حضرت قیس فرماتے ہیں کہ میں جنگ قادسیہ میں مسلمانوں کی طرف سے شریک تھا۔ حضرت سعد بن ابی وقاص اس جنگ میں مسلمانوں کے امیر تھے۔ رستم اپنی فوج کو لے کر آیا تو حضرت عمرو بن معدی کرب زبیدی مسلمانوں کی صفوں میں سے گزرے اور ان سے کہا کہ اے مہاجرین کی جماعت! بہادر شیر بن جاؤ، اصل شیر وہ ہے جو اپنی جان کی پروا نہ کرے۔ فارسیوں کا مزاج ہے کہ جب وہ اپنا نیزہ ڈال دیں تو بکرے کی طرح ہیں۔ ان کے ساتھ ایک ایرانی شہسوار تیر انداز تھا جس کا کوئی تیر خطا نہ جاتا تھا۔ ہم نے حضرت عمرو سے کہا کہ اے ابو ثور! اس سے بچ کر رہنا۔ ہم یہ بات کہہ ہی رہے تھے کہ اس نے ہماری طرف تیر چلایا اور وہ حضرت عمرو کے گھوڑے کو لگا، پھر حضرت عمرو نے اس پر حملہ کیا، اس سے لپٹ گئے، پھر اسے ذبح کردیا اور اس کا سامان حاصل کرلیا جس میں سونے کے دو کنگن تھے، ایک کمر بند تھا اور ایک ریشم کا چوغہ تھا۔ (٢) ثقیف کا ایک آدمی بھاگا اور اس نے جا کر مشرکین کو خبر دے دی اور اس نے بجیلہ کی طرف اشارہ کرتے ہوئے کہا کہ لوگ اس طرف ہیں، پھر انہوں نے ہماری طرف سولہ ہاتھی بھیجے جن پر جنگجو سوار تھے۔ اور تمام لوگوں کی طرف دوہاتھی بھیجے۔ حضرت سعد اس دن فرما رہے تھے کہ بجیلہ سے پیچھے ہٹ جاؤ۔ حضرت قیس فرماتے ہیں کہ ہم جنگ قادسیہ میں لوگوں کا ایک چوتھائی تھے۔ اور حضرت عمر رضی اللہ عنہ نے ہمیں سواد (عراق کی زرخیز زمین) کا چوتھائی حصہ دیا اور ہم نے تین سال اسے لیا۔ (٣) اس کے بعد حضرت جریر حضرت عمار بن یاسر کی معیت میں ایک وفد کے ساتھ حضرت عمر کے پاس آئے۔ حضرت عمر نے ان سے فرمایا کہ کیا تم دونوں مجھے اپنی ان دو منزلوں کے بارے میں نہیں بتاؤ گے؟ اس کے باوجود میں ان راستوں پر چلتا ہوں اور ان کے رخ پہچانتا ہوں کہ دونوں میں سے کون سی منزل بہتر ہے؟ حضرت جریر نے کہا کہ اے امیر المومنین! میں آپ کو خبر دیتا ہوں۔ ایک منزل تو وہ ہے جو سواد کی کھجوروں میں سرزمین عرب کے سب سے قریب ہے اور دوسری منزل سرزمین فارس ہے، اس کا بخار، اس کی گرمی اور اس کے مچھر، یعنی مدائن۔ وہ کہتے ہیں کہ حضرت عمار نے میری تکذیب کی اور کہا کہ آپ نے جھوٹ بولا۔ حضرت عمر نے فرمایا کہ تم زیادہ جھوٹے ہو۔ پھر انہوں نے فرمایا کہ کیا تم مجھے اپنے اس امیر کے بارے میں نہیں بتاتے کہ کیا وہ تمہارے لئے کافی ہیں؟ لوگوں نے کہا کہ نہ تو وہ کافی ہیں اور نہ ہی سیاست کے رموز کو جانتے ہیں۔ پھر حضرت عمر نے انہیں معزول کرکے حضرت مغیرہ بن شعبہ کو امیر بنا کر بھیج دیا۔ [مصنف ابن ابي شيبه/كتاب البعوث والسرايا/حدیث: 35999]

