حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: خانہ کعبہ کو حبشہ کا چھوٹی پنڈلیوں والا شخص منہدم کرے گا۔ [مصنف ابن ابي شيبه/كتاب الحج/حدیث: 14659]

حضرت علی رضی اللہ عنہ بن ابی طالب ارشاد فرماتے ہیں کہ گویا کہ میں حبشہ کے اس شخص کو دیکھ رہا ہوں جس کے سر کے بال آگے سے اڑے ہوئے ہیں، چھوٹے کانوں اور چھوٹی پنڈلیوں والا اس پر بیٹھا اس کو منہدم کر رہا ہے۔ [مصنف ابن ابي شيبه/كتاب الحج/حدیث: 14660]

حضرت عبد اللہ بن عمرو رضی اللہ عنہ فرماتے ہیں کہ گویا کہ وہ شخص جس کے سر کے بال اڑے ہوئے ہیں اور پاؤں اور ہاتھوں کے جوڑوں میں ٹیڑھا پن ہے اس پر کھڑا ہے اور اس کو اپنے پھاوڑے سے گرا رہا ہے۔ [مصنف ابن ابي شيبه/كتاب الحج/حدیث: 14661]

(حضرت مجاہد فرماتے ہیں کہ) جب حضرت ابن زبیر رضی اللہ عنہ نے کعبہ کو گرایا تو میں وہ صفات دیکھنے لگا جو حضرت ابن عمرو رضی اللہ عنہ نے بیان فرمائی تھیں لیکن میں نے ان کو نہ پایا۔ [مصنف ابن ابي شيبه/كتاب الحج/حدیث: 14662]

حضرت مجاہد فرماتے ہیں کہ جب حضرت ابن زبیر نے کعبہ کو گرانے کا پختہ ارادہ کرلیا تو ہم لوگ تین دن کے لیے منیٰ چلے گئے اور اللہ کے عذاب کا انتظار کرتے رہے۔ [مصنف ابن ابي شيبه/كتاب الحج/حدیث: 14663]

حضرت سلمان فرماتے ہیں کہ آل زبیر کے ایک شخص کے ہاتھ سے یہ بیت اللہ ضرور جلایا جائے گا۔ [مصنف ابن ابي شيبه/كتاب الحج/حدیث: 14664]

حضرت مجاہد فرماتے ہیں کہ جب بیت اللہ کو گرایا گیا تو ایک پتھر ملا جس پر یہ تحریر تھا: میں اللہ ہوں مکہ شہر کا مالک، میں نے اس کو اس دن بنایا تھا جس دن میں نے چاند وسورج کو بنایا تھا، میں نے اس کو سات سیدھے فرشتوں سے گھیر رکھا ہے۔ میں نے ان کے رہنے والوں کے لیے گھی اور فربہ گوشت میں برکت رکھی ہے، اور یہ نہیں زائل ہوگا یہاں تک کہ یہ دو پہاڑ زائل اور ختم ہوجائیں اور سب سے پہلے اس حرمت کا حلال سمجھنے والے اس کے رہائشی ہوں گے۔ [مصنف ابن ابي شيبه/كتاب الحج/حدیث: 14665]

حضرت ضحاک بن مزاحم فرماتے ہیں کہ جب بیت اللہ کو غلاف پہنایا گیا تو ایک سیلاب نما پانی کا ریلا آیا جس نے بیت اللہ کے ایک پتھر کو الٹ دیا تو اس پر تحریر تھا: میں بکہ والا اللہ ہوں، میں نے اس کو اس دن بنایا جس دن میں نے دونوں پہاڑوں کو بنایا اور میں نے اس کو سات سیدھے فرشتوں کے سامنے بنایا جو یہودی اور عیسائی نہ تھے۔ [مصنف ابن ابي شيبه/كتاب الحج/حدیث: 14666]

حضرت عامر فرماتے ہیں کہ مجھ سے اس شخص نے بیان کیا جس نے وہ مکتوب پڑھا جو بیت اللہ کی چھت کی دیواروں سے یا مقام ابراہیم کے نیچے سے ملا تھا (اس میں تحریر تھا) میں بیت اللہ والا اللہ ہوں، میں نے اس کو سات سیدھے فرشتوں کے سامنے بنایا ہے، میں نے اس کے رہنے والوں کے لیے کھانے پینے (گوشت اور پانی) کی چیزوں میں برکت رکھی، اور اس کے رہنے والے کے رزق کو تین راستوں سے بنایا اور سب سے پہلے اس کی حرمت کو حلال سمجھنے والے اس کے اھل ہیں۔ [مصنف ابن ابي شيبه/كتاب الحج/حدیث: 14667]