سیدنا عبد اللہ بن سائب رضی اللہ عنہ بیان کرتے ہیں کہ میں نبی کریم صلی اللہ علیہ وسلم کے ساتھ عید کی نماز میں شامل ہوا، فرمایا: نماز پوری ہو چکی ہے، جو خطبہ (سننے) کے لیے بیٹھنا چاہتا ہے، بیٹھا رہے اور جو جانا چاہتا ہے، چلا جائے۔ [المنتقى ابن الجارود/كتاب الصلاة/حدیث: 264]

سیدنا نعمان بن بشیر رضی اللہ عنہ بیان کرتے ہیں کہ نبی کریم صلی اللہ علیہ وسلم نماز عید میں سورت اعلٰی اور سورت غاشیہ پڑھا کرتے تھے، اگر عید اور جمعہ اکٹھے آ جاتے تو دونوں میں یہی سورتیں پڑھتے۔ [المنتقى ابن الجارود/كتاب الصلاة/حدیث: 265]

ابو عمیر بن انس رحمہ اللہ کے چچا جو صحابی رسول ہیں، بیان کرتے ہیں کہ ہمیں شوال کا چاند نظر نہ آیا، تو ہم نے صبح کو روزہ رکھ لیا، پھر پچھلے پہر ایک قافلہ آیا اور انہوں نے رسول اللہ صلی اللہ علیہ وسلم کی خدمت میں حاضر ہو کر گواہی دی کہ انہوں نے کل چاند دیکھا ہے، چنانچہ رسول اللہ صلی اللہ علیہ وسلم نے انہیں اس دن روزہ افطار کرنے اور اگلے دن عید گاہ جانے کا حکم دیا۔ [المنتقى ابن الجارود/كتاب الصلاة/حدیث: 266]

سیدنا عبد اللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے فرمایا: رات کی نماز دو دو رکعات ہے، جب صبح ہونے کا اندیشہ ہو، تو ایک رکعت وتر ادا کر لیں۔ محمود کی روایت میں ہے: وہ آپ کی سابقہ نماز کو وتر بنا دے گی۔ [المنتقى ابن الجارود/كتاب الصلاة/حدیث: 267]

سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے سحری تک رات کے ہر حصے میں وتر پڑھے ہیں۔ [المنتقى ابن الجارود/كتاب الصلاة/حدیث: 258]

سیدنا جابر بن عبد الله رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: جس کو خوف ہو کہ آخر رات نہ جاگ سکے گا، وہ شروع رات کو (عشاء کے بعد) ہی وتر پڑھ کر سوئے اور جسے امید ہو کہ وہ آخر شب اٹھ جائے گا، تو وہ رات کے آخری حصے میں ہی وتر پڑھے، کیوں کہ آخری شب کی نماز میں فرشتے حاضر ہوتے ہیں، لٰہذا یہی افضل ہے۔ [المنتقى ابن الجارود/كتاب الصلاة/حدیث: 259]

سیدنا عبد اللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم وتر سمیت تمام نفل نماز سواری پر ہی پڑھ لیا کرتے تھے، اس کا منہ خواہ جدھر بھی ہوتا، البتہ فرض نماز سواری پر نہیں پڑھا کرتے تھے۔ [المنتقى ابن الجارود/كتاب الصلاة/حدیث: 270]

سیدنا ابی بن کعب رضی اللہ عنہ بیان کرتے ہیں کہ رسول اللہ صلی اللہ علیہ وسلم نماز وتر میں سورت اعلی، سورت کافرون اور سورت اخلاص پڑھا کرتے تھے اور سلام پھیرنے کے بعد تین دفعہ «سُبْحَانَ الْمَلِكِ الْقُدُّوسِ» پڑھا کرتے تھے۔ [المنتقى ابن الجارود/كتاب الصلاة/حدیث: 271]

سیدنا حسن بن علی رضی اللہ عنہما بیان کرتے ہیں کہ رسول اللہ صلی اللہ علیہ وسلم نے مجھے چند کلمات سکھائے ہیں، جنہیں میں قنوت وتر میں پڑھتا ہوں، وہ کلمات یہ ہیں: «اللَّهُمَّ اهْدِنِي فِيمَنْ هَدَيْتَ وَعَافِنِي فِيمَنْ عَافَيْتَ وَتَوَلَّنِي فِيمَنْ تَوَلَّيْتَ وَبَارِكْ لِي فِيمَا أَعْطَيْتَ وَقِنِي شَرَّ مَا قَضَيْتَ فَإِنَّكَ تَقْضِي وَلَا يُقْضَى عَلَيْكَ وَإِنَّهُ لَا يَذِلُّ مَنْ وَالَيْتَ تَبَارَكْتَ رَبَّنَا وَتَعَالَيْتَ» (اے اللہ! مجھے ہدایت دے کر ان لوگوں میں شامل کر لے، جنہیں تو نے ہدایت دی ہے، مجھے عافیت دے کر ان لوگوں میں شامل کر لے، جنہیں تو نے عافیت دی ہے، جنہیں تو نے اپنا دوست قرار دیا ہے، مجھے بھی ان میں شامل کر کے اپنا دوست بنا لے، جو کچھ تو نے مجھے دیا ہے، اس میں میرے لیے برکت ڈال دے، جس برائی کا تو نے فیصلہ کر دیا ہے، اس سے مجھے محفوظ رکھ، یقینا تو ہی فیصلہ صادر کرتا ہے، تیرے خلاف فیصلہ صادر نہیں کیا جا سکتا، جس کا تو والی بن جائے، وہ کبھی ذلیل نہیں ہو سکتا، اے ہمارے رب! تو ہی برکت والا اور بلند ہے) [المنتقى ابن الجارود/كتاب الصلاة/حدیث: 272]

سیدنا حسن بن علی رضی اللہ عنہما بیان کرتے ہیں کہ رسول اللہ صلی اللہ علیہ وسلم نے انہیں یہ کلمات سکھائے تھے تا کہ وہ انہیں قنوت وتر میں پڑھیں۔ [المنتقى ابن الجارود/كتاب الصلاة/حدیث: 273]