حضرت قیس فرماتے ہیں کہ جنگ قادسیہ میں حضرت سعد بن ابی وقاص کے پاؤں پر ایک پھوڑا نکل آیا اور وہ قتال کے لئے نہ جاسکے۔ لوگوں میں پسپائی ہوگئی۔ حضرت سعد کی زوجہ جو کہ پہلے مثنی بن حارثہ شیبانی کے نکاح میں تھیں۔ انہوں نے کہا کہ گھڑ سواروں کے لئے کوئی مثنی نہیں ہے! اس پر حضرت سعد نے انہیں تھپڑ مارا۔ اس نے کہا کہ بزدلی اور غیرت کی وجہ سے!!! راوی کہتے ہیں کہ پھر ہم نے دشمنوں کو شکست دے دی۔ [مصنف ابن ابي شيبه/كتاب البعوث والسرايا/حدیث: 36000]

حضرت قیس فرماتے ہیں کہ حضرت سعد بن ابی وقاص کی ایک بیوی جن کا نام سلمی بنت خصفہ تھا، وہ بنو شیبان کے ایک شخص مثنی بن حارثہ کے نکاح میں رہ چکی تھیں۔ انہوں نے ایک مرتبہ حضرت سعد کے سامنے مثنی کا ذکر کیا تو حضرت سعد نے انہیں تھپڑ مارا۔ انہوں نے کہا بزدلی اور غیر ت کی وجہ سے مارتے ہو!!! [مصنف ابن ابي شيبه/كتاب البعوث والسرايا/حدیث: 36001]

حضرت محمد بن سعد فرماتے ہیں کہ قادسیہ کی جنگ کے دوران ایک دن ابو محجن شاعر کو شراب پینے کے جرم میں حضرت سعد بن ابی وقاص کے پاس لایا گیا۔ حضرت سعد نے اسے بیڑیوں میں باندھنے کا حکم دے دیا۔ اس وقت حضرت سعد زخمی تھے اور لوگوں کے پاس نہ جاسکتے تھے۔ لہٰذا انہوں نے اپنے مجاہدین کی نگرانی کے لئے عذیب نامی چشمے کے علاقے کو منتخب کیا اور معائنہ کرنے لگے۔ آپ نے خالد بن عرفطہ کو گھڑ سواروں کا قائد بنایا تھا۔ جب جنگ شروع ہوئی تو ابو محجن نے ایک شعرکہا جس کا ترجمہ یہ ہے کہ یہ غم کافی ہے کہ گھڑ سوار نیزوں کے ساتھ دوڑ رہے ہیں اور مجھے بیڑیوں میں جکڑ کر چھوڑ دیا گیا ہے۔ (٢) پھر اس نے حضرت سعد کی بیوی بنت خصفہ سے کہا کہ تم مجھے آزاد کردو میں قسم کھاتا ہوں کہ اگر زندہ رہا تو واپس آکر خود اس بیڑی میں خود کو جکڑ لوں گا اور اگر مارا گیا تو تمہیں مجھ سے راحت مل جائے گی۔ پھر بنت خصفہ نے اس کھول دیا اورادھر میدان کارزار گرم ہوچکا تھا۔ (٣) اس نے ایک چھلانگ لگائی تو حضرت سعد کے بلقاء نامی گھوڑے پر سوار ہوا، ایک نیزہ پکڑا اور دشمنوں پر حملہ کردیا وہ جہاں جاتا تھا دشمنوں کو شکست دے دیتا ہے۔ یہاں تک کہ لوگوں نے کہنا شروع کردیا کہ یہ فرشتہ ہے! اور حضرت سعد فرما رہے تھے کہ چھلانگ تو میرے گھوڑے بلقاء کی ہے اور نیزہ چلانا ابو محجن کا ہے جب کہ ابو محجن تو قید میں ہے!! (٤) جب دشمن کو شکست ہوگئی تو ابو محجن واپس آیا اور خود کو بیڑی میں جکڑ لیا۔ بنت خصفہ نے سارا واقعہ حضرت سعد کو بتایا تو انہوں نے فرمایا کہ خدا کی قسم میں ایسے آدمی پر حد جاری نہیں کرسکتا جس کی وجہ سے اللہ تعالیٰ نے مسلمانوں کو کامیابی عطا فرمائی۔ پھر حضرت سعد نے ابو محجن کو آزاد کردیا۔ اس پر ابو محجن نے کہا کہ جب مجھ پر حد قائم کی جاتی تھی تو میں شراب پیتا تھا اور حد کے ذریعہ پاک ہوجاتا تھا اور اب جبکہ آپ نے مجھ سے حد معاف کردی ہے تو خدا کی قسم میں یہ شراب کبھی نہیں پیوں گا۔ [مصنف ابن ابي شيبه/كتاب البعوث والسرايا/حدیث: 36002]

