چیخ و پکار کریں گے، نبی اکرم صلی اللہ علیہ وسلم نے ارشاد فرمایا: کیا اس کے علاوہ کوئی اور چیز رکاوٹ ہے؟ انہوں نے کہا: جی نہیں! اللہ کی قسم! نبی اکرم صلی اللہ علیہ وسلم نے فرمایا: اللہ تعالیٰ تم پر رحمت کرے، خواتین جو اونٹوں کی پشت پر سوار ہوتی ہیں، ان میں سب سے بہتر قریش کی عورتیں ہیں، جو اپنی اولاد کے لئے اُن کی کمسنی میں سب سے زیادہ مہربان ہوتی ہیں، اور اپنے شوہر کی سب سے زیادہ دیکھ بھال کرتی ہیں۔
یہ روایت امام أحمد اور امام ابویعلیٰ نے اور امام طبرانی نے نقل کی ہے، اس کی سند میں ایک راوی شہر بن حوشب ہے اور وہ ثقہ ہے اور اس کے بارے میں کلام کیا گیا ہے، اس روایت کے بقیہ رجال ثقہ ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7425]

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اونٹوں پر سوار ہونے والی خواتین میں، سب سے بہتر قریش کی خواتین ہیں، جو اپنی اولاد کے لئے ان کی کمسنی میں سب سے زیادہ مہربان ہوتی ہیں، اور اپنے شوہر کی غربت کے باوجود اس پر سب سے زیادہ مہربان ہوتی ہیں (یا اس سے سب سے زیادہ محبت کرتی ہیں)“۔ سیدنا ابوہریرہ رضی اللہ عنہ کہتے ہیں: نبی اکرم صلی اللہ علیہ وسلم یہ بات جانتے تھے کہ سیدنا عمران رضی اللہ عنہ کی صاحبزادی کبھی اونٹ پر سوار نہیں ہوئیں۔ (علامہ ہیثمی فرماتے ہیں:) میں یہ کہتا ہوں:
یہ روایت ”صحیح“ میں مذکور ہے تا ہم اس میں یہ الفاظ نہیں ہیں: ”آپ یہ بات جانتے تھے۔۔۔۔۔۔۔۔۔۔“ اس سے لے کر آخر تک کے کلمات نہیں ہیں ”صحیح“ میں
یہ روایت موقوف ہے اور یہاں ”مرفوع“ ہے۔
یہ روایت امام أحمد اور امام ابویعلیٰ نے نقل کی ہے، امام أحمد کے رجال صحیح کے رجال ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7426]

سیدنا طلحہ بن عبیداللہ رضی اللہ عنہ بیان کرتے: میں نے نبی اکرم صلی اللہ علیہ وسلم کو مکہ کے راستے میں، یہ ارشاد فرماتے ہوئے سنا: ”اونٹ پر سوار ہونے والی خواتین میں، سب سے بہتر قریش کی خواتین ہیں، جو بچوں پر زیادہ مہربان ہوتی ہیں ”اور شوہر کی زیادہ دیکھ بھال کرتی ہیں“۔
یہ روایت امام بزار نے نقل کی ہے، اس کی سند میں ایک راوی ابوبکر بن ابوسبرہ ہے اور وہ متروک ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7427]

سیدہ ام ہانی بنت ابوطالب رضی اللہ عنہما بیان کرتی ہیں: نبی اکرم صلی اللہ علیہ وسلم نے مجھے شادی کا پیغام دیا، تو میں نے عرض کی: یا رسول اللہ! میں آپ سے بے رغبت نہیں ہوں، لیکن مجھے یہ بات پسند نہیں ہے کہ میں شادی کر لوں، جبکہ میرے بچے چھوٹے ہیں، نبی اکرم صلی اللہ علیہ وسلم نے دریافت کیا: وہ کیوں؟ اونٹوں پر سوار ہونے والی خواتین میں سب سے بہتر قریش کی خواتین ہیں، جو بچوں پر ان کی کم سنی میں سب سے زیادہ مہربان ہوتی ہیں اور شوہر کی سب سے زیادہ دیکھ بھال کرتی ہیں۔ (علامہ ہیثمی فرماتے ہیں:) میں یہ کہتا ہوں: سیدہ ام ہانی رضی اللہ عنہ کے حوالے سے امام ترمذی نے ایک روایت نقل کی ہے، جو اس کے علاوہ ہے۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7428]

زید بن ابوعتاب بیان کرتے ہیں: سیدنا معاویہ رضی اللہ عنہ منبر پر کھڑے ہوئے، انہوں نے یہ بات بیان کی: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اونٹوں پر سوار ہونے والی خواتین میں، سب سے بہتر قریش کی عورتیں ہیں، جو اپنے شوہر کی سب سے زیادہ دیکھ بھال کرتی ہیں اور اپنی اولاد پر، ان کی کمسنی میں، سب سے زیادہ مہربان ہوتی ہیں“۔
یہ روایت امام طبرانی نے ایک حدیث کے درمیان میں نقل کی ہے اور اس کے رجال ثقہ ہیں۔ مناقب سے متعلق باب میں اس نوعیت کی دیگر احادیث آئیں گی۔ [مجمع الزاوئد ومنبع الفوائد/كِتَابُ النِّكَاحِ/حدیث: 7429]