سالم اپنے والد کا یہ بیان نقل کرتے ہیں: نبی کریم صلی اللہ علیہ وسلم نے اس بات سے منع کیا ہے کہ خشک کھجور کو تازہ کھجور کے عوض میں فروخت کیا جائے۔ [سنن الدارقطني/ كتاب البيوع/حدیث: 2989]

سیدنا جابر رضی اللہ عنہ بیان کرتے ہیں کہ نبی کریم صلی اللہ علیہ وسلم نے محاقلہ، مزابنہ، مخابرہ سے منع کیا ہے اور ثنیا سے منع کیا ہے، البتہ اگر اس کے بارے میں علم ہو (تو حکم مختلف ہو گا)۔ [سنن الدارقطني/ كتاب البيوع/حدیث: 2990]

سیدنا جابر رضی اللہ عنہ بیان کرتے ہیں کہ نبی کریم صلی اللہ علیہ وسلم نے نامعلوم چیز کا سودا کرنے سے منع کیا ہے، جب تک اس کے بارے میں آگاہی نہ حاصل ہو جائے۔ [سنن الدارقطني/ كتاب البيوع/حدیث: 2991]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”پھلوں کا اس وقت تک سودا نہ کرو، جب تک وہ پک کر تیار نہ ہو جائیں اور کھجور کے عوض میں پھلوں کو سودا نہ کرو۔“ [سنن الدارقطني/ كتاب البيوع/حدیث: 2992]

ایک روایت میں یہ الفاظ ہیں: سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے اس کی مانند سے منع کیا ہے۔ [سنن الدارقطني/ كتاب البيوع/حدیث: 2993]

سیدنا سعد بن ابی وقاص رضی اللہ عنہ بیان کرتے ہیں: نبی کریم صلی اللہ علیہ وسلم نے تر کھجور کے عوض میں خشک کھجور کا ادھار سودا کرنے سے منع کیا ہے۔ اس روایت کے الفاظ کے بارے میں کچھ اختلاف کیا گیا ہے۔ [سنن الدارقطني/ كتاب البيوع/حدیث: 2994]

عبداللہ بن یزید بیان کرتے ہیں: شیخ ابوعیاش نے سیدنا سعد سے گندم کی دو قسموں کے بارے میں دریافت کیا (کیا ان کا آپس میں لین دین کیا جا سکتا ہے)، تو سیدنا سعد رضی اللہ عنہ نے اسے مکروہ قرار دیا، بعد میں بتایا کہ نبی کریم صلی اللہ علیہ وسلم نے تر کھجوروں کے عوض خشک کھجوروں کا سودا کرنے سے منع فرمایا ہے۔ نبی کریم صلی اللہ علیہ وسلم نے اس بارے میں یہ بات ارشاد فرمائی ہے: ”جب وہ خشک ہو جاتی ہیں، تو کم ہو جاتی ہیں۔“ [سنن الدارقطني/ كتاب البيوع/حدیث: 2995]

عبداللہ بن زید بیان کرتے ہیں کہ شیخ ابوعیاش زید نے انہیں بتایا کہ ایک مرتبہ سیدنا سعد رضی اللہ عنہ سے گندم کی دو قسموں کے بارے میں پوچھا گیا، تو سیدنا سعد نے ان سے دریافت کیا: ”ان دونوں میں سے کون سی قسم زیادہ بہتر ہے؟“ تو انہوں نے جواب دیا: ”سفید والی۔“ تو سیدنا سعد رضی اللہ عنہ نے انہیں اس سے منع کر دیا، سیدنا سعد نے بتایا کہ میں نے نبی کریم صلی اللہ علیہ وسلم کو سنا، آپ سے خشک کھجور کے عوض میں تر کھجور کا سودا کرنے کے بارے میں دریافت کیا گیا، تو آپ نے ارشاد فرمایا: ”کیا کھجور جب خشک ہو جاتی ہے، تو کم ہو جاتی ہے؟“ لوگوں نے جواب دیا: ”جی ہاں!“ تو نبی کریم صلی اللہ علیہ وسلم نے اس سے منع فرما دیا۔ [سنن الدارقطني/ كتاب البيوع/حدیث: 2996]

شیخ ابوعیاش بیان کرتے ہیں کہ سیدنا سعد کے دور میں آدمیوں نے جو کی دو قسموں کے بارے میں سودا کر لیا، سیدنا سعد نے فرمایا: نبی کریم صلی اللہ علیہ وسلم کے زمانہ اقدس میں دو آدمیوں نے خشک اور تر کھجور کا سودا کر لیا تھا، نبی کریم صلی اللہ علیہ وسلم نے دریافت کیا: ”کیا کھجور جب خشک ہو جاتی ہے، کم ہو جاتی ہے؟“ لوگوں نے جواب دیا: ”جی ہاں۔“ تو نبی کریم صلی اللہ علیہ وسلم نے ارشاد فرمایا: ”(پھر یہ درست نہیں ہے)۔“ [سنن الدارقطني/ كتاب البيوع/حدیث: 2997]

سیدنا عبداللہ بن عمرو رضی اللہ عنہما بیان کرتے ہیں کہ میں نے نبی کریم صلی اللہ علیہ وسلم کو یہ بات ارشاد فرماتے ہوئے سنا ہے: ”جو بھی شخص کسی دوسرے کے ساتھ خرید و فروخت کرتا ہے، تو ان دونوں میں سے ہر ایک کو اختیار ہو گا (کہ وہ سودے کو ختم کر دے)، جب تک وہ اپنی جگہ سے جدا نہیں ہو جاتے، ماسوائے اس صورت کے جب اس سودے میں اختیار دیا ہو اور کسی بھی شخص کے لیے یہ بات جائز نہیں ہے کہ وہ اپنے ساتھی سے اس اندیشے کے تحت جدا ہو جائے کہ وہ اس سودے کو ختم کر دے گا۔“ [سنن الدارقطني/ كتاب البيوع/حدیث: 2998]