حضرت زید بن وہب فرماتے ہیں کہ میں ایک مرتبہ قبرستان گیا اور ایک دیوار کے ساتھ بیٹھ گیا۔ اتنے میں ایک آدمی آیا اور اس نے ایک قبر کو سیدھا کیا اور پھر میرے پاس بیٹھ گیا۔ میں نے اس سے پوچھا کہ یہ کس کی قبر ہے؟ اس نے بتایا کہ یہ میرے بھائی کی قبر ہے۔ میں نے کہا کہ تمہارے بھائی کی؟ اس نے کہا کہ یہ میرا اسلامی بھائی ہے۔ میں نے اسے رات کو خواب میں دیکھا اور میں نے اس سے کہا کہ اے فلاں تو نے زندگی پائی! تمام تعریفیں اللہ رب العالمین کے لئے ہیں۔ اس نے کہا کہ تو نے یہ جملہ کہہ لیا ہے، اگر میں اس کے کہنے پر قادر ہوجاؤں تو یہ مجھے زمین بھر اور جو کچھ اس میں ہے سب سے زیادہ محبوب ہوگا۔ کیا تم نے دیکھا کہ جب لوگ مجھے دفن کررہے تھے تو ایک آدمی نے کھڑے ہوکر دو رکعت نماز پڑھی تھی۔ اگر مجھے وہ دو رکعت پڑھنے کی قدرت مل جائے تو وہ مجھے دنیا اور جو کچھ دنیا میں ہے سب سے زیادہ محبوب ہوگا۔ [مصنف ابن ابي شيبه/كتاب الزهد/حدیث: 38162]

حضرت عطاء بن یسار فرماتے ہیں کہ اللہ کی رحمت سے مایوس کرنے والوں کے لئے قیامت کے دن ایک پل ہوگا اور لوگ ان کے چہروں کو روندیں گے۔ [مصنف ابن ابي شيبه/كتاب الزهد/حدیث: 38163]

حضرت خباب فرماتے ہیں کہ عنقریب چیخیں ہوں گی ان پر کان لگائے رکھو۔ [مصنف ابن ابي شيبه/كتاب الزهد/حدیث: 38164]

حضرت ابن ابی لیلیٰ فرماتے ہیں کہ میں نے ان شہروں میں چکر لگایا ہے، میں نے اہل بصرہ سے زیادہ تہجد گزار اور اللہ کے ذکر کی طرف زیادہ جلدی کرنے والا کوئی نہیں دیکھا۔ [مصنف ابن ابي شيبه/كتاب الزهد/حدیث: 38165]

حضرت ابو عبد الرحمن سلمی فرماتے ہیں کہ ہر صبح فرشتہ تم میں سے ہر ایک کے پاس سفید نامہ اعمال لے کر آتا ہے پس اسے چاہئے کہ اس میں خیر لکھوائے، جب سورج طلوع ہوجائے تو اپنی حاجت کے لئے اٹھ جائے اور جب عصر کی نماز پڑھ لے تو اس میں خیر لکھوائے، پس جب اعمال نامے کے شروع اور آخر میں خیر ہو تو امید ہے کہ ان دونوں حصوں کی خیر درمیانی حصے کو بھی کفایت کرجائے گی۔ [مصنف ابن ابي شيبه/كتاب الزهد/حدیث: 38166]

حضرت خالد بن معدان کہتے ہیں کہ لوگ آگ کے پاس سے گزریں گے تو وہ بجھی ہوئی ہوگی۔ وہ کہیں گے وہ آگ کہاں ہے جس کا ہم سے وعدہ کیا گیا تھا؟ ان سے کہا جائے گا کہ جب تم اس کے پاس سے گزرے تھے تو وہ بجھی ہوئی تھی۔ [مصنف ابن ابي شيبه/كتاب الزهد/حدیث: 38167]