حضرت ابو وائل فرماتے ہیں کہ حضرت سعد بن ابی وقاص اپنا لشکر لے کر قادسیہ پہنچے۔ میرے خیال میں ہم لوگ سات یا آٹھ ہزار سے زائد نہیں تھے۔ جبکہ مشرک دشمن ساٹھ ہزار یا اس کے لگ بھگ تھے۔ ان کے پاس ہاتھی بھی تھے۔ جب وہ میدان میں اترے تو انہوں نے ہم سے کہا کہ واپس چلے جاؤ، نہ تمہارے پاس تعداد ہے، نہ قوت ہے اور نہ ہی اسلحہ۔ واپس چلے جاؤ۔ ہم نے کہا کہ ہم واپس نہیں جائیں گے۔ وہ ہمارے تیروں کو دیکھ کر بھی ہنستے تھے اور انہیں چرخے سے تشبیہ دیتے تھے۔ جب ہم نے ان کی بات ماننے اور واپس جانے سے انکار کردیا تو انہوں نے کہا کہ کسی سمجھدار آدمی کو ہمارے پاس بھیجو جو تمہاری آمد کے مقصد کو ہمارے لئے واضح کردے کیونکہ ہم تو نہ تم میں کوئی تعداد دیکھتے ہیں اور نہ ہی کوئی قوت! (٢) اس پر حضرت مغیرہ بن شعبہ نے کہا کہ میں ان کے پاس جاتا ہوں۔ حضرت مغیرہ ان کے پاس گئے اور جاکر رستم کے ساتھ اس کے تخت پر بیٹھ گئے۔ یہ بات رستم کو اور اس کے ساتھیوں کو بہت ناگوار محسوس ہوئی۔ حضرت مغیرہ نے کہا کہ میرے یہاں بیٹھنے سے نہ تو میری عزت میں اضافہ ہوا ہے اور نہ تمہارے بادشاہ کی شان میں کوئی کمی ہوئی ہے۔ رستم نے کہا کہ مجھے بتاؤ کہ تم اپنے شہر سے یہاں کیوں آئے ہو کیونکہ میں تم میں نہ کوئی تعداد دیکھتا ہوں اور نہ ہی قوت؟ اس پر حضرت مغیرہ بن شعبہ رضی اللہ عنہ نے فرمایا کہ ہم ایک ایسی قوم تھے جو بدبختی اور گمراہی کا شکارتھی۔ اللہ تعالیٰ نے ہم میں ایک نبی کو بھیجا جن کی وجہ سے اللہ تعالیٰ نے ہمیں ہدایت عطا فرمائی۔ اللہ تعالیٰ نے ان کی وجہ سے ہمیں روزی بھی عطا کی۔ جو روزی ان کی وجہ سے ہمیں ملی اس میں ایک ایسا غلہ تھا جس کے بارے میں لوگوں کو خیال ہے کہ وہ اس سرزمین میں پیدا ہوتا ہے۔ جب ہم نے اسے کھایا اور اپنے گھر والوں کو کھلایا تو لوگوں نے کہا کہ ہمارے لئے اس وقت تک کوئی بھلائی نہیں جب تک ہم اس سرزمین میں جاکر اس غلے کونہ کھالیں۔ (٣) رستم نے کہا کہ پھر ہم تمہیں قتل کریں گے۔ حضرت مغیرہ نے کہا کہ اگر تم ہمیں قتل کرو گے تو ہم جنت میں داخل ہوں گے اور اگر ہم نے تمہیں قتل کیا تو تم جہنم میں جاؤ گے۔ لڑائی نہ ہونے کی صورت میں تمہیں جزیہ دینا ہوگا۔ جب حضرت مغیرہ نے کہا کہ تمہیں جزیہ دینا ہوگا تو وہ لوگ چیخنے لگے اور شدید غصے کا اظہار کرنے لگے۔ اور کہا کہ تمہاری اور ہماری صلح نہیں ہوگی۔ پھر حضرت مغیرہ نے فرمایا کہ تم ہماری طرف پیش قدمی کرتے ہو یا ہم تمہاری طرف بڑھیں؟ رستم نے کہا کہ ہم تمہاری طرف آتے ہیں۔ پس مسلمان پیچھے ہوئے اور ان میں سے جس نے آگے بڑھنا تھا آگے بڑھا اور مسلمانوں نے ان پر حملہ کیا، انہیں قتل کیا اور انہیں شکست دے دی۔ [مصنف ابن ابي شيبه/كتاب البعوث والسرايا/حدیث: 36003]

حضرت حصین فرماتے ہیں کہ ان کے بادشاہ رستم کا تعلق آذربائیجان سے تھا۔ [مصنف ابن ابي شيبه/كتاب البعوث والسرايا/حدیث: 36004]

