سیدنا عبد اللہ بن عمر رضی اللہ عنہما سے جب نماز خوف کے متعلق پوچھا جاتا، تو فرماتے: لوگوں کا ایک گروہ امام کے ساتھ آگے بڑھے اور امام انہیں ایک رکعت نماز پڑھا دے، جب کہ دوسرا گروہ نماز نہ پڑھے، بل کہ ان کے اور دشمن کے درمیان کھڑا رہے، جب وہ لوگ ایک رکعت پڑھ لیں، جو امام کے ساتھ تھے، تو وہ ان لوگوں کی جگہ چلے جائیں جنہوں نے نماز نہیں پڑھی، سلام نہ پھیریں اور جن لوگوں نے نماز نہیں پڑھی، وہ آگے بڑھ کر امام کے ساتھ ایک رکعت پڑھ لیں، پھر امام جو کہ دو رکعتیں پڑھ چکا ہے، سلام پھیر دے، دونوں گروہ کھڑے ہو کر خود ہی ایک ایک رکعت ادا کر لیں، یوں دونوں گروہوں کی دو دو رکعتیں ادا ہو جائیں گی، اگر خوف بہت زیادہ ہو جائے، تو کھڑے کھڑے نماز پڑھ لیں یا سوار ہو کر پڑھ لیں، نیز منہ قبلہ کی جانب ہو یا کسی اور جانب۔ نافع رحمہ اللہ کہتے ہیں: سیدنا عبد اللہ بن عمر رضی اللہ عنہما نے یہ طریقہ رسول اللہ صلی اللہ علیہ وسلم سے ہی بیان کیا ہے۔ [المنتقى ابن الجارود/كتاب الصلاة/حدیث: 234]

صالح بن خوات رحمہ اللہ اس آدمی سے بیان کرتے ہیں، جس نے غزوۃ ذات رقاع کے دن رسول اللہ صلی اللہ علیہ وسلم کے ساتھ نماز خوف پڑھی تھی کہ ایک گروہ آپ صلی اللہ علیہ وسلم کے ساتھ صف میں شامل ہو گیا اور ایک گروہ دشمن کے سامنے کھڑا ہو گیا، آپ صلی اللہ علیہ وسلم اپنے ساتھیوں کو ایک رکعت پڑھا کر سیدھے کھڑے ہو گئے، تو دوسری رکعت انہوں نے علیحدہ پڑھ لی، یہ دشمن کے سامنے صف میں کھڑے ہو گئے، تو دوسرا گروہ آ گیا، آپ صلی اللہ علیہ وسلم نے باقی ایک رکعت ان کو پڑھائی اور سیدھے بیٹھ گئے، حتی کہ دوسری رکعت انہوں نے خود پڑھ لی، پھر آپ صلی اللہ علیہ وسلم نے سلام پھیر دیا۔ [المنتقى ابن الجارود/كتاب الصلاة/حدیث: 235]

سیدنا سہل بن حثمہ رضی اللہ عنہ نماز خوف کے متعلق بیان کرتے ہیں کہ ایک گروہ امام کے آگے کھڑا ہو گا اور ایک گروہ امام کے پیچھے کھڑا ہو گا، پھر امام نے پیچھے والوں کو ایک رکوع اور دو سجدے (ایک رکعت پڑھائے) کرائے اور اپنی جگہ پر بیٹھا رہے گا حتی کہ وہ مزید ایک رکوع اور دو سجدے کر لیں (دوسری رکعت پڑ لیں)، پھر یہ اپنے ساتھیوں کی جگہ اور وہ ان کی جگہ چلے جائیں گے، امام ان کو ایک رکوع اور دو سجدے کرائے اور اپنی جگہ بیٹھا رہے حتی کہ وہ مزید ایک رکوع اور دو سجدے کر لیں، پھر سلام پھیر دے۔ [المنتقى ابن الجارود/كتاب الصلاة/حدیث: 236]

مذکورہ روایت اس سند سے بھی مروی ہے۔ [المنتقى ابن الجارود/كتاب الصلاة/حدیث: 237]

