سیدنا عبداللہ بن عمرو رضی اللہ عنہما سے روایت ہے کہ وہ لوگ رسول اللہ صلی اللہ علیہ وسلم کے ساتھ ایک سفر میں تھے کہ ان کا گزر ابو رغال کی قبر پر ہوا، انہوں نے عرض کی: ”اے اللہ کے رسول صلی اللہ علیہ وسلم ! یہ کیا ہے؟“ آپ صلی اللہ علیہ وسلم نے فرمایا: ”یہ ابو رغال کی قبر ہے، وہ ثقیف کا جدِ امجد تھا، وہ قومِ ثمود کا ایک شخص تھا اور اس کا ٹھکانہ حرم میں تھا، چنانچہ جب اللہ تعالیٰ نے اس کی قوم کو اس عذاب سے ہلاک کیا جس سے انہیں ہلاک کیا تھا، تو حرم میں ہونے کی وجہ سے وہ (عذاب سے) محفوظ رہا، پھر وہ وہاں سے نکلا یہاں تک کہ جب اس جگہ پہنچا تو فوت ہو گیا اور اسے دفن کر دیا گیا، اور اس کے ساتھ سونے کی ایک شاخ بھی دفن کی گئی تھی۔“ پس ہم اس کی طرف لپکے اور ہم نے وہ شاخ نکال لی۔ [المعجم الأوسط/باب الألف/حدیث: 2788]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے سیدنا معاذ رضی اللہ عنہ کو یمن کی طرف روانہ فرمایا تو (انہیں نصیحت کرتے ہوئے) ارشاد فرمایا: ”بیشک تم اہل کتاب کی ایک قوم کے پاس جا رہے ہو، لہٰذا سب سے پہلے تم انہیں جس بات کی طرف دعوت دو وہ اللہ کی عبادت ہونی چاہیے۔ پھر جب وہ اللہ کی معرفت حاصل کر لیں تو انہیں بتانا کہ اللہ عزوجل نے ان پر ان کے دن اور رات میں نمازیں فرض کی ہیں، پھر جب وہ اس پر عمل کرنے لگیں تو انہیں خبر دینا کہ اللہ عزوجل نے ان کے مالوں پر زکوٰۃ فرض کی ہے۔“ [المعجم الأوسط/باب الألف/حدیث: 2789]

سیدنا ابو بصرہ حمیل بن بصرہ رضی اللہ عنہ سے روایت ہے کہ وہ سیدنا ابوہریرہ رضی اللہ عنہ سے ملے، جب کہ وہ طور سے واپس آ رہے تھے، تو انہوں نے کہا: ”اگر میں آپ کے وہاں جانے سے پہلے آپ سے مل لیتا تو آپ وہاں نہ جاتے، یقیناً میں نے رسول اللہ صلی اللہ علیہ وسلم کو فرماتے ہوئے سنا ہے: «إِنَّمَا تُضْرَبُ أَكْبَادُ الْمَطِيِّ إِلَى ثَلَاثَةِ مَسَاجِدَ: الْمَسْجِدِ الْحَرَامِ، وَمَسْجِدِي هَذَا، وَالْمَسْجِدِ الْأَقْصَى» ”سواریوں کے کجاوے (سفر کی غرض سے) صرف تین مسجدوں کی طرف ہی کسے جاتے ہیں: مسجدِ حرام، میری یہ مسجد اور مسجدِ اقصیٰ۔““ [المعجم الأوسط/باب الألف/حدیث: 2790]

سیدنا ابن عمر رضی اللہ عنہما سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو یہ فرماتے ہوئے سنا: ”اللہ عزوجل قیامت کے دن اس شخص کی طرف نظرِ (رحمت) نہیں فرمائے گا جس نے تکبر کی وجہ سے اپنا کپڑا (زمین پر) گھسیٹا۔““ [المعجم الأوسط/باب الألف/حدیث: 2791]

سیدنا ابوسعید خدری رضی اللہ عنہ سے روایت ہے کہ انہوں نے فرمایا: رسول اللہ صلی اللہ علیہ وسلم نے فرمایا: ”جب تم میں سے کوئی نماز پڑھے تو اپنے سامنے سے کسی کو گزرنے نہ دے، پھر اگر وہ باز نہ آئے تو اس سے مقابلہ کرے، کیونکہ وہ شیطان ہے۔“ [المعجم الأوسط/باب الألف/حدیث: 2792]

سیدنا عمر رضی اللہ عنہ سے روایت ہے کہ انہوں نے اللہ کی راہ میں (جہاد کے لیے) ایک گھوڑا سواری کو دیا، پھر انہوں نے اسے اسی شخص کے پاس پایا جس نے اسے (مناسب دیکھ بھال نہ کر کے) ضائع کر دیا تھا، اور وہ شخص تنگ دست تھا، پس انہوں نے اسے خریدنے کا ارادہ کیا، پھر رسول اللہ صلی اللہ علیہ وسلم کی خدمت میں حاضر ہو کر آپ سے اس کا تذکرہ کیا تو آپ صلی اللہ علیہ وسلم نے فرمایا: ”تم اسے مت خریدو، اگرچہ وہ تمہیں ایک درہم کے بدلے ہی کیوں نہ دے، کیونکہ اپنے ہدیہ کو واپس لینے والے کی مثال اس کتے کی سی ہے جو اپنی قے چاٹتا ہے۔“ [المعجم الأوسط/باب الألف/حدیث: 2793]

