سیدنا ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: جمعہ کے دن میں ایک گھڑی ایسی ہے کہ جو شخص بھی اس وقت نماز پڑھتا ہو اور اللہ تعالیٰ سے کوئی بھلائی مانگے تو اللہ تعالی اسے عطا کر دیتے ہیں۔ [المنتقى ابن الجارود/كِتَابُ الصَّلَاةِ/حدیث: 282]

سیدنا عبد اللہ بن عمر رضی اللہ عنہما بیان کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: جمعہ کے لیے آنے والا غسل کر کے آئے۔ [المنتقى ابن الجارود/كِتَابُ الصَّلَاةِ/حدیث: 283]

سیدنا ابو سعید خدری رضی اللہ عنہ مرفوع بیان کرتے ہیں کہ جمعہ کے دن غسل کرنا ہر بالغ پر واجب ہے۔ [المنتقى ابن الجارود/كِتَابُ الصَّلَاةِ/حدیث: 284]

سیدنا سمرہ بن جندب رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: جو جمعہ کے دن (صرف) وضو کرے، وہ بھی درست ہے، لیکن جو غسل کرے، تو غسل کرنا افضل ہے۔ [المنتقى ابن الجارود/كِتَابُ الصَّلَاةِ/حدیث: 285]

سیدنا ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: (جمعہ کے دن) مسجد کے تمام دروازوں پر فرشتے موجود ہوتے ہیں، جو پہلے آنے والوں کے نام ترتیب سے لکھتے ہیں، پھر جب امام (منبر) پر بیٹھ جاتا ہے، تو وہ رجسٹر بند کر کے خطبہ سننے لگتے ہیں، سب سے پہلے آنے والوں کو اونٹ کے صدقے کے برابر ثواب ملتا ہے، اس کے بعد آنے والوں کو گائے کےصدقے کے برابر ثواب ملتا ہے، اس کے بعد آنے والوں کو مینڈھے کے صدقے کے برابر ثواب ملتا ہے۔ حتی کہ آپ نے مرغی اور انڈے (کے صدقے) کا ذکر بھی کیا۔ [المنتقى ابن الجارود/كِتَابُ الصَّلَاةِ/حدیث: 286]

سیدہ حفصہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے فرمایا: ہر بالغ پر جمعہ (ادا کرنے) کے لیے جانا واجب ہے اور ہر جمعہ ادا کرنے والے پر غسل واجب ہے۔ [المنتقى ابن الجارود/كِتَابُ الصَّلَاةِ/حدیث: 287]

صحابی رسول صلی اللہ علیہ وسلم سیدنا ابو الجعد عمر و بن بکر ضمری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا جو سستی کی وجہ سے تین جمعے (مسلسل) چھوڑ دیتا ہے، اس کے دل پر مہر لگا دی جاتی ہے۔ [المنتقى ابن الجارود/كِتَابُ الصَّلَاةِ/حدیث: 288]

سیدنا انس رضی اللہ عنہ بیان کرتے ہیں کہ رسول اللہ صلی اللہ علیہ وسلم ہمیں سورج ڈھل جانے کے بعد جمعہ پڑھایا کرتے تھے۔ [المنتقى ابن الجارود/كِتَابُ الصَّلَاةِ/حدیث: 289]

سیدنا سائب بن یزید رضی اللہ عنہ بیان کرتے ہیں کہ نبی کریم صلی اللہ علیہ وسلم ، سیدنا ابوبکر اور سیدنا عمر رضی اللہ عنہما کے دور میں پہلی اذان اس وقت ہوتی تھی جب امام (مسجد میں) آتا تھا اور دوسری اذان تب ہوتی، جب جماعت کھڑی ہوتی تھی (یعنی اقامت) سیدنا عثمان رضی اللہ عنہ کے دور میں جب آبادی بڑھ گئی، تو انہوں نے مقام زوراء پر تیسری اذان کہنے کا حکم دیا، چنانچہ وہ اب تک جاری ہے۔ [المنتقى ابن الجارود/كِتَابُ الصَّلَاةِ/حدیث: 290]

عبد الرحمن بن کعب بن مالک رحمہ اللہ بیان کرتے ہیں کہ میں اپنے والد کی بصارت ختم ہونے کے بعد ان کا رہنما تھا، چنانچہ وہ جب بھی جمعہ کی اذان سنتے، تو فرماتے: اللہ! ابو امامہ پر رحم کرے۔ میں نے اپنے والد سے کہا: مجھے اس بات پر حیرانی ہوتی ہے کہ آپ جب بھی جمعہ کی اذان سنتے ہیں، تو ابو امامہ کے لیے رحمت کی دعا کرتے ہیں۔ فرمایا: بیٹا! یہ پہلے شخص ہیں، جنہوں نے ہمیں ہزم النبیت نامی بستی کے ایک باغ میں جمعہ پڑھایا، جسے نقیع الخصمات کہا جاتا ہے، یہ مدینہ کے اندر حرہ بنی بیاضہ میں واقع ہے۔ عرض کیا: اس دن آپ کتنے آدمی تھے؟ فرمایا: چالیس۔ [المنتقى ابن الجارود/كِتَابُ الصَّلَاةِ/حدیث: 291]