سیدنا ابو ہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”جماعت کے ساتھ نماز پڑھنا، اکیلے نماز پڑھنے سے پچیس گنا افضل ہے۔“ [المنتقى ابن الجارود/كِتَابُ الصَّلَاةِ/حدیث: 303]

سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”میں نے ارادہ کیا ہے کہ لوگوں کو حکم دے کر جماعت کھڑی کروا دوں، پھر میں اپنے جوانوں کو حکم دوں کہ وہ ان لوگوں کے پاس جائیں، جو جماعت میں شامل نہیں ہوتے اور لکڑیوں کے گٹھوں سے ان کے گھر جلا دوں، اگر کسی کو معلوم ہو جائے کہ اسے موٹی تازی ہڈی یا دو عمده پائے ملیں گے، تو وہ عشا کی نماز میں بھی حاضر ہو جائے گا۔“ [المنتقى ابن الجارود/كِتَابُ الصَّلَاةِ/حدیث: 304]

سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب آپ نماز کے لیے آئیں تو دوڑیں نہ، بلکہ سکون کے ساتھ چل کر آئیں، نماز کا جو حصہ پالیں، پڑھ لیں اور جو چھوٹ جائے، اسے پورا کر لیں۔“ [المنتقى ابن الجارود/كِتَابُ الصَّلَاةِ/حدیث: 305]

سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب اقامت ہو جائے ....“ الخ، شعیب، عقیل اور ابن ابی ذئب وغیرہ کی روایات میں «فَأَتِمُّوا» کے الفاظ ہیں۔ [المنتقى ابن الجارود/كِتَابُ الصَّلَاةِ/حدیث: 306]

سیدنا عبد اللہ بن عمر رضی اللہ عنہما بیان کرتے ہیں کہ مہاجرین جب مکہ سے مدینہ آئے، تو انہوں نے قباء کے ساتھ عصبہ کے مقام پر پڑاؤ کیا، تو سالم مولیٰ ابی حذیفہ رضی اللہ عنہ نے ان کی امامت کروائی، کیوں کہ وہ سب سے زیادہ قرآن جانتے تھے۔ ان میں سیدنا ابوسلمہ بن عبدالاسد رضی اللہ عنہ اور سیدنا عمر رضی اللہ عنہما بھی موجود تھے۔ [المنتقى ابن الجارود/كِتَابُ الصَّلَاةِ/حدیث: 307]

سیدنا ابو مسعود انصاری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”لوگوں کی امامت وہ کرائے، جو سب سے زیادہ کتاب اللہ (قرآن) کو پڑھنے والا ہو، اگر قرآت میں سب برابر ہوں، تو پھر امامت وہ کرائے، جو سنت کو زیادہ جانتا ہو، اگر سنت میں سب برابر ہوں، تو پھر وہ کرائے، جس نے پہلے ہجرت کی ہو، اگر ہجرت میں بھی سب برابر ہوں، تو وہ کرائے، جو سب سے زیادہ عمر رسیدہ ہو، کوئی کسی کی سلطنت میں اس کی اجازت کے بغیر امامت نہ کرائے اور نہ ہی بغیر اجازت اس کی عزت کی جگہ پر بیٹھے۔“ [المنتقى ابن الجارود/كِتَابُ الصَّلَاةِ/حدیث: 308]

سیدنا ابو یزید جرمی عمرو بن سلمہ رضی اللہ عنہ بیان کرتے ہیں کہ ہم لوگوں کی گزرگاہ پر موجود پانی کے پاس رہتے تھے، چنانچہ ہم ان سے پوچھتے رہتے تھے کہ یہ دین کیسا ہے؟ انہوں نے حدیث بیان کرتے ہوئے فرمایا: میرے والد اپنے محلے کے لوگوں کی طرف سے اسلام کی معلومات لینے گئے، تو جب تک اللہ تعالی نے چاہا نبی کریم صلی اللہ علیہ وسلم کے پاس رہے، پھر جب واپس آئے، تو ہم نے ان کا استقبال کیا۔ وہ ہمیں دیکھ کر کہنے لگے، اللہ کی قسم! میں ایک سچے رسول کے پاس سے آ رہا ہوں۔ پھر فرمایا: وہ آپ کو فلاں فلاں کاموں کا حکم دیتے ہیں اور فلاں فلاں کاموں سے روکتے ہیں، نیز یہ حکم دیتے ہیں کہ آپ فلاں نماز فلاں وقت پڑھیں اور فلاں نماز فلاں وقت پڑھیں، جب نماز کا وقت ہو، تو ایک آدمی اذان کہے، پھر وہ امامت کرائے، جو آپ میں سے قرآن زیادہ جانتا ہو، ہمارے محلے والوں نے غور کیا، تو مجھ سے زیادہ قرآن جاننے والا کسی کو نہ پایا، کیوں کہ میں قافلے والوں سے قرآن یاد کرتا رہتا تھا، چنانچہ انہوں نے مجھے آگے کھڑا کر دیا، میں چھ برس کی عمر میں انہیں نماز پڑھاتا رہا۔ [المنتقى ابن الجارود/كِتَابُ الصَّلَاةِ/حدیث: 309]