صنابحی رحمہ اللہ سے روایت ہے کہ نبی کریم صلی اللہ علیہ وسلم نے فرمایا: ”جب بندہ وضو کرتا ہے، پس وہ کلی کرتا ہے اور ناک میں پانی چڑھاتا ہے تو اس کے چہرے کے گناہ جھڑ جاتے ہیں، یہاں تک کہ وہ اس کی پلکوں کے نیچے سے بھی نکل جاتے ہیں؛ پھر جب وہ اپنے دونوں ہاتھ دھوتا ہے تو اس کے گناہ اس کے ہاتھوں سے نکل جاتے ہیں، یہاں تک کہ وہ اس کے ناخنوں کے نیچے سے بھی نکل جاتے ہیں؛ پھر جب وہ اپنے سر کا مسح کرتا ہے تو اس کے گناہ اس کے سر سے نکل جاتے ہیں، یہاں تک کہ وہ اس کے دونوں کانوں کے درمیان سے بھی نکل جاتے ہیں؛ پھر جب وہ اپنے دونوں پاؤں دھوتا ہے تو اس کے گناہ اس کے پاؤں سے نکل جاتے ہیں، یہاں تک کہ وہ اس کے ناخنوں کے نیچے سے بھی نکل جاتے ہیں۔“ [المعجم الأوسط/باب الألف/حدیث: 2794]

سیدہ حفصہ بنت عمر رضی اللہ عنہا، سیدنا عمر رضی اللہ عنہ سے روایت کرتی ہیں کہ میں نے انہیں یہ فرماتے ہوئے سنا: «اللَّهُمَّ قَتْلًا فِي سَبِيلِكَ، وَوَفَاةً فِي بَلَدِ نَبِيِّكَ» ”اے اللہ! (مجھے) اپنی راہ میں شہادت اور اپنے نبی صلی اللہ علیہ وسلم کے شہر میں موت عطا فرما۔“
میں نے عرض کیا: یہ کیسے ممکن ہے؟ تو انہوں نے فرمایا: «يَأْتِي بِهِ اللهُ إِذَا شَاءَ» ”اللہ جب چاہے اسے پورا فرما دیتا ہے۔“ [المعجم الأوسط/باب الألف/حدیث: 2795]

سیدنا عبداللہ بن خبیب رضی اللہ عنہ سے روایت ہے کہ انہوں نے فرمایا: ”میں مکہ کے راستے میں نبی صلی اللہ علیہ وسلم کے ساتھ تھا کہ ہمیں ایک گہری دھند نے آ لیا جس نے لوگوں کو ایک دوسرے سے جدا کر دیا، تو رسول اللہ صلی اللہ علیہ وسلم نے مجھ سے دریافت فرمایا: ”لوگ کہاں ہیں؟“ میں نے عرض کیا: انہیں دھند نے منتشر کر دیا ہے۔ آپ صلی اللہ علیہ وسلم نے فرمایا: ”پڑھو۔“ میں نے عرض کیا: میں کیا پڑھوں؟ آپ صلی اللہ علیہ وسلم نے فرمایا: ” ﴿قُلْ أَعُوذُ بِرَبِّ الْفَلَقِ﴾ پڑھو“ یہاں تک کہ آپ صلی اللہ علیہ وسلم نے اسے مکمل کیا، پس میں نے اسے پڑھا، تو آپ صلی اللہ علیہ وسلم نے ارشاد فرمایا: ”لوگوں اور تمام مخلوق نے اس جیسی کسی چیز کے ذریعے (اللہ کی) پناہ نہیں مانگی۔““ [المعجم الأوسط/باب الألف/حدیث: 2796]

سیدنا ابوہریرہ رضی اللہ عنہ سے روایت ہے کہ جب یہ آیت نازل ہوئی: ﴿وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاءَ﴾ ”اور جو لوگ پاک دامن عورتوں پر تہمت لگائیں، پھر چار گواہ پیش نہ کریں“، تو سیدنا سعد بن عبادہ رضی اللہ عنہ نے عرض کیا: ”اگر میں اپنی اہلیہ کے ساتھ کسی مرد کو دیکھوں، تو کیا میں اس وقت تک انتظار کروں کہ چار گواہ لے کر آؤں؟“
رسول اللہ صلی اللہ علیہ وسلم نے ان سے فرمایا: ”جی ہاں۔“
انہوں نے عرض کیا: ”ہرگز نہیں، اس ذات کی قسم جس نے آپ کو حق کے ساتھ مبعوث فرمایا ہے! اگر میں اسے دیکھ لوں تو (گواہ لانے سے) پہلے ہی تلوار سے اس کا کام تمام کر دوں۔“
تب آپ صلی اللہ علیہ وسلم نے فرمایا: ”اے گروہِ انصار! دیکھو تمہارے سردار کیا کہہ رہے ہیں، بے شک سعد بڑے غیرت مند ہیں، اور میں ان سے زیادہ غیرت مند ہوں، اور اللہ عز وجل مجھ سے بھی زیادہ غیرت مند ہے۔“ [المعجم الأوسط/باب الألف/حدیث: 2797]