حضرت حصین فرماتے ہیں کہ میں نے اپنے ایک بزرگ عبید بن جحش کو فرماتے ہوئے سنا ہے کہ ہم آدمیوں کی پشتوں پر چل رہے تھے اور آدمیوں کی پشتوں پر خندق عبور کر رہے تھے۔ انہیں کسی ہتھیار نے چھوا تک نہیں تھا، انہوں نے ایک دوسرے کو قتل کیا تھا۔ ہمیں ایک تھیلے میں کچھ کافور ملا، ہم نے بلاشبہ سمجھا کہ یہ نمک ہے۔ چنانچہ ہم نے گوشت پکایا اور اس پر اسے ڈالا لیکن ہمیں کچھ ذائقہ محسوس نہ ہوا۔ ہمارے پاس سے ایک قمیص لئے ہوئے ایک عبادی (حیرہ کا نصرانی عرب) گزرا اور اس نے کہا کہ اے عرب کے لوگو! اپنا کھانا خراب نہ کرو۔ اس سرزمین کے نمک میں کوئی خیر نہیں۔ کیا میں تمہیں اس کے بدلے یہ قمیص دے دوں؟ چنانچہ اس نے ہمیں اس کے بدلے ایک قمیص دے دی۔ ہم نے وہ قمیص اپنے ایک ساتھی کو دی اور اس نے پہن لی۔ ہم اس کے گرد گھومنے لگے اور تعجب کرنے لگے۔ پھر جب ہم نے کپڑوں کو پہچانا تو معلوم ہوا کہ اس قمیص کی قیمت دو درہم ہے۔ وہ فرماتے ہیں کہ میں نے ایک ایسے آدمی کی طرف اشارہ کیا جس نے سونے کے دو کنگن پہن رکھے تھے اور اس کا ہتھیار ان قبروں میں سے ایک قبر میں تھا۔ میں نے اس کی طرف اشارہ کیا تو وہ باہر نکل آیا، نہ اس نے ہم سے بات کی اور نہ ہم نے اس سے بات کی یہاں تک کہ ہم نے اس کی گردن اڑا دی۔ پھر ہم نے انہیں شکست دی یہاں تک کہ وہ فرات تک پہنچ گئے۔ پھر ہم سوار ہوئے اور ان کا پیچھا کیا تو وہ شکست کھا کر سوراء تک چلے گئے۔ پھر ہم نے ان کا پیچھا کیا تو وہ شکست کھا کر سراۃ چلے گئے۔ پھر ہم نے ان کا پیچھا کیا یہاں تک کہ وہ مدائن پہنچ گئے۔ پھر ہم کوثیٰ نامی جگہ ٹھہرے۔ دیری میں مشرکین کی ایک مسلح چوکی تھی۔ مسلمانوں کے گھڑ سوار ان کے پاس آئے اور ان سے جنگ کی تو مشرکین کی مسلح چوکی شکست کھا کر مدائن سے جا ملی۔ پھر مسلمان چلے اور دریائے دجلہ کے کنارے جاکر پڑاؤ ڈالا۔ پھر مسلمانوں کی ایک جماعت نے کلواذی سے، مدائن کی نچلی جانب سے دریا عبور کیا اور کافروں کا محاصرہ کرلیا۔ یہاں تک کہ ان کے پاس کھانے کے لئے ان کے کتوں اور بلیوں کے سوا کچھ نہ بچا۔ پھر وہ ایک رات کوچ کرکے جلولاء آئے اور حضرت سعد رضی اللہ عنہ لوگوں کو لے کر ان کی طرف چلے اور حضرت ہاشم بن عتبہ رضی اللہ عنہ لشکر کے ہراول پر تھے۔ یہی وہ معرکہ ہے جو پیش آیا۔ پھر اللہ تعالیٰ نے انہیں ہلاک کردیا اور ان کے بچے کھچے لوگ نہاوند چلے گئے۔ [مصنف ابن ابي شيبه/كتاب البعوث والسرايا/حدیث: 36005]

