امام صاحب رحمہ اللہ ایک اور استاد سے یہی روایت بیان کرتے ہیں، لیکن اس میں یہ الفاظ نہیں ہیں: ”مجھ پر جھوٹ باندھنا عام انسان پر جھوٹ باندھنے کی طرح نہیں ہے۔“ [صحيح مسلم/مقدمة/حدیث: 6]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”انسان کے جھوٹا ہونے کے لیے اتنی بات کافی ہے کہ وہ ہر سنی ہوئی بات (بلا تحقیق) بیان کر دے۔“ [صحيح مسلم/مقدمة/حدیث: 7]

امام صاحب رحمہ اللہ ایک اور استاد سے حضرت ابوہریرہ رضی اللہ عنہ کی اس کے ہم معنی روایت بیان کرتے ہیں۔ [صحيح مسلم/مقدمة/حدیث: 8]

حضرت عمر بن خطاب رضی اللہ عنہ بیان کرتے ہیں: ”انسان کے لیے اتنا جھوٹ ہی کافی ہے کہ وہ ہر سنی سنائی بات بیان کر دے۔“ [صحيح مسلم/مقدمة/حدیث: 9]

ابن وہب رحمہ اللہ کہتے ہیں، مجھ سے امام مالک رحمہ اللہ نے فرمایا: خوب جان لو! ہر وہ انسان جو ہر سنی ہوئی بات بیان کر دیتا ہے، وہ جھوٹ سے محفوظ نہیں رہ سکتا اور نہ وہ کبھی (مقتدا) بن سکتا ہے جب کہ وہ ہر سنی ہوئی بات بیان کرتا ہے۔ [صحيح مسلم/مقدمة/حدیث: 10]

حضرت عبداللہ بن مسعود رضی اللہ عنہ فرماتے ہیں: ”انسان (کے جھوٹا ہونے) کے لیے اتنا جھوٹ ہی کافی ہے کہ وہ ہر سنی سنائی بات بیان کر دے۔“ [صحيح مسلم/مقدمة/حدیث: 11]

عبدالرحمٰن بن مہدی رحمہ اللہ کہتے ہیں: انسان لائقِ اقتدا امام نہیں بن سکتا، حتیٰ کہ وہ بعض سنی سنائی باتیں بیان کرنے سے رک جائے۔ [صحيح مسلم/مقدمة/حدیث: 12]

سفیان بن حسین رحمہ اللہ کہتے ہیں: مجھ سے ایاس بن معاویہ رحمہ اللہ نے کہا: ”میں دیکھتا ہوں تمہیں علمِ قرآن کا شوق ہے، اس کی تعمیل پر فریفتہ ہو، مجھے کوئی سورت سناؤ اور اس کی تفسیر کرو، تاکہ میں اندازہ لگاؤں کہ تم نے کیا سیکھا ہے (تیرے علم کا جائزہ لوں)۔“ تو میں نے ایسا ہی کیا (حکم کی تعمیل کی) تو انہوں نے مجھے کہا: ”میں جو بات تمہیں کہنے لگا ہوں، میری طرف سے اس کو یاد رکھنا، حدیث میں اپنے آپ کو شناعت (قباحت) سے بچانا (یعنی ایسی موضوع، من گھڑت اور منکر احادیث بیان نہ کرنا، جس سے لوگ تمہیں برا سمجھیں)؛ کیونکہ ایسا کام کرنے والا اپنی نظروں میں بھی ذلیل ہوتا ہے اور لوگ بھی اس کی حدیثوں کی تکذیب کرتے ہیں۔“ [صحيح مسلم/مقدمة/حدیث: 13]

حضرت عبداللہ بن مسعود رضی اللہ عنہ نے فرمایا: اگر تم لوگوں کو ایسی احادیث سناؤ گے جو ان کی عقل کی دسترس سے باہر ہیں (وہ ان کو سمجھ نہیں سکتے) تو یہ چیز ان میں سے بعض کے لیے فتنہ (گمراہی) کا باعث ہو گی۔ [صحيح مسلم/مقدمة/حدیث: 14]

حضرت ابو ہریرہ رضی اللہ عنہ رسول اللہ صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”میری امت کے آخر میں ایسے لوگ ہوں گے، جو تمہیں ایسی حدیثیں سنائیں گے جن کو نہ تم نے سنا ہوگا اور نہ ہی تمہارے آباؤ اجداد نے، چنانچہ تم اپنے آپ کو ان سے بچا کر رکھنا۔“ [صحيح مسلم/مقدمة/حدیث: 15]