سیدنا انس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے سیدنا عبداللہ ابن ام مکتوم رضی اللہ عنہ کو دو مرتبہ مدینہ میں اپنا نائب مقرر کیا، میں نے جنگ قادسیہ کے دن ان کو دیکھا، ان کے پاس کالا جھنڈا تھا۔ [المنتقى ابن الجارود/كِتَابُ الصَّلَاةِ/حدیث: 310]

سیدنا سہل بن سعد رضی اللہ عنہ بیان کرتے ہیں کہ زمانہ جاہلیت میں پائے جانے والے اختلاف کی بنا پر دو انصاری قبائل میں تلخ کلامی ہو گئی حتٰی کہ شیطان حائل ہو گیا (یعنی جھگڑ پڑے) اور ایک روایت میں ہے: حتٰی کہ انہوں نے ایک دوسرے کو پکڑ لیا۔ نبی کریم صلی اللہ علیہ وسلم کو پتہ چلا، تو ان کی صلح کرانے آئے، آپ کو کچھ دیر (نماز تک) ٹھہرنا پڑ گیا، تو سیدنا بلال رضی اللہ عنہ نے اذان کہہ دی، آپ مزید لیٹ ہوئے اور آ نہ سکے، تو سیدنا بلال رضی اللہ عنہ نے اقامت کہہ دی اور سیدنا ابو بکر رضی اللہ عنہ (نماز پڑھانے کے لیے) آگے ہو گئے، امامت شروع کی، تو رسول اللہ صلی اللہ علیہ وسلم تشریف لے آئے، آپ صلی اللہ علیہ وسلم صفوں میں سے گزرتے ہوئے، پہلی صف میں کھڑے ہو گئے، سیدنا ابو بکر رضی اللہ عنہ نماز میں ادھر ادھر متوجہ نہیں ہوا کرتے تھے، لوگوں نے تالیاں بجانا شروع کر دیں، جب تالیوں کی آواز سنی، تو اس طرف متوجہ ہوئے کہ رسول اللہ صلی اللہ علیہ وسلم تشریف فرما ہیں، رسول اللہ صلی اللہ علیہ وسلم نے انہیں اسی جگہ کھڑا رہنے کا اشارہ کیا، سید نا ابوبکر رضی اللہ عنہ نے آسمان کی طرف سر اٹھایا اور الٹے پاؤں پیچھے ہٹ گئے۔ نبی کریم صلی اللہ علیہ وسلم آگے ہو گئے، نماز پوری کرنے کے بعد پوچھا: ابوبکر! نماز کی امامت جاری کیوں نہ رکھی؟ عرض کیا: اللہ تعالیٰ ابو قحافہ کے بیٹے کو اپنے نبی صلی اللہ علیہ وسلم کے آگے (کھڑا) نہیں دیکھنا چاہتا۔ [المنتقى ابن الجارود/كِتَابُ الصَّلَاةِ/حدیث: 311]

سیدنا سہل بن سعد رضی اللہ عنہ بیان کرتے ہیں کہ ایک دن رسول اللہ صلی اللہ علیہ وسلم نے منبر پر نماز پڑھائی، جب کہ لوگ آپ کے پیچھے تھے، آپ جب رکوع سے اٹھے، تو الٹے پاؤں چل کر زمین پر سجدہ کیا، پھر دوبارہ منبر پر چڑھ گئے اور سجدہ کرنے کے لیے اتر گئے، فارغ ہو کر فرمایا: لوگو! میں نے آپ کو یہ نماز اس لیے پڑھائی ہے کہ جیسے آپ نے مجھے دیکھا، اسی طرح میری اقتدا کریں۔ [المنتقى ابن الجارود/كِتَابُ الصَّلَاةِ/حدیث: 312]