راوی کہتے ہیں کہ حضرت ابو وائل نے فرمایا کہ جب مشرکین جلولاء سے شکست کھا کر بھاگے تو نہاوند آگئے۔ حضرت عمر بن خطاب رضی اللہ عنہ نے کوفہ والوں پر حضرت حذیفہ بن یمان رضی اللہ عنہ کو اور بصرہ والوں پر حضرت مجاشع بن مسعود سلمی رضی اللہ عنہ کو امیر مقرر فرمایا۔ پھر حضرت عمرو بن معدی کرب رضی اللہ عنہ ان کے پاس آئے اور عرض کیا کہ مجھے میرے جیسے آدمی کے لائق گھوڑا اور میرے جیسے آدمی کے لائق ہتھیار دیجئے۔ انہوں نے فرمایا کہ ٹھیک ہے، میں تمہیں اپنے مال میں سے دوں گا۔ حضرت عمرو بن معدی کرب رضی اللہ عنہ نے ان سے کہا کہ خدا کی قسم! ہم نے آپ لوگوں کی ہجو کی تو آپ کو لاجواب نہ پایا، ہم نے آپ سے جنگ کی تو آپ کو بزدل نہ پایا، اور ہم نے آپ سے مانگا تو آپ کو بخیل نہ پایا۔ [مصنف ابن ابي شيبه/كتاب البعوث والسرايا/حدیث: 36006]

حضرت حصین فرماتے ہیں کہ حضرت نعمان بن مقرن رضی اللہ عنہ کسکر کے حاکم تھے۔ انہوں نے حضرت عمر رضی اللہ عنہ کو خط لکھا کہ اے امیر المومنین! میری اور کسکر کی مثال اس نوجوان جیسی ہے جو ایک فاحشہ عورت کے پاس ہو اور وہ اس کے لئے بناؤ سنگھار کرتی اور خوشبو لگاتی ہو۔ میں آپ کو اللہ کی قسم دیتا ہوں کہ مجھے کسکر سے معزول کردیں اور مسلمانوں کے کسی لشکر میں بھیج دیں۔ حضرت عمر نے انہیں لکھا کہ نہاوند میں لوگوں کے پاس چلے جاؤ، تم ان کے امیر ہو۔ چنانچہ وہ ان کے پاس گئے اور دشمن سے مقابلہ ہوا تو وہ سب سے پہلے شہید ہوئے۔ حضرت سوید بن مقرن رضی اللہ عنہ نے جھنڈا سنبھالا، پھر اللہ تعالیٰ نے انہیں فتح عطا فرمائی اور مشرکین کو ہلاک کردیا، اور اس دن کے بعد ان کی کوئی جماعت قائم نہ رہ سکی۔ راوی کہتے ہیں کہ ہر شہر والے اپنے دشمنوں اور ان کے علاقوں کی طرف بڑھنے لگے۔ حضرت حصین فرماتے ہیں کہ جب مشرکین مدائن سے شکست کھا کر بھاگے تو وہ جلولاء میں ان تک جا پہنچے، پھر واپس لوٹے اور حضرت عمار بن یاسر رضی اللہ عنہ کو بھیجا۔ وہ چلے یہاں تک کہ مدائن میں ٹھہرے اور لوگوں کو وہاں بسانا چاہا، لیکن لوگوں کو وہاں کی آب و ہوا موافق نہ آئی اور انہوں نے اسے ناپسند کیا۔ حضرت عمر کو معلوم ہوا کہ لوگ اسے ناپسند کرتے ہیں تو انہوں نے پوچھا کہ کیا وہاں اونٹ ٹھیک رہتے ہیں؟ لوگوں نے کہا کہ نہیں، کیونکہ وہاں مچھر ہیں۔ حضرت عمر نے فرمایا کہ عرب ایسی زمین میں ٹھیک نہیں رہتے جس میں اونٹ ٹھیک نہ رہیں۔ چنانچہ وہ لوٹ آئے۔ پھر حضرت سعد رضی اللہ عنہ کی ایک عبادی سے ملاقات ہوئی۔ اس نے کہا کہ میں تمہیں ایسی زمین بتاتا ہوں جو مچھروں سے بلند ہے، شور زدہ زمین سے نیچی ہے، زرعی علاقے کے درمیان ہے اور عمدہ مٹی میں بڑھی ہوئی ہے۔ اس نے کہا کہ وہ حیرہ اور فرات کے درمیان کی زمین ہے۔ [مصنف ابن ابي شيبه/كتاب البعوث والسرايا/حدیث: 36007]

حضرت شعبی فرماتے ہیں کہ جنگ قادسیہ کے موقع پر حضرت عمر رضی اللہ عنہ نے حضرت سعد کے نام ایک خط لکھا جس میں لکھا کہ میں آپ کی طرف حجاز والوں کو اور یمن والوں کو بھیج رہا ہوں، ان میں سے جو مقتولین کی لاشیں پھٹنے سے پہلے قتال میں آ پہنچے اسے مال غنیمت میں سے حصہ دیجئے۔ [مصنف ابن ابي شيبه/كتاب البعوث والسرايا/حدیث: 36008]