حضرت علی رضی اللہ عنہ نے حضرت ابن عباس رضی اللہ عنہما سے فرمایا کہ کیا تم نہیں جانتے کہ رسول اللہ صلی اللہ علیہ وسلم نے متعہ سے اور پالتو گدھوں کا گوشت کھانے سے منع فرمایا ہے؟ [مصنف ابن ابي شيبه/كتاب النكاح/حدیث: 17944]

حضرت سبرہ جہنی کہتے ہیں کہ رسول اللہ صلی اللہ علیہ وسلم نے فتح مکہ کے دن متعہ سے منع فرمادیا۔ [مصنف ابن ابي شيبه/كتاب النكاح/حدیث: 17945]

حضرت سبرہ جہنی کہتے ہیں کہ میں نے رسول اللہ صلی اللہ علیہ وسلم کو دیکھا کہ آپ رکن اور باب کعبہ کے درمیان کھڑے تھے اور فرما رہے تھے: ”اے لوگو! میں نے تمہیں عورتوں سے متعہ کرنے کی اجازت دی تھی، اب اللہ تعالیٰ نے اسے قیامت تک کے لئے حرام قرار دے دیا ہے، اگر کسی کے پاس متعہ والی بیوی ہو تو اس کا راستہ چھوڑ دے اور جو مہر تم نے انہیں دیا ہے وہ واپس نہ لو۔ [مصنف ابن ابي شيبه/كتاب النكاح/حدیث: 17946]

حضرت ایاس بن سلمہ کے والد فرماتے ہیں کہ رسول اللہ صلی اللہ علیہ وسلم نے اوطاس والے سال میں تین (دن) کے لئے متعہ کی اجازت دی تھی، پھر اس سے منع فرمادیا۔ [مصنف ابن ابي شيبه/كتاب النكاح/حدیث: 17947]

حضرت عمر رضی اللہ عنہ فرماتے ہیں کہ اگر میں نے اس کے بارے میں پہلے سے اعلان کر دیا ہوتا تو میں (متعہ کرنے والوں کو) سنگسار کرتا۔ یعنی متعہ کے بارے میں۔ [مصنف ابن ابي شيبه/كتاب النكاح/حدیث: 17948]

حضرت سعید بن مسیب رحمہ اللہ فرماتے ہیں کہ حضرت عمر رضی اللہ عنہ نے دو متعوں: متعۃ النساء اور متعۃ الحج سے منع فرمایا ہے۔ [مصنف ابن ابي شيبه/كتاب النكاح/حدیث: 17949]

حضرت ابن عمر رضی اللہ عنہما سے متعہ کے بارے میں سوال کیا گیا تو انہوں نے فرمایا کہ ہم تو اسے زنا ہی سمجھتے ہیں۔ [مصنف ابن ابي شيبه/كتاب النكاح/حدیث: 17950]

حضرت ابن عمر رضی اللہ عنہما سے متعہ کے بارے میں سوال کیا گیا تو انہوں نے فرمایا کہ یہ حرام ہے۔ ان سے کہا گیا کہ حضرت ابن عباس رضی اللہ عنہما تو اس کے جواز کا فتویٰ دیتے ہیں۔ حضرت ابن عمر رضی اللہ عنہما نے فرمایا کہ پھر وہ حضرت عمر رضی اللہ عنہ کے زمانے میں اس کے بارے میں دبی آواز میں بھی کچھ کیوں نہیں کہتے تھے۔ [مصنف ابن ابي شيبه/كتاب النكاح/حدیث: 17951]

حضرت سعید بن مسیب رحمہ اللہ فرماتے ہیں کہ اللہ تعالیٰ حضرت عمر رضی اللہ عنہ پر رحم فرمائے اگر وہ متعہ سے منع نہ کرتے تو زنا سرعام ہوا کرتا۔ [مصنف ابن ابي شيبه/كتاب النكاح/حدیث: 17952]

حضرت حسن رحمہ اللہ فرماتے ہیں کہ خدا کی قسم! متعہ صرف تین دن کے لئے جائز تھا، رسول اللہ صلی اللہ علیہ وسلم نے اس کی اجازت دی تھی، متعہ نہ تو اس سے پہلے جائز تھا نہ اس کے بعد کبھی جائز ہوا۔ [مصنف ابن ابي شيبه/كتاب النكاح/حدیث: 17953]