عکرمہ رحمہ اللہ بیان کرتے ہیں: سیدنا عبداللہ بن عباس رضی اللہ عنہما یہ آیت تلاوت کیا کرتے تھے: ”اور جو لوگ اس کی طاقت نہیں رکھتے، ان پر لازم ہے۔“ سیدنا عبداللہ بن عباس رضی اللہ عنہما فرمایا کرتے تھے: یہ آیت منسوخ ہوئی۔ [سنن الدارقطني/ كِتَابُ الصِّيَامِ/حدیث: 2387]

سیدنا عبداللہ بن عمر رضی اللہ عنہما کے بارے میں یہ منقول ہے: ان کی اہلیہ نے ان سے سوال کیا، وہ خاتون حاملہ تھیں، تو سیدنا عبداللہ بن عمر رضی اللہ عنہما نے فرمایا: ”تم روزے رکھنا چھوڑ دو اور ایک دن کے عوض ایک مسکین کو کھانا کھلا دیا کرو، بعد میں اس کی قضاء بھی نہیں کرنا۔“ [سنن الدارقطني/ كِتَابُ الصِّيَامِ/حدیث: 2388]

نافع بیان کرتے ہیں: سیدنا عبداللہ بن عمر رضی اللہ عنہما کی ایک صاحبزادی، جو ایک قریشی کی بیوی تھیں، وہ حاملہ ہوئیں، تو انہیں شدید پیاس محسوس ہوئی، تو سیدنا عبداللہ بن عمر رضی اللہ عنہما نے انہیں یہ ہدایت کی کہ: ”وہ روزہ رکھنا چھوڑ دیں اور ایک دن کے عوض ایک مسکین کو کھانا کھلا دیں۔“ [سنن الدارقطني/ كِتَابُ الصِّيَامِ/حدیث: 2389]

ایوب بیان کرتے ہیں: ایک سال سیدنا انس بن مالک رضی اللہ عنہ کمزوری کی وجہ سے روزے نہیں رکھ سکتے تھے، انہوں نے ثرید کی ہنڈیا تیار کروائی اور تیس مسکینوں کو بلا کر انہیں سیر ہو کر کھانا کھلایا۔ [سنن الدارقطني/ كِتَابُ الصِّيَامِ/حدیث: 2390]

قتادہ بیان کرتے ہیں: سیدنا انس رضی اللہ عنہ انتقال سے قبل کمزور ہو گئے تھے، تو انہوں نے روزے نہیں رکھے، انہوں نے اپنی اہلیہ کو یہ ہدایت کی کہ: ”وہ ہر ایک دن کے عوض ایک مسکین کو کھانا کھلا دیں۔“ ہشام نامی راوی نے اپنی روایت میں یہ الفاظ نقل کیے ہیں: ”انہوں نے تیس مسکینوں کو کھانا کھلایا۔“ [سنن الدارقطني/ كِتَابُ الصِّيَامِ/حدیث: 2391]

مجاہد بیان کرتے ہیں: میں نے قیس بن سائب کو یہ بیان کرتے ہوئے سنا: ”رمضان کے مہینے کا فدیہ آدمی یہ دے گا کہ اپنی طرف سے ہر ایک دن کے عوض ایک مسکین کو کھانا کھلا دے، اس لیے تم میری طرف سے دو مسکینوں کو کھانا کھلا دو۔“ [سنن الدارقطني/ كِتَابُ الصِّيَامِ/حدیث: 2392]

سیدنا ابوہریرہ رضی اللہ عنہ ارشاد فرماتے ہیں: ”جو شخص بوڑھا ہو جائے اور روزہ رکھنے کی استطاعت نہ رکھے، تو اس پر لازم ہے کہ وہ ہر ایک دن کے عوض گندم کا ایک مد ادا کرے۔“ [سنن الدارقطني/ كِتَابُ الصِّيَامِ/حدیث: 2393]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جس شخص کے ذمے قرض ہو، اس کی طرف سے ادا کر دیا جائے، تو یہ اس کی طرف سے ادائیگی ہو جاتی ہے۔“ نبی کریم صلی اللہ علیہ وسلم نے حج اور روزے کے متعلق اسی کی مانند بات ارشاد فرمائی ہے۔ اس روایت کا راوی دہشم ضعیف ہے، جبکہ دوسرا راوی عمرو بن عثمان مجہول ہے۔ [سنن الدارقطني/ كِتَابُ الصِّيَامِ/حدیث: 2394]