سیدنا عبد اللہ بن عباس رضی اللہ عنہما اس آیت کریمہ کے متعلق فرماتے ہیں: اگر تمہیں بارش کی وجہ سے تکلیف ہو یا تم بیمار ہو (تو نماز جمع کر لو)، اس وقت سیدنا عبد الرحمٰن بن عوف رضی اللہ عنہ زخمی تھے۔ [المنتقى ابن الجارود/كتاب الصلاة/حدیث: 238]

سیدنا انس بن مالک رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: جونماز پڑھنا بھول جائے یا سویا رہے، اس کا کفارہ یہی ہے کہ جب اسے یاد آئے، نماز پڑھ لے۔ [المنتقى ابن الجارود/كتاب الصلاة/حدیث: 239]

سیدنا ابو ہریرہ رضی اللہ عنہ بیان کرتے ہیں کہ ہم نے رات کے آخری حصے میں رسول اللہ صلی اللہ علیہ وسلم کے ساتھ پڑاؤ کیا، سورج کی تپش نے ہی ہمیں بیدار کیا، نبی کریم صلی اللہ علیہ وسلم نے فرمایا: ہر شخص اپنے اونٹ کی نکیل پکڑ کر اس جگہ سے کوچ کر جائے۔ پھر آپ نے پانی منگوا کر وضو کیا اور دو رکعت نماز (سنت) ادا کی، پھر اقامت کہی گئی اور فرض نماز ادا کی۔ [المنتقى ابن الجارود/كتاب الصلاة/حدیث: 240]

سیدنا ابو سعید خدری رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: کسی کو نماز میں شک ہو جائے کہ تین (رکعتیں) ہوئی ہیں یا چار تو وہ کھڑا ہو کر ایک رکعت اور پڑھ لے، تا کہ شک والی رکعت اضافی ہو جائے، پھر سلام سے پہلے دو سجدہ سہو کر لے، اگر اس نے پانچ رکعت پڑھ لی ہیں، تو یہ سجدے انہیں جفت بنا دیں گے اور اگر چار ہی پڑھی ہیں، تو شیطان کو ذلیل کر دیں گے۔ [المنتقى ابن الجارود/كتاب الصلاة/حدیث: 241]

سیدنا عبد اللہ بن بحینہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے انہیں نماز پڑھائی، تو دو رکعت کے بعد کھڑے ہو گئے (تشہد نہ بیٹھے) ہم نے «سبحان الله» کہا، مگر آپ نے نماز جاری رکھی، پھر دو سجدے (سہو) کر کے سلام پھیر دیا۔ یہ الفاظ احمد بن سعید دارمی کے ہیں۔ [المنتقى ابن الجارود/كتاب الصلاة/حدیث: 242]

سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہمیں زوال آفتاب کے بعد والی نمازوں میں سے کوئی ایک ظہر یا عصر کی نماز پڑھائی، میرا خیال ہے کہ عصر کی نماز تھی، دو رکعتیں پڑھانے کے بعد سلام پھیر دیا، پھر غصے سے آگے بڑھے اور کھجور کے تنے کے پاس بیٹھ گئے، جلدی جانے والے لوگ یہ کہتے کہتے چلے گئے کہ نماز کم ہو گئی ہے، نماز کم ہو گئی ہے، ذوالیدین رضی اللہ عنہ آ گے بڑھ کر پوچھنے لگے: اللہ کے رسول! نماز کم ہو گئی ہے یا آپ بھول گئے ہیں؟ فرمایا: کیا ذوالیدین سچ کہہ رہا ہے؟ لوگوں نے عرض کیا: جی ہاں! راوی کہتے ہیں: آپ نے (مزید) دو رکعتیں پڑھا کر سلام پھیر دیا، پھر تکبیر کہہ کرسجدہ کیا، پھر تکبیر کہ کر سر اٹھایا، پھر تکبیر کہ کرسجدہ کیا، پھر تکبیر کہ کر سر اٹھایا۔ [المنتقى ابن الجارود/كتاب الصلاة/حدیث: 243]