حضرت عبد الرحمن بن سابط فرماتے ہیں کہ حضرت سعید بن عامر بن حذیم مصر کے امیر تھے۔ حضرت عمر بن خطاب رضی اللہ عنہ کو ان کے بارے میں معلوم ہوا کہ ان پر بعض اوقات ایسے بھی آتے ہیں کہ ان کا چولہا نہیں جلتا۔ حضرت عمر رضی اللہ عنہ نے ان کی طرف کچھ مال بھیجا۔ انہوں نے اس سے اپنی اور اپنے اہل و عیال کی ضرورت کی چیزیں خرید لیں۔ پھر حضرت سعید بن عامر رضی اللہ عنہ نے اپنی اہلیہ سے فرمایا کہ کیوں نہ ہم یہ مال ایسے تاجر کو دے دیں جو اس میں ہمارے لئے نفع کمائے؟ ان کی اہلیہ نے فرمایا کہ آپ ایسا کرلیجئے۔ پھر آپ نے وہ مال صدقہ کردیا اور دیتے رہے یہاں تک کہ اس میں سے کچھ بھی باقی نہ رہا۔ پھر کچھ عرصے بعد انہیں احتیاج ہوئی اور مال کی ضرورت پڑی تو ان کی بیوی نے کہا کہ اگر آپ ان دراہم کو دیکھ کر لے لیتے تو اچھا ہوتا آج ہمیں ان کی ضرورت ہے۔ حضرت سعید بن عامر رضی اللہ عنہ نے ان کی بات پر توجہ نہ دی۔ ان کی اہلیہ نے پھر وہی بات دہرائی، انہوں نے پھر اعراض کیا۔ پھر جب ان پر واضح ہوگیا کہ انہوں نے وہ مال خرچ کر ڈالا ہے تو انہیں ملامت کرنے لگیں۔ حضرت سعید بن عامر رضی اللہ عنہ نے حضرت خالد بن ولید رضی اللہ عنہ سے مدد چاہی۔ حضرت خالد بن ولید رضی اللہ عنہ نے ان سے بات کی اور فرمایا کہ تم نے حضرت سعید کو تکلیف پہنچائی ہے۔ گویا اس بات نے انہیں ان کے خلاف اور ابھار دیا اور انہوں نے پھر وہی بات کہی۔ جب حضرت سعید رضی اللہ عنہ نے یہ دیکھا تو گھٹنوں کے بل بیٹھ گئے اور کہنے لگے کہ مجھے یہ بات بالکل پسند نہیں کہ قیامت کے دن مجھے پہلی جماعت میں داخل ہونے سے روک لیا جائے جبکہ اس کے بدلے میں مجھے دنیا کی ہر چیز ہی کیوں نہ مل جائے۔ اور اگر ایک حور آسمانوں کے اوپر سے اپنی انگلیاں زمین والوں کے لئے ظاہر کردے تو ان کی خوشبو سب کو محسوس ہوگی۔ تو کیا میں انہیں تم عورتوں کی خاطر چھوڑ دوں؟ تمہیں ان کی خاطر چھوڑ دینا اس سے زیادہ لائق ہے کہ میں انہیں تمہاری خاطر چھوڑوں۔ جب انہوں نے یہ دیکھا تو ان سے باز آگئیں۔ [مصنف ابن ابي شيبه/كتاب الزهد/حدیث: 38168]

حضرت مالک بن مغول فرماتے ہیں کہ ایک آدمی ربیع بن ابی راشد کے پاس سے گزرا، وہ موچیوں کے ایک صندوق پر بیٹھے تھے۔ اس آدمی نے ان سے کہا کہ اگر آپ مسجد چلیں اور مسلمان بھائیوں سے بات چیت کریں تو اچھا ہو۔ حضرت ربیع نے ان سے فرمایا کہ اگر موت کی یاد ایک لمحے کے لئے بھی میرے دل سے جدا ہو تو میں سمجھتا ہوں کہ میرا دل خراب ہوجائے گا۔ [مصنف ابن ابي شيبه/كتاب الزهد/حدیث: 38169]

حضرت اسماعیل بن شعیب فرماتے ہیں کہ میرے والد مکہ کے سفر میں حضرت ربیع بن ابی راشد کے ہم سفر تھے، ایک دن انہوں نے فرمایا کہ اگر مجھے معلوم ہوجائے کہ میرے رب کو میرا کون سا عمل سب سے زیادہ محبوب ہے تو میں اس کا بہت زیادہ اہتمام کروں گا۔ پھر انہوں نے خواب میں شکر اور ذکر کو دیکھا۔ [مصنف ابن ابي شيبه/كتاب الزهد/حدیث: 38170]

حضرت عمر بن ذر کہتے ہیں کہ حضرت ربیع بن ابی راشد مجھے سدہ کے ایک بازار میں ملے۔ انہوں نے مجھ سے مصافحہ کیا اور فرمایا کہ اے ابو ذر! جو شخص اللہ تعالیٰ سے اس کی رضا کو مانگتا ہے وہ اللہ سے درحقیقت بہت عظیم چیز مانگتا ہے۔ [مصنف ابن ابي شيبه/كتاب الزهد/حدیث: 38171]